Bleikur reykur úr kapellunni

Bleikt reykjarkóf barst nú í morgun úr strompi Sixtinskukapellunar í Vatikaninu um kl 6:45 í morgun, sem þýðir að vínið sé að verða búið og að það vanti smokka.  Mun vera standandi tókapartý hjá kardínálunum í kapellunni og mikið um dýrðir.  Engar upplýsingar hafa borist um páfakjörið og einu upplýsingar sem berast eru reykmerkin.  Hvítur reykur þýðir að nýr páfi hefur verið kjörinn, en jafnan þýðir bleikur reykur að nokkuð langt sé í kjörið og að klára þurfi partýið áður en að því kemur.

For beint frá býli

Tvö bóndabýli á Íslandi, Ingunnarstaðir í Reykhólahreppi og Brúárreykir í Borgarfirði, bjóða nú upp á for beint frá býli.  Er um að ræða markaðsátak sem stutt er af Bændasamtökunum en bændur hafa lengi reynt að markaðssetja uppsafnaða for beint til neytenda í stað þess að selja hana í gegnum afurðastöðvar og aðra milliliði.  

Samtökin "Skítur beint frá býli er ekki skítt", sem stofnuð voru af nokkrum bændum sem eiga mikið af uppsafnaðri for, hafa einnig haft sig mikið í frammi að undanförnu við að koma for sinni á framfæri og hafa meðal annars dreift myndum til fréttamiðla af "úrvalsfor", eins og segir í texta með myndunum.  Viðbrögð neytenda hafa til þessa verið afar fáleg.

Fá greitt fyrir maka

 Atvinnuvega- og nýsköpunarráðuneytið hefur staðfest úthlutunarreglur vegna aðstoðar Bjargráðasjóðs við bændur sem eru illa fyrir kallaðir og vilja losna við maka sína.  Kemur fram í reglunum að beint tjón af m.a. "tuðandi kellingartuðrum" og "grútskítugum og illa lyktandi karlskörfum" verði bætt ásamt ýmsu óbeinu tjóni sem hlýst af slíku fólki eins og almennum leiðindum og húmorsleysi, eins og segir orðrétt í reglunum.  Fá bændur 7 þúsund krónur fyrir makann ef hann er kona en 3 þúsund krónur ef hann er karl. 

Hefur gert allt

Kristín Erlendsdóttir á Blönduósi hefur gert allt sem hægt er að gera.  Hennar síðasta verk til að klára allt var að starfa sem útkastari á jólafylleríi húnvetnskra frímúrara í Húnaveri en Kristín hefur undanfarin tíu ár helgað lífi sínu að gera allt.  "Þetta hefur gengið furðu vel en ég hef lent í fjölmörgum ævintýrum.  Ég myndi segja að erfiðast hefði verið að vera ritari á Prestaþingi en léttast að vera umhverfisráðherra.  Það sem stendur upp úr var starf mitt sem fylgdarkona á Landsmóti hestamanna í sumar.  Ég vissi ekki að eigendur stóðhrossa væru sjálfir svona duglegir að stóðast"  sagði Kristín, sem sagði að lokum að nú tæki við gamla rútínan, að kenna þyngdarskammtafræði í grunnskólanum á Blönduósi.

Rigning á Stökustað í kvöld

Veðurstofan hefur gefið út úrkomuviðvörun fyrir Vestfirði í dag.  Þurrt að kalla verður fram eftir degi en í kvöld er búist við rigningu á Stökustað.  Einnig verður úrkoma í grennd.

Bush sigraði í Florida

Samkvæmt lokatölum forsetakosninganna í Flórída fylki, sem birtar voru rétt í þessu, hefur George W. Bush sigrað með 49% atkvæða og bróðir hans Jeb Bush er í öðru sæti með 64% atkvæða.  Kalli kanína er í þriðja sæti og Framsóknarflokkurinn í því fjórða.

Fæðingardeildin innkallar Þór Saari

Fæðingardeild Landsspítalans hefur innkallað Þór Saari vegna orða hans um íslenskan ferðaiðnað.  Sagði Þór að ekki væri hægt að þverfóta á helstu ferðamannastöðum landsins eða kaffihúsum miðborgar Reykjavíkur vegna ágangs ferðamanna.

Hjörður Hannesson yfirlæknir á fæðingardeild Landsspítala sagði í viðtali við fréttastofuna að læknar fæðingardeildarinnar þurfi að koma vitinu fyrir Þór og þess vegna hafi hann verið innkallaður.  "Við ætlum aðeins að krukka í honum og reyna að laga það sem aflaga hefur farið.  Hann gæti steypt heilt einbýlishús með steypunni sinni." sagði Hjörtur.

Jesús steggjaður?

Fundist hefur texti á pappírssnifsi í sandöldum Mesópótamíu sem benda til þess að Jesús hafi verið steggjaður af vinum sínum stuttu fyrir brúðkaup sitt.  Textinn, sem skrifaður er í sanskrít, gefur til kynna að lærisveinar Jesús hafi farið með hann á karaoke-bar þar sem hann mun hafa sungið lag sem heitir "My way" og kneifað áfengt jólaöl af miklum móð.  Stendur á pappírssnifsinu "Eftir að hafa sungið My way hellti Jesús í sig jólaölinu...."  "Jólaölið var þá aftur hellt í drykkjarkönnur og.... ", "...og enn var beðið eftir magadansmeyjunum og -strákunum..." og ".. en eru ekki allir í stuði?". 

Vísindamenn telja pappírssnifsin ekki óyggjandi sönnun þess að Jesús hafi verið giftur, en telja líklegt að hann hafi skemmt sér vel þetta kvöld.

Tekjublað leikskólakennara komið út

Tekjublað leikskólakennara er komið út og verður í sölu eins lengi og blaðið selst.  Skattadrottning leikskólakennara er Guðríður Hannesdóttir kennari á leikskólanum á Borðeyri, með um 330.000 í launatekjur á mánuði, en þar af eru um 50.000 í dúntekjur.  Lægstu tekjurnar hefur Sigríður Jónasdóttir leikskólakennari í Aldreilandi í Ölfusi, með um 120.000 krónur í mánaðarlaun að meðaltali á síðasta ári, en Sigríður er sjálfskvalari og finnst lífið vera einn stór brandari.

Hryggbrotinn ferðamaður sóttur á hálendið

Breskur ferðamaður var í dag sóttur á Hveravelli eftir að hafa verið hryggbrotinn af unnustu sinni.  Mun breski ferðamaðurinn hafa borið upp bónorð í anddyri skálans þegar unnusta hans brást ókvæða við, harðneitaði og löðrungaði manninn.  Var maðurinn óhuggandi í kjölfarið og brugðu skálaverðir á það ráð að fá þyrlu Landhelgisgæslunnar til að ná í hann.  Líðan hans er eftir atvikum.