Lúsifer Dúnhaugsson nýr formaður Mannanafnanefndar

Lúsifer Dúnhaugsson er nýr formaður Mannanafnanefndar eftir því sem kemur fram á vef Dómsmálaráðuneytisins.  Í fréttatilkynningunni segir að Lúsifer hafi víðtæka reynslu á sviði mannanafna, m.a. nefnt bæði börn sín mannanöfnun.

Lúsifer er mjög ánægður að vera kominn til starfa hjá Mannanafnanefnd.  "Nýir menn, nýjar áherslur" segir Lúsifer.  "Ég kem til með að poppa þetta svolítið upp og hleypa meira lífi í starf nefndarinnar.  Sem dæmi munum við úthluta nöfnum til fjölskyldna eftir póstnúmerum og til stendur að verðlauna fjölskyldur fyrir verstu umsóknirnar, s.s. ljótasta nafnið, fáránlegasta nafnið og kjánalegasta nafnið.  Þannig verður bætt fyrir vonbrigðin sem verða þegar nöfnum þessara fjölskyldna er hafnað". 

Þegar Lúsifer er spurður út í uppruna sinn og nafn, sem reyndar er bannað á Íslandi, segir hann að Dómsmálaráðuneytið hafi samþykkt undanþáguna.  "Það er nú bara þannig að undanþágan sannar regluna" sagði Lúsifer og bætti við, "ég reyndar fæddist á Haití, var skírður þar og er því með svarta kortið sem gefur mér færi á að vinna á Haití þegar mér þóknast svo.   Faðir minn stýrði meðal annars Mannanafnanefndinn á Haití og í hjáverkum stýrði hann hersveitunum TonTon Macoutes á Haití í stjórnartíð Jean-Claude "Baby Dog" Duvalier.  Það er góður maður og ekki síður pabbi hans, "Papa Dog" heitinn, sagði Lúsifer að lokum og ekki laust við að tár hafi blikað á hvarma.

Kristján Þór Júlíusson og Ágúst Ólafur Ágústsson nýir húsverðir Alþingishússins

Samkomulag hefur náðst hjá stjórnarflokkunum um að Kristján Þór Júlíusson og Ágúst Ólafur Ágústsson verði húsverðir Alþingishússins þetta kjörtímabil.  Mikill þrýstingur hefur verið í flokkunum að leiðtogi Sjálfstæðisflokksins í Norðausturkjördæmi og varaformaður Samfylkingarinnar fengju bitastæð embætti og að sögn heimildamanna var þrýstingurinn svo mikill að eitthvað varð að gera. 

Fylgismenn þessara tveggja þingmanna munu vera sáttir við þessa ráðstöfun en Þórhallur Reimarsson, sem gegnt hefur þessari stöðu er að vonum mjög ósáttur.  "Ég hef starfað fyrir Alþingi í 35 ár og haldið húsinu hreinu og snyrtilegu án þess að hafa heyrt eitt orð um að störf mín hafi ekki staðist væntingar þingmanna.  Nú hefur mér verið sagt upp og ég fæ ekki einu sinni að vinna uppsagnarfrestinn.  Gangi þeim vel að þrífa helgarmiguna og ælurnar á mánudagsmorgnum", sagði Þórhallur reiður í bragði.

Eftir því sem næst verður komist munu báðir þingmennirnir vera ánægðir með hlutskipti sín en Ágúst mun vera ósáttur við vaktakerfið sem notast á við en hann er skráður á næturvakt öll fjögur árin.  Sumir halda því fram að Ágúst muni jafnvel falast eftir því við Sjálfstæðisflokkinn að Kristján fái ráðherrastól fljótlega á kjörtímabilinu, til vara forsæti í mikilvægri nefnd innan þingsins, svo hann fái dagvaktina.

Eyjólfur Sverrisson enn á ný orðaður við Vestur-Samóaeyjar

Á fotboltavefnum Football Samoa er Eyjólfur Sverrisson, landsliðsþjálfari Íslands í knattspyrnu, orðaður við stöðu landsliðsþjálfara knattspyrnuliðs Vestur-Samóaeyja í Suður-Kyrrahafi.  Haft er eftir Friedrich Engels, formanni knattspyrnusambands eyjanna að liðið sé sem stendur þjálfaralaust eftir miklar hrakfarir í undankeppni Eyjaálfu fyrir síðusta heimsmeistaramót.  Eftir undankeppnina hefur reynst erfitt að skrapa í lið, eins og Friedrich orðar það, en að það standi til bóta þegar nýr þjálfari komi til starfa. 

