Starf dómsmálaráðherra auglýst til umsóknar

Starf dómsmálaráðherra verður auglýst til umsóknar að sögn Hreggviðs Baldurssonar réttargæslumanns í Grindavík.  Hreggviður segir að starfið verði auglýst fljótlega eftir áramót og að nýr dómsmálaráðherra taki við völdum 1. apríl.

Hreggviður segist lengi hafa haft áhuga á að auglýsa starfið.  "Mér finnst að jafnt eigi yfir alla að ganga.  Starf dómsmálaráðherra þarf að auglýsa eins og önnur opinber störf" sagði Hreggviður.  Hreggviður, sem hyggst auglýsa einungis í Fréttablaðinu, segist vera að falast eftir duglegum og jákvæðum ráðherra, sem ekki hafi sérstaka óbeit á einstökum fyrirtækjum eða einstaklingum.  "Ég er með einfaldan smekk." sagði Hreggviður að lokum.

Hvítrússnesk feðgin í stjórn FL Group

Hvítrússnesku feðginin Grigorz Jutschenko og Ludmila Jutschenko hafa verið kosin í stjórn FL Group. 

Félagið er um það bil að fara af markaði og í fréttatilkynningu FL Group eru Grigorz og Ludmila tekin inn í stjórnina núna til þess að styrkja innviði félagsins.  "FL Group hefur verið að selja í félögum sem ekki lúta að fjárfestingarstefnu FL Group og þess vegna munu Grigorz og Ludmila styrkja innviði félagsins mikið.  Þau eru gamalreyndir fjárfestar og eru sérfræðingar í að finna arðvænleg fjárfestingartækifæri í óskráðum eignum sem fellur sérlega vel að fjárfestingarstefnu félagsins"

Lalli Johns kominn í Val

 

Lalli Johns hefur ákveðið að ganga til liðs við Valsmenn, en þeir hafa aðeins sótt einn sigur í fyrstu þremur leikjum Landsbankadeildarinnar.  Væntanlega verður Lalli liðinu gríðarlegur styrkur í komandi leikjum í deildinni.

Ekki er vitað hvaða stöðu Lalli á að leika en líklegt þykir að hann muni þurfa að binda saman vörn Valsliðsins, sem hefur verið hriplek það sem af er móts.  Lalli sagði í samtali við fréttastofu að hann væri undrandi en spenntur.  "Ég get ekki sagt að ég sé í góðu formi en vörnin hjá þeim er hriplek og ég er spenntur fyrir öllu sem lekur." 

Glitnir segir upp starfsmönnum Landsbankans

Uppsögnum Glitnis virðast engin mörk sett.  Samkvæmt heimildum fréttastofu hefur Glitnir sent uppsagnarbréf til nokkurra starfsmanna Landsbankans, sem allir munu starfa í greiningardeild.  Taka uppsagnirnar gildi nú þegar.  Er það í fyrsta skiptið sem einn banki segir upp fólki í öðrum banka.

Starfsmaður Landsbankans, sem ekki vill gefa upp nafn sitt af ótta við að fá uppsagnarbréf frá fleiri bönkum, segir þetta reiðarslag fyrir sig og fjölskyldu sína.  "Ég var búinn að starfa í 18 ár hjá Landsbankanum og unnið eins og skepna.  Ég vona að ég fái ekki fleiri uppsagnarbréf".

Lárpera Línus, fulltrúi starfsmannastjóra Glitnis segir að nauðsynlegt sé að hamra járnið á meðan það sé heitt.  "Við höfðum frétt að það væri kominn tími á þessa starfsmenn og því ekki að senda þeim eitt bréf.  Hvað eru nokkur svona bréf í viðbót á þessum síðustu og verstu?  Einnig hafði greiningardeildin okkar lagt hart að okkur að segja upp starfsmönnum í greiningardeildum annarra banka til þess að bæta samkeppnisstöðuna.  Þetta var því gráupplagt" sagði Lárpera.

Samkvæmt heimildum fréttastofu eru væntanleg uppsagnarbréf frá Glitni til alþingismanna, tannlækna, starfsmanna fjármálaráðuneytis og dýralækna.

Dagur skítlegs eðlis á Bessastöðum

Á morgun verður haldið upp á orð forseta Íslands Hr. Ólafs Ragnars Grímssonar, og þáverandi þingmanns, þegar hann gaf í skyn að eðli Davíðs Oddssonar, þáverandi forsætisráðherra, væri skítlegt, á Alþingi fyrir 16 árum.  Af því tilefni verður opið hús á Bessastöðum frá kl. 16-18 þar sem boðið verður upp á léttar kaffiveitingar. 

