Kaupþing hættir við kaup á vítamínbættum salernispappír

Kaupþing hefur horfið frá magnkaupum á vítamínbættum Aloe Vera salernispappír frá Lotus fyrir starfsstöðvar fyrirtækisins.  Um er að ræða salernispappír sem inniheldur E-vítamín ásamt jurtinni Aloe Vera, sem gerir pappírinn einstaklega mjúkan. 

Slæmu ástandi á fjármálamörkuðum er kennt um, en að sögn Sváfnis Gróða Gengissonar innkaupastjóra aðfanga Kaupþings er ekki um að ræða kröfu frá Fjármálaleftirlitinu um að hætta við kaupin heldur einungis markaðsaðstæður.  "Kaupþing hefur ennþá mikla trú á þessum salernispappír en um stund verða starfsmenn bankans að sætta sig við gamla harða pappírinn sem sker og rýfur". 

Gengi félagsins hækkaði á mörkuðum í morgun og lánshæfisfyrirtækið Moody Blues hækkaði lánshæfismat bankans úr FREKAR DAPURT í SKÍTSÆMILEGT.

Námskeið í kraftaverkum

Námsflokkar Reykjavíkur munu bjóða upp á námskeið í kraftaverkum á hausti komanda.  Er þetta í fyrsta skiptið, svo vitað sé, að boðið sé upp á námskeið í kraftaverkum en námskeiðið mun vera í boði yfir vetrarmánuðina og vera í tveimur áföngum. 

Á fyrra námskeiðinu, sem kennt verður fram að áramótum verður farið yfir grundvallaratriðin í sköpun kraftaverka, hvernig staðið skuli að kraftaverkinu og það framkvæmt.  Í seinni áfanganum verða þátttakendur búnir undir afleiðingar kraftaverkanna, bæði á mannkynið í heild sinni og hvernig meðhöndla eigi persónulegt líf sitt að loknu kraftaverki. 

Leiðbeinandi á námskeiðinu verður Ingemar Tringholm, en samkvæmt kynningu Námsflokkanna á námskeiðinu hefur Ingemar unnið ýmis kraftaverk á undanförnum árum, s.s. látið sólina koma upp mun austar en venja er, endurlífgað sænskan fjallaelg sem látist hafði úr hjartabilun, og búið til tannstöngul úr farsíma.

Þátttökugjald er 120.000 sænskar krónur og skal það greitt með órekjanlegum seðlum beint til Ingemar í upphafi námskeiðsins.

Krossinn og Ásatrúarfélagið sameinast

 

 

Samkvæmt áreiðanlegum heimildum HF munu Krossinn og Ásatrúarfélagið sameinast um næstu helgi.  Leynilegar viðræður hafa staðið yfir á milli félaganna frá í vor en erfitt hefur reynst að búa til málefnaskrá nýs trúfélags sem mun heita Ásakross Trúfélag ehf.  Einnig hefur ekki verið einhugur um hvort stofna eigi einkahlutafélag um rekstur trúfélagsins og hvort skrá eigi félagið á hlutabréfamarkað.

Þór Fennrisson hjá Ásatrúarfélaginu vildi ekki tjá sig um innihald viðræðnanna en vildi nefna að auðvitað væri erfitt fyrir söfnuð sem afneitar Kristi að ná saman með söfnuði sem sæi Krist í öllum sköpuðum hlutum.  "Hvort sem það var Kristur eða Óðinn sem rúlaði hér áður fyrr þá er þetta hér um bil sama tóbakið, aðeins blæbrigðamunur, ekki eðlismunur.  Kröfur nútímans eru hagræðing og samlegðaráhrif og sauðir þessara tveggja hjarða eru allir með sama upplagið". 

Ekki náðist í neinn hjá Krossinum vegna sumarhátíðar safnaðarins í Valhöll.

 

Tinni afar ósáttur við umræðu um kynþáttafordóma

Tinni er afar ósáttur við umræðu um að kynþáttafordóma séu að finna í einni bókanna um ævintýri Tinna, Tinni í Kongó.  Tinni, sem búsettur er í Los Angeles og hélt upp á sextugsafmæli sitt um síðustu helgi, settist í helgan stein fyrir um 25 árum síðan.  Góðvinur hans, hundurinn Tobbi, er löngu látinn og Kolbeinn kafteinn, sem glímt hefur við Bakkus í áraraðir, er langt leiddur af lifrarbólgu og sykursýki og missti skipstjórnarréttindi sín fyrir 8 árum þegar hann sigldi báti sínum Whiskey in The Jar upp í land.