Friedrich nefnir að knattspyrnusambandið hafi um hríð reynt að laða að sér þjálfara liðs sem hefur átt afleitu gengi að fagna á undanförnum misserum og fengið á sig mörg mörk.  Eyjólfur uppfylli þetta skilyrði með sóma og því komi hann sterklega til greina.  Eftir glæsilegan sigur íslenska liðsins á Norður-Írum á útivelli í fyrsta leik undankeppni Evrópumótsins hefur mjög svo syrt í álinn og ekki unnist leikur.  Nú síðast jafntefli við Liechtenstein hefur enn aukið líkurnar á að Eyjólfur skipti um vinnuveitanda fyrr en varir. 

Landslið Vestur-Samóaeyja hefur einungis unnið 3 leiki á síðastliðnum 10 árum og markatalan er verri en orð fá lýst.  Friedrich vonar að úrslit Íslendinga í leiknum við Svíþjóð verði liðinu enn óhagstæðari.  "Við höfum einungis áhuga á þjálfara sem hefur tapað mörgum leikjum og er að niðurlotum kominn.  Það er í takt við mannskapinn okkar og frammistöðu undanfarin ár", sagði Friedrich.

Þjóðkirkjan afturkallar leyfi til hjónavígslu rauðhærðra

Samkvæmt nýrri yfirlýsingu Þjóðkirkjunnar, sem gefin verður út á Þrenningarhátíð sunnudaginn 3. júní,  verður leyfi til hjónavígslu rauðhærðs fólks afturkallað.  Ekki kemur fram í hve langan tíma afturköllunin mun gilda en heimildamenn segja að hún muni gilda a.m.k. í nokkra áratugi. 

Í yfirlýsingunni segir ennfremur.  "“Það er mikilvægt kristnu samfélagi að við sýnum hvert öðru virðingu og umhyggju, þolinmæði og umburðarlyndi. Við skulum stuðla að opnu og umburðarlyndu samfélagi og hlusta á sögu og reynslu fólks af virðingu og kærleika. Við hvetjum til virðingar fyrir fólki og lífsmáta þess og vali og andmælum hvers konar fordómum. Eins vísum við á bug andúð gegn rauðhærðum sem rökstuddar eru með biblíulegum eða kristilegum rökum og leggja þungar byrðar á fólk. Við hvetjum til opinskárrar samræðu og málefnalegra skoðanaskipta án hvers kyns ögrana og öfga.  Rauðhærðir eru sem aðrir umluktir náð og fyrirgefningu Jesú Krists, og eiga á grundvelli skírnar sinnar og trúar sjálfsagðan sess í kristnu samfélagi um orð Guðs og borð, en það kemur ekki til greina að vígja þá til hjónavígslu.  Á það eingöngu við um þá sem eru fæddir rauðhærðir.  Þær vígslur sem þegar hafa farið fram þar sem a.m.k. annað Guðsbarnið er rauðhært verða felldar úr gildi nú þegar, nema um sé að ræða prestvígðan einstakling".

Í viðtölum við rauðhærða einstaklinga kemur fram að þeir eru forundran yfir afstöðu kirkjunnar.  "Ég veit ekki hvað háralitur kemur kirkjunni við eða hvaða áhrif það hefur á rétt minn til að giftast" sagði rauðhærður maður sem ekki vildi láta nafn síns getið.  Kona á þrítugsaldri, sem undanfarnar vikur hefur verið að skipuleggja brúðkaup sitt sagði þetta reiðarslag.  "Þessir menn eru út á túni" sagði konan og sagðist enn vera að átta sig á aðstæðum.

Sonarsonur Mussolini til Íslands í boði Ríkislögreglustjóra

Guido Mussolini, sonarsonur Benito Mussolini, ítalska einræðisherrans sem ríkti á Ítalíu á árunum 1922 - 1943, er væntanlegur til Íslands um miðjan júní í boði Ríkislögreglustjóra.  Guido mun dvelja hér í 3 daga og skoða starfsemi Ríkislögreglustjóra ásamt því að halda tvo fyrirlestra um lögregluríkið í fortíð og nútíð.

