KR og íslenska landsliðið sameinast

Meistaraflokkur KR og íslenska landsliðið í knattspyrnu hafa sameinast.  Formaður KSÍ, Geir Þorsteinsson, sem reyndar er KR-ingur, og forráðamenn knattspyrnudeildar KR komust að samkomulagi um sameininguna eftir enn einn tapleik liðsins, nú gegn FH.  Helsta ástæðan mun vera mikil samlegðaráhrif þar sem bæði lið geta lítið sem ekki neitt.

"Þetta er geysileg lyftistöng fyrir KR að fá að rugla reitum með íslenska landsliðinu.  Bæði þessi lið hafa átt afspyrnuslöku gengi að fagna og þjálfarar beggja liða hafa legið undir miklu ámæli.  Því eru samlegðaráhrifin augljós", sagði Reykur Ingason, blaðafulltrúi KR og hluthafi í KR Sport. 

KSÍ sendi frá sér fréttatilkynningu vegna sameiningarinnar.  "Þar sem tveir mínusar koma saman, þar er plús.  Teitur Þórðarson og Eyjólfur Sverrison munu stjórna sameiginlegu liði og þar sem þeir eru báðir í mínus er það von og vissa KSÍ að gengið verði upp á við héðan í frá" segir í yfirlýsingunni.  FIFA og EUFA munu vera með þetta til athugunar en sams konar fyrirkomulag mun vera við lýði í Bútan.

Framsókn mælist með neikvætt fylgi í nýrri könnun

Fylgishrun Framsóknarflokksins á sér greinilega engin mörk.  Í skoðanakönnun sem Hollustuvernd gerði fyrir Hina Fréttastofuna mælist Framsóknarflokkurinn með neikvætt kjörfylgi.  Sjálfstæðisflokkur og Samfylkingin halda stjórnarmeirihluta sínum og Vinstri-grænir bæta við sig.

Úrtak Hollustuverndar var að þessu sinni 10 og sögðust -2 ætla að kjósa Framsókn en 8 sögðust ætlar að kjósa ríkisstjórnarflokkana og 4 Vinstri-græna.  Geirlaugur Daðason stjórnmálafræðingur segir þetta í fyrsta skiptið sem íslenskur stjórnmálaflokkur mælist með neikvætt kjörfylgi.  "Þetta eru sannarlega stórtíðindi í íslenskri pólitík en um leið kemur þetta mér ekki á óvart.  Framsóknarflokkurinn, með sitt litla fylgi, hefur átt undir högg að sækja og því hlaut að koma að því að fylgið færi niður fyrir 0%" sagði Geirlaugur.

Ekki náðist í neinn Framsóknarmann enda eru þeir ekki á hverju strái.

Skýlaus krafa að konur fái að pissa standandi

Femínistafélag Íslands hefur gefið út yfirlýsingu þar sem þess er krafist að konur fái að pissa standandi.  "Það er skýlaus krafa og sjálfsögð mannréttindi að konur fái að pissa standandi og að skálar og annar útbúnaður sem geri konum það kleift, verði settur upp í öllum opinberum stofnunum, fyrirtækjum, félögum og afgreiðslustöðum" segir í yfirlýsingunni.  Félagið telur að viljaleysi hins opinbera að tryggja konum þessi sjálfsögðu mannréttindi hafi grafið undan jafnrétti og ýtt undir staðalímyndir sem hygli körlum fremur en konum.

Staðalímyndarhópur Femínistafélags Íslands hefur um langa hríð gert athugasemdir við útbúnað á salernum hjá opinberum stofnunum og fyrirtækjum.  Hefur hópurinn farið fram á að skálar sem gera körlum kleift að pissa standandi verði settar upp á kvensalernum við fálegar undirtektir.  Aðeins Trésmíðafélag Reykjavíkur og Blikksmiðjan Grettir hafa orðið við kröfum félagsins.  

Smáralind á minjaskrá Reðursafnsins

Smáralind hefur verið skráð á minjaskrá Reðursafnsins.  Samkvæmt skilmálum minjaskrár Reðursafnsins er óheimilt með öllu að breyta lögun eða ásýnd hússins án samráðs og/eða samþykkis Reðursafnsins á Húsavík.  Búið er að þinglýsa yfirlýsingu þess efnis hjá Sýslumanninum í Kópavogi.

"Það var ljóst, þegar mynd kom á Smáralind á byggingarstigi, að þar væri á ferð haganlega teiknað hús sem lofsöng okkar karlmannanna dýrasta djásn" sagði Grímur Droplaugsson upplýsingafulltrúi Reðursafnsins.  "Við vorum mjög ánægð hér á Húsavík þegar safnið okkar var valið það skrýtnasta í heimi en það er engum blöðum um það að fletta að Smáralind er skrýtnasta verslunarmiðstöð í heimi og því á hún vel á heima á minjaskrá safnsins", sagði Grímur.