"Það er rakalaus þvættingur að segja að ég og aðrir þeir sem tengjast ævintýrum mínum séu fullir af kynþáttafordómum.  Ævintýri mitt í Kongó átti sér stað með hópi virðulegs blökkufólks á þessum slóðum og það er helber lygi að ætla mér, eða öðrum mér tengdum á þessum tíma, kynþáttafordóma í garð þessa fólks" sagði Tinni, sem undanfarin misseri hefur verið í tygjum við blökkukonuna Donnu Summer.   Tinni kannar nú hvort grundvöllur sé fyrir málshöfðun á hendur breska ríkinu, en breskt ráð um kynþáttajafnrétti komst að þeirri niðurstöðu að kynþáttafordóma væri að finna í bókinni.

Ristruflanir algengastar í Vatikaninu

Samkvæmt nýrri rannsókn alþjóða heilbrigðismálastofnunarinnar WHO munu ristruflanir vera algengastar í Vatikaninu.  Rannsóknin náði til allra landa Sameinuðu þjóðanna og var úrtakið alls 30.000 karlar á aldrinum 40-70 ára.  Í niðurstöðu könnunarinnar kemur fram að ristruflana gætir hjá 9 af hverjum 10 karlmönnum í Vatikaninu en til samanburðar gætir ristruflana hjá 5 af hverjum 10 karlmönnum á Íslandi.  

Að sögn talsmanns Vatikansins á Íslandi, hins Heilaga Sankti Petrus Benedictus Dominus, kemur þetta páfanum ekki á óvart.  "Hans Heilagleiki hefur grunað þetta í langan tíma enda eru íbúar Vatikansins langflestir karlmenn og ekki nema ríflega 800 talsins.  Það er ekki beinlínis kynörvandi að horfa alltaf framan í sömu karlmennina, en þetta er samt sem áður hlutfall sem við sættum okkur ekki við" sagði HSPBD.

Vatikanið hyggst grípa til róttækra aðgerða til þess að sporna við þessari þróun og munu karlkyns þegnar þess fara nú þegar í viðtalsmeðferð, sprautur, töflukúr og ef allt um þrýtur munu reðurdælur og -stólpar verða innleiddir í smáríkinu.

Hafnir og Pyongyang verða vinabæir

Nú undir hádegið að íslenskum tíma undirrituðu bæjarstjóri Hafna og borgarstjóri Pyongyang undir vinabæjasamning.  Samkvæmt samningnum verður samstarf bæjarfélaganna mjög víðtækt, helst á sviði hernaðar.

Að sögn Sigmundar Spóasonar er um að ræða tímamótasamning fyrir íbúa Hafna.  "Þessi samningur mun hafa mikil og djúp áhrif á daglegt líf íbúa Hafna.  Það var ljóst um leið og varnarliðið fór af landi brott að Hafnir þyrftu að endurskoða varnarmál sín frá grunni og það lá í augum uppi að leita fyrst til Norður-Kóreumanna og Pyongyang búa" sagði Sigmundur. 

Í kjölfarið af undirritun vinabæjasamningins var um leið handsalaður samningur um sölu Pyongyang borgar á 30 ára sovéskum hátæknivopnum til Hafna sem notuð munu verða til þess að verja bæinn gegn ágangi nágrannasveitarfélaga og annarra óvina.  Hafnir munu greiða fyrir vopnin með fótanuddtækjum, Sinclair Spectrum tölvum og svokölluðum skemmturum, þ.e. rafmagnsorgelum  sem bjóða upp á ýmsa taktfasta trommutakta s.s. rúmbu og cha cha cha.   Einnig munu íbúar Hafna á aldrinum 18-22 ára fara til Pyongyang til þess að gegna 15 ára herþjónustu. 

Þrír hundar kaupa ráðandi hlut í Húsdýragarðinum

Hundarnir Ragnar, Sigmar og Jónas Trýnusynir hafa keypt ráðandi hlut í Húsdýragarðinum í Laugardal af Reykjavíkurborg.  Er salan hluti af einkavæðingu ýmissa stofnana innan Reykjavíkurborgar en ný stefnumörkun borgaryfirvalda frá í vor gerir ráð fyrir að ýmsar eigur og stofnanir hennar verði einkavæddar, s.s. tjörnin og útitaflið við Lækjartorg.

Hundarnir hafa á undanförnum árum rekið útgerð á Þingeyri og seldu þeir kvóta útgerðarinnar í vor, alls 140 þorskígildistonn og hafa þeir verið að svipast um eftir nýjum fjárfestingarmöguleikum.  "Þetta eru spennandi tímar hjá Húsdýragarðinum og við hugsum þessa fjárfestingu til lengri tíma.  Við getum jafnvel hugsað okkur að búa í garðinum hluta úr ári" sagði Sigmar í viðtali við HF, en kaupverð var ekki gefið upp.

Reykjavíkurborg heldur ennþá um fjórðungshlut í garðinum.  "Það er skemmtileg tilviljun að það eru dýr sem kaupa ráðandi hlut í garðinum og hafa flest dýrin í garðinum lýst yfir ánægju með nýju eigendurna.  Það eru helst kettirnir sem hafa sýnt þessari eignarhaldsbreytingu fálæti" sagði Hugrún Viftudóttir lestarstjóri Húsdýragarðsins. 

