Ánamaðki sýnt banatilræði

Ánamaðki í Hlíðarhverfi var sýnt banatilræði um hádegisbilið í gær.  Karlmaður á þrítugsaldri var handtekinn af lögreglu en sleppt eftir yfirheyrslu.  Ánamaðkurinn fékk aðhlynningu fyrst í stað af ungri dóttur tilræðismannsins og var líðan hans eftir atvikum áður en hann hvarf ofan í kartöflugarð fjölskyldunnar. 

Tilræði gegn ánamöðkum hefur farið fjölgandi og nú þegar stangveiðitímabilið gengur í garð er búist við hörðum mótmælum ánamaðka.  Samkvæmt upplýsingum sem borist hafa fréttastofunni munu ánamaðkar bera saman bækur sínar með flutningabílstjórum á næstu dögum og jafnvel er búist við að ánamaðkar loki helstu samgönguæðum borgarinnar með hóplegu.  Hinir tvíkynja hryggleysingar eru vel í stakk búnir að takast á við lögreglu þar sem piparúði hefur engin áhrif á skynfæri þeirra.  

 

Ísraelar hefja landnemabyggðir í Breiðholti

Í mótmælaskyni við heimsókn Mahmoud Abbas, leiðtoga Palestínumanna, hafa Ísraelar hafið landnemabyggðir í neðra Breiðholti.  Eru framkvæmdir hafnar og verða byggðir bústaðir fyrir 200 Ísraela við Kóngsbakka og Jörfabakka í Breiðholti. 

Einnig hafa Ísraelar eyðilagt kartöflu- og grænmetisgarða Skólagarða Reykjavíkur við Stekkjarbakka með stórvirkum vinnuvélum, en að sögn furðulostinna vitna létu Ísraelarnir til skarar skríða í grænmetisgörðunum eftir að hafa leitað án afláts að ólífutrjám.

Pappalöggan verður lögreglustjóri á Keflavíkurflugvelli

 

 

 

 

Lögreglumaðurinn úr pappa, sem eitt sinn gætti laga og réttar á Reykjanesbraut í tíð Sólveigar Pétursdóttur dómsmálaráðherra, hefur verið ráðinn lögreglu- og tollstjóri á Suðurnesjum.  Dómsmálaráðuneytið gaf út tilkynningu þess efnis og tekur ráðningin gildi nú þegar.

Jóhann R. Benediktsson, sem er af holdi og blóði, sagði starfi sínu lausu eftir að dómsmálaráðherra kynnti skipulagsbreytingar fyrir skömmu.  Sóveig Pétursdóttir var ekki hissa á ráðningunni.  "Um leið og ég sá hann vissi ég að það yrði eitthvað úr honum.  Hann er ekki aðeins glæsilegur á velli heldur er mikið í hann spunnið.  Þetta er sigur fyrir lög- og tollgæslu á svæðinu því þarna er kominn lögreglustjóri sem þekkir svæðið mjög vel" sagði Sólveig. 

Pappalöggan, eins og lögreglumaðurinn er oftast nefndur, hefur ekki tjáð sig um ráðninguna. 

Náriðill fékk bónusvinninginn í lottóinu

 

Náriðillinn Ristikus Cýrusson fékk bónusvinninginn í lottóinu í kvöld.  Ristikus fékk um 300 þúsund króna í sinn hlut. 

Hann var að vonum ánægður með dráttinn og var ekki búinn að ákveða hvernig hann ætlaði að ráðstafa vinningnum.  "Ætli maður láti ekki verða af því núna að fara í frí til Dauðahafsins, og svo set ég eitthvað inn á bók" sagði Ristikus. 

Þjóðleikhúsið rekið með Halla

Komið hefur í ljós að Þjóðleikhúsið hefur verið rekið með Halla, Hallmundi Tuma Högnasyni dýralækni.  Ríkisendurskoðun gerir alvarlegar athugasemdir við stjórnun leikhússins en í fréttatilkynningu frá leikhúsinu er gagnrýnin gagnrýnd.  Þar segir að Hallmundur hafi verið lykilmaður í rekstri leikhússins og séð alfarið um fjármál leikhússins.  "Halli hefur staðið sig frábærlega í stjórnun fjármála leikhússins og þess vegna er gagnrýni Ríkisendurskoðunar ómakleg", eins og segir í tilkynningunni.

