Nýjungar í kvótakerfi boðaðar, kvóti úthlutaður á brottkast og löndun framhjá vikt

Í nýrri fréttatilkynningu sjávarútvegsráðuneytis eru boðaðar nýstárlegar breytingar á fiskveiðistjórnunarkerfinu fyrir næsta fiskveiðiár og verða nú í fyrsta skiptið úthlutaðir kvótar á brottkast og löndun framhjá vikt.  Reglur til úthlutunar eru einnig nýstárlegar en farið verður eftir veiðireynslu á áttræðingum, þilskipum og skútum á árunum 1849 til 1853.

Að sögn Odds Þörungssonar, aðstoðarskrifstofustjóra kvótadeildar sjávarútvegsráðuneytis, var löngu orðið tímabært að úthluta kvóta á brottkast og löndun framhjá vikt.  "Þessi starfsemi er orðinn snar þáttur í starfsemi útgerða í dag og því ekki úr vegi að úthluta kvóta á þessar mikilvægu stoðir núverandi kvótakerfis".  Oddur vildi lítið gefa fyrir að þessar athafnir hefðu neikvæð áhrif á stofnstærð.  "Kristján Ragnarsson fyrrverandi formaður LÍÚ skammaði starfsmenn Seðlabankans um árið fyrir að hafa ekki rétta skoðun á kvótakerfinu og ef ég væri þú myndi ég ekki vera að viðra þessa skoðun þína" sagði Oddur við blaðamann HF.

Ekki hafa fengist upplýsingar um hversu mikill kvóti verður úthlutaður til brottkasts og löndunar framhjá vikt en hann mun taka mið af því hvort ufsakvóti verði aukinn og hvort leyft verði að gefa upp veiðar á ufsa þegar í raun er verið að veiða þorsk. 

 

Rannsóknir benda til að Jesús hafi breytt vatni í Kláravín

Fornleifarannsóknir í Kanaa í Galíleu benda sterklega til þess að Jesús hafi breytt vatni í vín sem líkist mjög hinu íslenska Kláravíni.  Af gömlum vínpelum og vínkrúsum að dæma, sem fundist hafa í rústum veitingahúss í Kanaa, ásamt myndum af Jesúsi og lærisveinum hans við drykkju, hafa tyrkneskir fornleifafræðingar komist að þessari niðurstöðu.

ÁTVR hætti framleiðslu Kláravíns fyrir mörgum árum en íhugar nú að hefja framleiðsluna aftur.  "Hverjum hefði dottið í hug að Kláravínið væri heilagt eftir allt saman, eins vont og það var nú á bragðið" sagði Eiríkur Utangarðsson forstöðumaður Brenndra Vína ÁTVR.  "En það þýðir ekki að deila við dómarann í þessum efnum.  Kláravínið er heilagt og við þorum ekki öðru en að hefja framleiðslu nú þegar" sagði Eiríkur.

KR fær liðsstyrk, Sammy McIlroy mun leika með liðinu í sumar

KR hefur fengið liðsstyrk fyrir komandi leiki í fallbaráttu Landsbankadeildar.  Sammy McIlroy hefur gengið til liðs við liðið og mun leika fyrsta leik sinn í kvöld gegn Fram í Frostaskjólinu. 

KR binda miklar vonir við McIlroy, sem er afturliggjandi miðjumaður og hefur leikið fjölmarga landsleiki fyrir landslið Norður-Íra og leikið með liðum eins og Manchester United og Örgryte.  Hann leiddi landslið Norður-Íra á Heimsmeistaramótinu í knattspyrnu í Mexíkó 1986 og lék síðast með Preston North End á Englandi 1990.  Hann hefur rekið krána The Shennigans í miðborg Dublin undanfarin 14 ár. 

KR-ingar eru engu að síður mjög ánægðir með að hafa krækt í McIlroy.  "Hann kemur til með að styrkja liðið ákaflega mikið enda leikmaður sem beinlínis er hokinn af reynslu" sagði Trausti Málarason í samtali við HF.  Búist er við að McIlroy fari beint inn í byrjunarlið KR annað kvöld.