KF Nörd komið upp fyrir Ísland á heimslista FIFA

Með sigri sínum á sænsku nördunum skutust íslensku nördarnir, KF Nörd, upp fyrir íslenska landsliðið í knattspyrnu á heimslista knattspyrnulandsliða FIFA.  Íslenska landsliðið vermir þessa stundina 14896. sæti listans en KF Nörd er nú í 14745-7. sæti ásamt Svalbarða og Latabæ.

Hilmir Rófuson blaðafulltrúi KF Nörd er afar ánægður með stöðu liðsins.  "Þetta er framar okkar vonum, en það var svo sem ekki úr háum söðli að falla fyrir íslenska landsliðið.  Þeir hafa ekkert getað undanfarið og við getum a.m.k. skorað mörk.  Við stefnum ótrauðir áfram" sagði Hilmir, en næst leikur liðið við úrvalslið Ísaksskóla.

Í fréttatilkynningu sem KSÍ gaf út í kjölfar útgáfu FIFA listans kemur fram að sambandið hafi kært stigaútreikning FIFA, enda telur KSÍ að íslenska landsliðið hafi náð mun betri árangri en stigagjöfin gefi til kynna.  Sem dæmi hafi íslenska landsliðið sigrað 2-1 lið Austur-Þjóðverja 1975 og lið Nígeríu 3-0 í vináttuleik 1981. 

Bjarni Guðjónsson og Guðjón Þórðarson í opinbera heimsókn til Nígeríu

Bjarni Guðjónsson og Guðjón Þórðarson hafa verið boðnir í opinbera heimsókn til Nígeríu.  Nígerísk stjórnvöld hafa fylgst náið með máli Bjarna í fjölmiðlum undanfarið, en eins og alþjóð veit skoraði Bjarni mark hjá Keflvíkingum eftir að Keflvíkingar spyrntu boltanum af velli svo hægt hefði verið að hlúa að særðum Skagamanni. 

Nígeríumenn hafa um árabil haft sérstakan áhuga á íþróttamönnum sem ekki hafa sýnt háttvísi í íþrótt sinni og boðið þeim að halda fyrirlestra í háskólum landsins og fyrirtækjum, sérstaklega fyrirtækjum sem sérhæfa sig í að svíkja fjármuni frá fólki með lygabréfum og símtölum. 

Páll Babangida ræðismaður Nígeríu á Íslandi staðfesti boð nígerískra stjónvalda til Bjarna og Guðjóns og sagði að nígeríska þjóðin biði í ofvæni eftir þeim feðgum.  "Guðjón hefur marga fjöruna sopið og víða skilið eftir sig sviðna jörð, og drengurinn hans er að stíga sín fyrstu skref.  Það stóð alltaf til að bjóða Guðjóni eftir að hann skildi við Keflvíkinga um árið en nú skapast tækifæri til þess að bjóða tveimur úr sömu fjölskyldu sem við ætlum ekki að láta framhjá okkur fara" sagði Páll. 

Áætlað er að Bjarni og Guðjón fari ekki til Nígeríu fyrr en um verslunarmannahelgina, en Bjarni mun þurfa að fara í augnaðgerð í millitíðinni til þess að laga sérstaka tegund sjónskekkju og gláku sem leggst eingöngu á Skagamenn og leiðir af sér ónákvæmar spyrnur Skagamanna til Keflvíkinga þegar Keflvíkingur hefur spyrnt útaf vegna slasaðs Skagamanns.  Þessir kvillar hafa engin áhrif á auka- og vítaspyrnur.

Námskeið í lífsleikni vinsæl hjá íslenskum útgerðarmönnum

Stjórnendur íslenskra útgerða flykkjast nú á námskeið í lífsleikni sem haldin eru á sérstökum sumarnámskeiðum í grunnskólum landsins.  Hafa námskeiðin vakið slíka lukku að grunnskólarnir anna ekki eftirspurn, uppselt er á öll námskeiðin og biðlistar langir.  Eru jafnvel dæmi þess að sumir útgerðarmenn séu að fara oftar en einu sinni. 

Námskeiðin felast fyrst og fremst í því að örva tilfinningagreind og auka félagslega og persónulega hæfni nemenda til þess að þekkja sjálfan sig.  Lífsleikni er sögð samanstanda af sálfræðivísindum, félagsvísindum, taugafræði og líffræði.  Kjarni lífsleikni mun vera sá að greindarvísitala ráði ekki fararheill okkar og hafi mun minna vægi en álitið hefur verið hingað til.  Tilfinningagreind, sem tengja má skapstillingu, samúð með öðrum og félagslegri ábyrgð, er vanmetinn þáttur í lífshamingju okkar.  Markmið námskeiðanna er að nemendurnir láti ekki undan skyndihvötum og hafi hemil á hugsunum sínum svo þær leiði ekki til heimskulegra athafna.