Forráðamenn Smáralindar hafa ekki tjáð sig um málið en heimildir herma að þótt þeir telji þetta mikinn heiður fyrir verslunarmiðstöðina óttist þeir fækkun kvenviðskiptavina verði enn meira gert úr lögun hússins en orðið er.

 

VG selur bílaflotann á einu bretti

Þrándi Biering á Bílasölunni Ikarus á Raufarhöfn hefur verið falið það verkefni af forráðamönnum stjórnmálaflokksins Vinstri Grænna að selja bíla allra þeirra sem skráðir eru í flokkinn.  Eins og frægt er orðið steig einn fundarmanna í pontu á síðasta landsfundi flokksins og spurði hverju sætti að allir nema hann hefðu hjólað til fundar.  Fékk landsnefndarfulltrúinn dynjandi lófatak fyrir þessa athugasemd sína og mun hún hafa setið í forystu flokksins eftir landsfundinn.

 Þrándur ber ekki á móti því að þetta séu mikil uppgrip fyrir fyrirtækið, en svo skemmtilega vill til að það er í heimakjördæmi formanns flokksins.  Hann segir samt sem áður engin persónuleg tengsl vera á milli sín og formannsins nema síður sé.  "Ég hef aldrei kosið þessa komma" sagði Þrándur. 

Eftir að hafa skoðað þorra bílaflotans líst honum ekki á blikuna.  "Ég er jákvæður maður að eðlisfari og starfi mínu samkvæmt reyni ég að tala fallega um bílana sem ég sel, en þetta eru meira og minna druslur, illa farnar og ryðétnar.  Umgengnin um bílana er fyrir neðan allar hellur", sagði Þrándur og býst við að meðalverðið muni liggja á bilinu 300-400þkr.  Hann segir þó fallega bíla innan um, sérstaklega bíla forystumanna flokksins.

Ísrael í dag kemur í stað Silfur Egils á Stöð 2

Þáttur Ólafs Jóhannssonar, Ísrael í dag, mun leysa Egil Helgason og Silfrið af hólmi á Stöð 2 næsta vetur.  Ari Edwald mun hafa haft snör handtök og snúið sér til Ólafs þegar ljóst mátti vera að Egill væri á förum.  Félagið Zion Vinir Ísraels munu verða helsti styrktaraðili þáttarins.  Þáttur Ólafs var áður á sjónvarpsstöðinni Omega og munu forráðamenn hennar vera óhressir með gang mála, enda var Ólafur nýbúinn að skrifa undir 30 ára samning.

Ólafur er að vonum ánægður með nýja samninginn.  "Það er mér mikill heiður að fá að vera með þátt um hina Guðsútvöldu þjóð á svo útbreiddum miðli sem Stöð 2 er.  Þetta var orðið hálfþreytt á Omega, enginn peningur til, nokkrar hræður að horfa og alltaf sama tuggan.  Nú þegar Zion Vinir Ísrael hafa samþykkt að styrkja þetta Guðsútvalda dagskrárefni verður þátturinn líflegri og skemmtilegri".  

Beðið er viðbragða Omega en að endingu vildi Ólafur benda þeim á, sem sóttu um vist á samyrkjubúum í sumar, að þau geti gleymt því, þau verði öll send á Vesturbakkann til að vinna við hinn heilaga múr sem skilur að hið góða frá hinu illa.

 

Skrifstofustjóri Alþingis rukkar foreldra yngstu þingmannanna fyrir dagvistun

Skrifstofustjóri Alþingis hefur sent foreldrum yngstu þingmannanna reikning fyrir dagvistun á sumarþingi.  Um er að ræða gjald sem tekið er fyrir hvern dag sem Alþingi er við störf og mun gjaldið vera nálægt kr. 7.000 fyrir daginn.

Hjálmar Steindórsson skrifstofustjóri segir þetta lið í aukinni tekjuöflun Alþingis ásamt því að mun meiri tími starfsmanna þingsins hefur farið í að passa upp á krakkana.  "Þessa spjátrungskrakka, sem komnir eru á þing, þarf að vakta allan daginn svo þau fari sér ekki að voða.  Það er varla að maður komist í kaffi fyrir hamaganginum í þeim" segir Hjálmar.  Hjálmar segir foreldra þingamanna hafa tekið vel í þetta.  "Ég veit ekki betur en að flestir gíróseðlarnir séu greiddir sem segir mér að foreldrarnir viti við hvað er að fást hér í Alþingi".  Hjálmar benti á að viðræður stæðu yfir við Margréti Pálu og Hjallastefnuna um að hún verði með dagskrá fyrir yngstu þingmennina. "Mér skilst að þessari leikskólastefnu sé líkt við kraftaverk og ekki veitir af því hér".