Frjálshyggjufélagið vill afnema götuvita og umferðarmerki

Frjálshyggjufélagið hefur gefið út yfirlýsingu þar sem lagt er til að götuvitar og umferðarmerki verði aflögð.  "Það er kominn tími til að ökumenn fái frelsi til þess að haga sínum akstri eins og þeir sjálfir kjósa.  Ríkisvaldið, sérstaklega Vegagerðin, á ekkert að hafa með það að segja hvernig fólk hagar sínum akstri og einstaklingurinn á að fá að njóta sín í umferðinni eins og á öðrum sviðum mannlífsins.  Félagið leggur því til að götuvitar og umferðarmerki verði aflögð með öllu og að umferðarreglur fyrnist á næstu 5 árum" segir í yfirlýsingunni. 

Maggi Yngjaldsson talsmaður FÍB vildi ekki tjá sig um málið að öðru leyti en því að hann væri ekki viss um hvort þetta yrði bifreiðaeigendum til hagsbótar.  "Ég sé kostina enda er alltaf verið að skikka bifreiðaeigendur til þess að gera hitt og þetta gegn þeirra vilja, en gallinn er kannski sá að stjórnleysi gæti myndast í umferðinni. 

Í sama streng tók blaðafulltrúi Ríkislögregluembættisins, sem ekki vildi láta nafn síns getið.  Hann var þó jákvæðari gagnvart tillögu félagsins þótt neikvæður væri.  "Umferðin er hvort sem er komin út í tómt rugl, og ég get ekki séð að ástandið geti versnað við þessa breytingu" sagði blaðafulltrúinn.

Fæðingardeild LSH flyst til Vopnafjarðar

Ákveðið hefur verið að flytja fæðingardeild LSH til Vopnafjarðar.  Er líklegt að flutningurinn muni skapa um 70 störf á Vopnafirði.

Flutningur fæðingardeildarinnar er liður stjórnvalda í að færa ríkisstofnanir á landsbyggðina.  Líkegast er að fæðingardeildin verði með aðsetur í Heilsugæslu Vopnafjarðar.  Um 3.000 börn fæðast á hverju ári á fæðingardeild LSH og er ljóst að þessi flutningur muni hleypa miklu lífi í kaupstaðinn. 

Knútur Sigfússon heilbrigðisfulltrúi Vopnafjarðar er ánægður með flutninginn.  "Það var kominn tími til að Vopnafjörður fengi starfsemi innan ríkisins.  Skattkortin fóru til Skagastrandar og Fæðingarorlofssjóður á Hvammstanga og því er ekki úr vegi að fæðingarnar verði á Vopnafirði. Hér er góður andi og íbúar Vopnafjarðar hafa ákaflega góða nærveru." 

Bush óvinsælli en fuglaflensa og svarti dauði

George Bush forseti Bandaríkjanna er nú óvinsælli en flugflensa af stofni H5N1 og svarti dauði ef marka má nýja könnun Alþjóða gjaldeyrissjóðsins.  Bush er þó heldur vinsælli en dauði. 

Þar sem vinsældir forsetans voru orðnar litlar ákvað gjaldeyrissjóðurinn að bera saman vinsældir forsetans við helstu veiru- og bakteríusjúkdóma sem herjað hafa á mannkynið.  Voru spyrjendur látnir raða í forgangsröð ýmsum sjúkdómum og Bush forseta.  Allir sjúkdómarnir fengu betri einkunn en Bandaríkjaforseti, en hann getur þó huggað sig við að hafa sigrað dauðann, a.m.k. í bili. 

Jóhann Ylfingsson forseti Vinafélags Íslands og Bandaríkjanna segir þetta mikil vonbrigði.  "Á dauða mínum átti ég von en að fólk skuli kjósa illvíga sjúkdóma framar honum er ofar mínum skilningi.  Ég er niðurbrotinn." sagði Jóhann.

Hægðatregða, garnaflækjur og slæm þarmaflóra orsakir slaks gengis KR

Í ljós hefur komið að leikmenn knattspyrnuliðs KR hafa þjáðst af garnaflækjum, hægðatregðu, ristilkrömpum og slakri þarmaflóru undanfarna mánuði.  Kom þetta fram eftir ítarlega læknisskoðun á leikmönnum liðsins í morgun eftir einn tapleikinn enn í gærkvöldi gegn HK í Kópavogi. 