Hallmundur vildi ekki tjá sig um málið en lét hafa eftir sér að fjármál væru hans ær og kýr.

Mæðrastyrksnefnd greiðir lögfræðikostnað Hannesar Hólmsteins

 Mæðrastyrksnefnd hefur ákveðið að greiða upp lögfræðiskuldir Hannesar Hólmsteins Gissurarsonar.  Er þetta í fyrsta sinn sem Mæðrastyrksnefnd styður svo rausnarlega við bak á einstaklingi, að því er segir í fréttatilkynningu frá nefndinni.

Jafnframt segir að Mæðrastyrksnefnd berjist ávallt fyrir réttlátri og mannúðlegri félagsmálaaðstoð, starf nefndarinnar hafi breyst í áranna rás og að það séu ekki einungis einstæðar mæður sem leiti til hennar heldur einnig karlmenn, bæði einstæðir og með forsjá barna.  Eldri borgurum og öryrkjum hafi einnig fjölgað en stuðningur nefndarinnar við Hannes sé viðleitni hennar til þess að leggja einstaklingi lið sem eigi sérstaklega um sárt að binda.

Jarðboranir hefja boranir í nef

Jarðboranir hafa í fyrsta skiptið borað í nef, en hingað til hefur félagið einbeitt sér að borunum í jörð í leit að vatni eða jarðvarma. 

Ástvaldur Jóakimsson er mannauðsstjóri Jarðborana.  "Þessi hugmynd kviknaði hjá okkur þegar einn starfsmaður okkar fékk heiftarlegar blóðnasir eftir hafa borað linnulaust í nefið á sér í fjórar klukkustundir.  Hann var löngu búinn að tæma nefið af hori en vildi meira og þetta vakti upp spurningar um hvort eftirspurn væri eftir fagmannlegum borunum í nef einstaklinga, enda fellur það vel að slagorði félagsins, "við opnum þér auðlindir"".  

Hægt er að panta borun hjá Jarðborunum í gegnum netfangið [e-mail].

Fer í opinbera heimsókn til mömmu sinnar

Reykvíkingurinn Sigríður Hjálmarsdóttir hefur ákveðið að fara í opinbera heimsókn til mömmu sinnar á Sauðárkróki.  Er fyrirhugað að hún fari norður um næstu helgi.  Að sögn Ríkislögreglustjóra verður enginn viðbúnaður vegnar ferðar Sigríðar.

Mamma Sigríðar, Halldóra Jóelsdóttir frá Felli í Akrahreppi, dvelur nú á öldrunarheimili Sauðárkóks.  Sigríður hefur margoft heimsótt móður sína undanfarin ár.

Seðlabankinn spáir mikilli verðhækkun varasalva

Í nýrri þjóðhagsspá Peningamála Seðlabankans er spáð miklum verðhækkunum á varasalva. 

"Kólnun á húsnæðismarkaði hefur þegar komið fram í því að verðhækkun íbúðarhúsnæðis hefur u.þ.b. stöðvast.  Gert er ráð fyrir að húsnæðisverð lækki um 30% að raunvirði fram til 2010, en hins vegar má gera ráð fyrir miklum verðhækkunum á varasalva á 2. ársfjórðungi þessa árs og má búast við enn frekari hækkunum á 3. og 4. ársfjórðungi" eins og segir í tilkynningu Seðlabanka. 

Í tilkynningu frá greiningardeild Kaupþings er spá Seðlabanka gagnrýnd.  "Það getur vel verið að húsnæði lækki en miklar verðhækkanir á varasalva eru ólíklegar þar sem  Lára Traustadóttir vann rauðvínspott greiningardeildar í apríl"  segir í tilkynningu bankans. 

Tekin með 2kg af hreinu gardínuefni í Leifsstöð

Kona á sexturgsaldri var tekin með tvö kílógröm af hreinu gardínuefni í Leifsstöð í gærdag.  Konan hafði falið efnið í ferðatösku sinni.  Efnið er afar hreint og er talið að götuvirði þess sé um þrjú þúsund krónur.

Konan vakti grunsendir hjá tollverðum á Keflavíkurflugvelli þegar hún keypti þrjá Toblerone pakka af stærstu gerð í fríhöfninni, en það mun vera afar sjaldgæft.  Gardínuefni hefur ekki fundist áður í leit tollvarða.