Unglingum á 16. ári er sérstaklega boðið og er ætlunin að þeir verði alltaf heiðursgestir þegar ummælanna verður minnst, en samkvæmt upplýsingum frá forsetaritara verður hér eftir um árvissan viðburð að ræða.

Prestum leyft að kyssa og knúsa

 

Í leynilegri atkvæðagreiðslu presta um Hvítasunnuna var samþykkt að prestar "mega kyssa og knúsa sóknarbörn eftir því sem aðstæður leyfa í nafni föður, sonar og heilags anda", eins og einn starfsmaður Biskupsstofu komst að orði í samtali við fréttastofu. 

Starfsmenn Biskupsstofu hafa séð um framkvæmd könnunarinnar með hringingum í presta um allt land.  Voru þeir spurðir, "ert þú sammála eða ósammála að prestar megi snerta sóknarbörn sín á þann veg að um kossa og knús er að ræða í hvert skipti sem prestar fái snertiþörf?" og voru 80% þeirra samþykkir.  17% voru andvígir, en 3% vildu rýmri heimildir til snertinga á sóknarbörnum sínum.

Friðrik krónprins vill endurvekja einokunarverslun

Friðrik krónprins lét þau orð falla í kvöldverðarboði á Bessastöðum í gærkvöldi að endurvekja þyrfti danska einokunarverslun á Íslandi í sömu mynd og hún ríkti á 17. og 18. öld.  Sagði Friðrik, að þar sem allt væri á kúpunni á Íslandi, frjálsræði í viðskiptum alltof mikið, og viðskipti við Danmörk hefðu minnkað jafnt og þétt, væri mikið til þess vinnandi að endurvekja einokunarverslun við Dani "til þess að tryggja hér stöðugleika og fá Íslendinga niður á jörðina".

Einnig nefndi Friðrik að dönskukennsla þyrfti að hefjast við fæðingu íslenskra barna og að Tuborg bjór ætti að streyma úr krönum á íslenskum heimilum í stað vatns.

Vill giftast bangsanum sínum

Laxdælingurinn Hólmfríður Georgsdóttir hefur óskað eftir því við sóknarprest Laxdæla að hún fái að kvænast bangsanum sínum Bjössa.  Hólmfríður segist hafa þekkt Bjössa lengi en að ástin hafi ekki kviknað fyrr en á síðari árum.  "Þetta gerðist smám saman og þegar ég fann að Bjössi bar sömu tilfinningar til mín þá var ekki aftur snúið" sagði Hólmfríður.

Ekki náðist í sóknarprest Laxdæla en frá Biskupsstofu barst eftirfarandi tilkynning:  "Hjónaband á að vera samband á milli konu og karls, en af því að Bjössi er svo fallegur bangsi munum við gera undanþágu að þessu sinni og veita þessu sambandi blessun okkar".

Ríó Tríó eykur gjaldeyrisforða sinn

Hljómsveitin Ríó Tríó hefur aukið gjaldeyrisforða sinn umtalsvert undanfarna daga.  Er þetta í samræmi við stefnu hljómsveitarinnar um að skapa meiri stöðugleika í landinu og renna stoðum undir íslensku krónuna.

"Okkur hefur tekist það sem Seðlabanka Íslands hefur ekki tekist ennþá, það er að auka gjaldeyrisforðann.  Á meðan starfsmenn seðlabankans eru hver um annan þveran í golfferðum látum við verkin tala" sögðu hljómsveitarmeðlimir kampakátir í viðtali við fréttastofuna. 

Eins og kunnugt er sagði hljómsveitin erlendum vogunarsjóðum stríð á hendur í kjölfar gengisfalls krónunnar og hefur markvisst unnið að eflingu efnahagslífsins.  Einnig hefur hún gagnrýnt matsfyrirtækin Fitch og S&P harðlega að undanförnu.  "Þessir menn lifa í steypuhræru.  Við sjálfir myndum ekki lána þeim fyrir rúnstykki" sagði í harðorðri grein sem birtist í Financial Times 30. mars.

Kvenfélag Rangæinga semur við grískan sæðisbanka

Kvenfélag Rangæinga er að hefja innflutning á grísku karlmannssæði.  Mun fyrsta sending berast til landsins með haustinu en kvenfélagið hefur skrifað undir bindandi kaupsamning við grískan sæðisbanka í Þessalóníku.

Í tilkynningu kvenfélagsins segir að þótt rangæskir karlmenn séu upp til hópa ekki ólaglegir og til einhvers gagns, vilja meðlimir félagsins fá meiri þokka og fríðleika í gen Rangæinga.  "Með þessu erum við að auka fjölbreytileika og fjölga valkostum kvenna í sýslunni til fjölgunar á mannkyni" segir ennfremur.