Í fréttatilkynningu frá Ríkislögreglustjóra kemur fram að koma Mussolini sé Íslandi til mikils gagns og fróðleiks. "Guido Mussolini er afkomandi hins mikla Benitos Mussolini í beinan karllegg og lögregluríki er því honum í blóð borið.  Það er ótakmarkaður heiður að fá að njóta nærveru afkomanda hins mikla leiðtoga sem ber af öðrum leiðtogum 20. aldarinnar eins og gull af eiri" segir ennfremur í tilkynningunni.

Reykjalundur kaupir í sænskum afleiðubanka

Reykjalundur í Mosfellsbæ hefur fest kaup á 40% hlut í sænska afleiðubankanum Svenska Enskilda Banken í Stokkhólmi.  Bankinn, sem er stærstur sinnar tegundar á Norðurlöndum, sérhæfir sig í flóknum afleiðuafurðum fyrir stærri fyrirtæki og þjóðríki. 

Að sögn Guðmundar Snæland, framkvæmdastjóra fjárfestingasviðs Reykjalundar, er um stóra fjárfestingu að ræða, en kaupverðið var ekki gefið upp.  Að sögn heimldamanna er fjárfestingin á bilinu 12-16 milljarðar króna.  Húsfélagið Asparfelli 10 og Rauði Krossinn á Íslandi voru Reykjalundi innan handar og fjármögnuðu kaupin fyrir hönd Reykjalundar. 

Guðmundur sagði að einn sjúklingurinn hefði séð frétt þess efnis að stór hlutur í bankanum væri falur og benti yfirhjúkrunarfræðingi á að þarna gæti verið á ferð góður fjárfestingakostur.  Í stað þess að auka lyfjaskammt sjúklingsins hafi hjúkrunarfræðingurinn ákveðið að hlusta á sjúklinginn og heyra rök hans fyrir kaupunum og litist vel á, enda EBITDA og DUBBIDU hlutföllin einkar hagfelld.  "Við erum stofnun sem tekur skjótar ákvarðanir og við stukkum á þetta þrátt fyrir að við höfum aldrei komið að bankarekstri áður eða vitum yfir höfuð hvað afleiður eru" sagði Guðmundur. Þegar Guðmundur var spurður hvort yfirtökuskylda hefði myndast með þessum kaupum sagði Guðmundur að veðurspáin væri nokkuð góð fram yfir helgi en að þykkna myndi upp strax á mánudaginn.

Sjúklingurinn sem um ræðir heitir Jósep Hagdal, jánsmiður frá Efra Nesi í Fljótum.  Hann sagðist hafa rekist á fréttina af helberri tilviljun á fótasnyrtistofu sem hann heimsækir reglulega. ´"Ég get ekki sagt að ég sé mikill fjármálamaður", sagði Jósep og bar fyrir sig minnisleysi þegar hann var spurður nánar út í fjárfestingarkostinn.

Hundurinn Sesar útskrifast úr sama háskóla og Dick Cheney

Hundurinn Sesar hefur útskrifast úr háskólanum í Wisconsin, en einn af frægustu nemendum hans var Dick Cheney, varaforseti Bandaríkjanna.  Sesar lauk BA prófi í mannfræði og heimspeki.  Sesar þótti ágætur námshundur en kröfur til nemenda munu ekki vera miklar við skólann.

Jeffrey Dahmer skólastjóri háskólans í Wisconsin sagði þetta mikil tímamót fyrir skólann.  "Nú, þegar Sesar hefur rutt brautina fyrir önnur dýr opnast mikil sóknarfæri fyrir fleiri dýr að stunda nám við skólann, s.s. ketti, páfagauka og naggrísi", sagði Jeffrey.  Jeffrey sagði það gefa skólanum mikla tekjumöguleika til framtíðar. 

Sesar var sallarólegur þegar hann tók við prófskírteini sínu enda nýbúinn að klára dýrindis pizzusneið með nautahakki.  Eigandi Sesars, Gunnar Jóakimsson var að vonum ánægður með hundinn sinn.  "Ég fékk vinnu í Wisconsin og prófaði af rælni að innrita hann í skólann.  Ekki aðeins tókst það, heldur hefur Sesar klárað námið með miklum sóma" sagði Gunnar og bætti við að þetta hafi ekki verið ókeypis fyrir fjölskylduna.  Sesar mun skulda eins og skrattinn vegna námsins, en námslán hans munu nema um 12 milljónum króna.