 

Afrakstur sumarsins hjá KR þetta sumarið er aðeins 1 stig eftir 7 leiki og ákvað stjórn knattspyrnudeildar KR að safna leikmönnum saman nú í morgunsárið og fara með þá í heildstæða læknisrannsókn á líkama og sál .  Í ljós hefur komið að andlega eru leikmenn við tiltölulega góða heilsu en svo er ekki á líkama, sérstaklega hvað varðar meltingarveg og garnir.  "Það lá að" sagði Orri Fífilsson stjórnarmaður í knattspyrnudeild KR.  "Það má segja að gengi liðsins hafi verið í samræmi við þarmaflóru liðsins.  Nú erum við loksins komnir með skýringu á þessu slæma gengi liðsins í sumar.  Nú verða allir leikmenn látnir svolgra í sig Ristilvaka, AB mjólk og trefja, og spái ég sigri í næstu þremur leikjum, til þess að byrja með" sagði Orri.

Óðaverðbólga geisar í Hrútafirði

Gríðarleg verðbólga mælist nú í Hrútafirði.  Nú í morgunsárið mældist hún 45% sem er 10 prósentustigahækkun frá í gær og samsvarar tíföldu viðmiði Seðlabankans.

Mikil óánægja hefur ríkt í firðinum vegna launahækkana bankastjóra Seðlabankans og hafa Hrútfirðingar nú tekið höndum saman um að vinna gegn áformum bankans um að halda verðbólgu í skefjum.  Eitthvað mun vera um leynilega seðlaprentun ásamt því að lánastofnanir í firðinum hafa lækkað vexti allt niður í 1%.  Spáð er um 100% verðbólgu þegar líður á daginn sem yrði hæsta verðbólga sem mælst hefur í nokkrum firði innan OECD.

Að sögn Trausta Orrasonar hjá greiningardeild Glitnis kemur þessi þróun í Hrútafirði peningamarkaðnum á óvart en búast mætti við áframhaldandi sveiflum á gengi krónunnar.  "Gengi krónunnar hefur sveiflast, er að sveiflast og mun sveiflast" sagði Trausti en vildi ekki tjá sig um verðbólguhorfur í Hrútafirðinum, enda var hann ekki viss um hvar hann væri.

Útigangsmaður kosinn í stjórn FL Group

Útigangsmaður var kosinn í stjórn FL Group á hluthafafundi um helgina.  Maðurinn heitir Þráinn Gosason og er hann furðu losinn yfir áhuga eigenda FL Group á starfskröftum hans.  "Ég hef hvorki unnið né átt fast heimili undanfarin 24 ár, hvað þá fjárfest á hlutabréfamarkaði.  Ég hef aðeins fylgst með evrunni og dollaranum þar sem áfengisverð virðist sveiflast með gengissveiflum þessara mynta en ég fer ekki í launkofa með að mér finnst EBITDA/EV hlutfall félagsins vera heldur lágt", sagði Þráinn.

Ekki hefur náðst í stjórnendur FL Group en hlutabréfaverð félagsins hækkaði um 43% á mörkuðum í morgun þegar ákvörðunin var tilkynnt.

Kýrin Skjalda er nýr ráðuneytisstjóri landbúnaðarráðuneytis

Kýrin Skjalda hefur verið ráðin ráðuneytisstjóri í landbúnaðarráðuneyti og er þar með fyrsta kýrin sem ráðin er í íslenskt ráðuneyti.  

Skjalda er skjöldótt, svarthuppótt með stjörnu og hefur verið forystukýrin á kúabúinu Efri-Snýtu í Sælingsdal um árabil.  "Þetta gerðist mjög snöggt.  Ég var að bíta í uppáhaldshaganum mínum þegar Brandur bóndi kom aðvífandi og bar þetta upp við mig.  Mér líst ljómandi vel á landbúnaðarráðuneytið og það góða fólk sem þar starfar" sagði Skjalda himinlifandi.  Skjalda er í kálfeignarleyfi um þessar mundir en mun hefja störf í ráðuneytinu með haustinu.

Heimildamenn innan stjórnarráðsins segja að ráða eigi fleiri kýr í stjórnunarstöður.  Óánægja hefur verið meðal kúa og annarra klaufdýra hversu lítil áhrif þau hafi á stefnu landbúnaðarmála á Íslandi. "Það er þjóðarskömm hvernig við höfum haldið á málum klaufdýra á Íslandi og komi tími til að hleypa þeim til áhrifa, enda hefur mannskepnan ekki staðið sig vel í þessum málaflokki" sagði einn heimildarmaður Hinnar Fréttastofunnar.