Eitt foreldri þingmanns sem ekki vildi láta nafn síns getið segir sjálfsagt að greiða fyrir dagvistun sonar síns.  "Ég skil það mæta vel að Alþingi þurfi að passa upp á þessa krakka og mér líður mun betur fyrir vikið.  Í fyrsta lagi skildi ég aldrei hvers vegna sonur minn ákvað að fara í framboð og ég þarf að klípa mig fast í handlegginn á hverjum degi til þess að átta mig á því að hann fór alla leið á þing.  Hann er rétt byrjaður að raka sig drengurinn". 

 

Fjármálaráðherra vill fleiri dýralækna í fjármálageirann

Árni Mathiesen fjármálaráðherra fagnar innkomu dýralækna í fjármálageirann.  Fyrir stuttu var ráðinn nýr forstjóri Straums Burðaráss sem er dýralæknir að mennt.  Árni, sem sjálfur er með embættispróf í dýralækningum, segir innkomu dýralækna vera sen ferskan andvara í heim fjármálanna.

"Það er engin tilviljun að Straumur Burðarás valdi dýralækni til þess að stýra þessu öfluga og vandaða fjármálafyrirtæki.  Dýralæknar hafa víðtæka reynslu sem nýtist vel þegar kemur að fjármálum.  Að geta meðhöndlað yxna kýr eða fylfullar hryssur er ómetanlegt veganesti þegar kemur að því að stýra fjármálum þjóðarinnar, það þekki ég af eigin raun.  Ég hef fulla trú á að þessi ágæti dýralæknir muni hjálpa fylfullum Straumi Burðarás að kasta gullfolandi, ef þannig má að orði komast" sagði Árni hlæjandi. 

Árni íhugar jafnvel lagasetningu til þess að auðvelda dýralæknum að komast að í fjármálageiranum.  "Það er þverpólitísk samstaða hjá mér og fleiri dýralæknum um að dýralæknar eigi að fá viðskiptafræðipróf eða löggildingu sem verðbréfamiðlarar um leið og þeir ljúka embættisprófi".   

Kalli á þakinu verður í byrjunarliði Íslands í kvöld

Kalli á þakinu verður í byrjunarliði Íslands þegar það etur kappi við Svíþjóð í kvöld.  Eftir því sem best er vitað hefur Kalli ekki spilað fótboltaleik áður, hvað þá landsleik. 

Eyjólfur Sverrisson segir að nauðsynlegt hafi verið að gera róttækar breytingar á liðinu eftir jafnteflið við Liechtenstein.  "Við munum sölsa um hvað leikkerfi snertir og spila stífan varnarleik og helst ekki fara fram fyrir miðju nema í algerri neyð. Ég hef mikla trú á Kalla, enda er hann lævís mjög.  Ég féll alveg flatur fyrir þyrlutrikkinu hans á fjölskyldusýningu Ingvars Helgasonar, þótt að börnin mín hafi séð í gegnum það.  Það er einmitt þetta sem skortir í leik liðsins, meiri lævísi.

"Ég er fyrstur til að kvitta undir að síðasti leikur hafi ekki verið nógu góður, en ungur strákarnir komu frískir inn og spiluðu vel.  Á meðan ég er að tapa leikjum eða stigum á móti lélegum liðum get ég alltaf sagt að ég sé að leyfa ungum leikmönnum að spreyta sig.  Þannig tel ég öllum í trú um að ég sé alltaf að byggja upp" sagði Eyjólfur kampakátur. 

Ekki náðist í Kalla en hann mun þykjast fara með þyrlu til Stokkhólms í dag og heimildamenn segja að þetta sé allt í þykistunni.

Íslensk erfðagreining hefur fundið genin sem stjórna heilbrigðri skynsemi

Íslensk erfðagreining greindi frá því á hádegisfundi starfsfólks nú í vikunni að genin þrjú, sem stjórna heilbrigðri skynsemi, hefðu verið kortlögð af vísindamönnum félagsins í heilahvolfi mannskepnunnar.  Genin munu liggja aftarlega og út í jaðri hægra heilahvolfs.  Að sögn Ríkharðs Bastarðssonar, blaðafulltrúa félagsins, er um enn eitt skrefið á langri göngu félagsins í átt að heildarskilningi á genamengi mannsins.  Hafa genin verið nefnd Urður, Verðandi og Skítur.  Nafnbótin Skítur kemur á óvart en Urður og Verðandi munu vera svokölluð jákvæð gen á meðan Skítur er það sem kallast neikvætt gen.  Það gen vinnur gegn jákvæðu genunum og þeir sem hafa tvö neikvæð gen en aðeins eitt jákvætt eru oft sagðir vera með skítlegt eðli. 

Þegar Ríkharður var inntur eftir því hvort félagið myndi hætta starfsemi úr því að genin væru fundin og starfsmenn þess gætu nú beitt því af fullum þunga, vildi hann ekki tjá sig um það með beinum hætti en benti á að félagið væri nú sem endranær að taka óskynsamlegar ákvarðanir sem stríddu gegn heilbrigðri skynsemi.  Það væri því ótímabært að leggja það niður, það myndi stríða gegn heilbrigðri skynsemi, sagði Ríkharður í gamansömum tón.