Liðsmenn Spaugstofunnar stoppaðir upp

RÚV hefur samið við Sigurbjörn Tringsted uppstoppara um að stoppa upp liðsmenn Spaugstofunnar.  Samningurinn nær til allra leikara í þáttunum vinsælu, kvikmyndatökufólks og leikbúningahönnuða.  Áætlað er að verkinu muni ljúka fyrir jól, og er ætlunin að uppstoppað Spaugstofufólk verði til sýnis í Perslunni yfir jólahátíðina.  Eftir jólin verður það sett á Víkingasafnið á sama stað.

Sigurbjörn er að vonum ánægður með samninginn en óttast að ekki hafi verið leitað samþykkis hjá öllu því fólki sem á að stoppa upp.  "Það eina sem ég óttast er að ná fólkinu inn á vinnustofuna mína en RÚV hefur lofað mér Víkingasveitinni ef þess þarf" sagði Sigurbjörn.  Sigurbjörn hefur fest kaup á sérstökum tækjabúnaði sem sniðinn er að uppstoppun á fólki og einnig hefur hann komið fyrir stórum blóðstoppurum á vinnustofu sinni.  "Ég hlakka mikið til að fást við þetta stóra verkefni.  Ég hef ekki stoppað upp fólk áður fyrir utan hana ömmu mína sem ég stoppaði upp í sveinsprófinu mínu", sagði Sigurbjörn að lokum.

Impregilo styrkir Hött á Egilsstöðum með aftökum

Verktakafyrirtækið Impregilo mun styrkja körfuknattleikslið Hattar á vetri komanda.  Styrkurinn mun felast í því að taka af lífi bestu leikmenn annarra liða í deildinni.   

"Impregilo er stórfyrirtæki sem þekur flest svið atvinnurekstrar.  Leigumorð er svið innan Impregilo sem við hyggjumst færa Hetti í nyt, en sviðið er með heimilisfesti í Sómalíu", sagði Luca Toni yfirmaður íþrótta- og tómstundasviðs Impregilo.  Hann fullyrðir ennfremur að starfsmenn sviðsins sæti góðri meðferð, séu á sómasamlegum launum, og að félagið greiði öll launatengd gjöld.  "Með þessu viljum við láta gott af okkur leiða fyrir samfélagið hér á Austfjörðum", sagði Luca.

Höttur stefnir hátt á næstu leiktíð og hyggst tryggja sér sæti í úrvalsdeild á næsta ári.  "Við erum mjög ánægðir með þennan samning og erum þess fullvissir að hann fleyti okkur í úrvalsdeildina á næsta ári" sagði Wiktor Wassanukapoulos formaður meistaraflokksráðs Hattar, en vildi láta þess getið að allir vonuðu að Höttur spilaði sem best svo ekki yrði mikið blóðbaðið.

Höfn á Selfossi verður miðstöð skipaflutninga

Í nýrri stefnumótun Hafnasambands Íslands kemur fram að Selfoss verði miðstöð skipaflutninga á Íslandi.  Nú þegar er bygging nýrrar hafnar hafin og er gert ráð fyrir að henni ljúki á næsta ári.

Að sögn Rígs Ragnarssonar framkvæmdastjóra stefnumótunarsviðs Hafnasambands Íslands varð Selfoss fyrir valinu vegna hagstæðrar veðráttu, góðrar miðlægrar staðsetningar, góðra samgangna og ekki síst góðs lundarfars bæjarbúa.  "Mér er ljúft og skylt að tilkynna að Selfoss hefur orðið fyrir valinu sem miðstöð skiptaflutninga á Íslandi.  Á Selfossi verður stærsta höfn landsins og ein sú stærsta í Evrópu", sagði Rígur, sem er borinn og barnfæddur Selfyssingur.  Mun bróðir hans, Runólfur, verða aðalverktaki en framkvæmdin var boðin út innan fjölskyldu Rígs.

Þegar Rígur var spurður að því hvers vegna bæjarfélag, sem ekki á land að sjó, hefði orðið fyrir valinu sagði Rígur það jú mikla áskorun.  "Það er tæknilegt vandamál sem hægt er leysa, öll vandamál eru til þess að leysa þau" sagði Rígur.