Samkomulag um að jólunum verði frestað

 

Ríkisstjórnin hefur náð samkomulagi við Biskupsstofu og Prestafélagið um að jólunum í ár verði frestað um sex mánuði.  Jólin verða haldin hátíðleg um land allt í júní næstkomandi, og aðfangadagur jóla verður 24. júní.  Gert er ráð fyrir að áramótin muni verða í lok desember eftir sem áður.

"Fólk þarf ekki að hafa áhyggjur af því að við séum ekki að leysa málin, eitt af öðru í þeim miklu hamförum sem gengið hafa yfir þjóðina að undanförnu.  Allir jólasveinarnir halda vinnu sinni.  Jólin munu halda innreið sína í júní, og allir fá jólapakka" sagði Björgvin G. Sigurðsson viðskiptaráðherra.  Björgvin lofaði einnig heimsfriði og lækningu við krabbameini.

Lagt til að Kaupþing verði selt Finni Ingólfssyni

Í sameiginlegri yfirlýsingu Halldórs Ásgrímssonar og Valgerður Bjarnadóttur, sem ber heitið "Til bjargar íslensku þjóðinni:  Hvernig félagshyggjan getur unnið okkur út úr kreppunni" er lagt til að Kaupþing banki verði seldur nú þegar til Finns Ingólfssonar og aðilum honum fjárhagslega tengdum. 

Kemur fram í yfirlýsingunni að Finnur Ingólfsson hafi mikla reynslu af kaupum á banka í ríkiseigu og að hann sé tilvalinn til þess að skapa þá tiltrú sem íslenskir bankar þurfa að ávinna sér á skömmum tíma.  Ekki er verð nefnt, en þó kemur orðrétt fram að "heppilegt verð á bankanum eigi að vera í kringum skít og kanil". 

 

Vörumerkið ICESAVE til sölu í Bretlandi og Hollandi

Landsbanki Íslands hinn síðari, hefur ákveðið að selja vörumerkið ICESAVE, en vörumerkið fer aðeins á markað í Bretlandi og í Hollandi.  Ekki fæst uppgefið hjá bankanum hvaða verð er sett á vörumerkið en það mun ekki vera hátt.

"Við gerum okkur grein fyrir að við fáum ekki mikið fyrir vörumerkið, kannski fyrir pylsu og kók.  Sýnileiki okkar var mikill í þessum löndum og þess vegna setjum við það á markað þar.  Sjálf borða ég ekki pylsur" sagði Álfheiður Ingjaldsdóttir, forstöðumaður viðburðasviðs bankans.

Ástríkur galvaski í Seðlabankann

Ástríkur galvaski hefur verið ráðinn seðlabankastjóri frá og með deginum í dag.  Ástríkur hefur um árabil verið gjaldkeri Gaulverjabæjar í Gallíu, smáhéraði í Frakklandi.  Líklegt þykir að Steinríkur og Sjóðríkur seiðkarl fái sæti í framkvæmdastjórn bankans.

Samkvæmt heimildum fréttastofu mun Davíð Oddson taka við morgunleikfiminni í Ríkisútvarpinu. 

Bankastjórar viðskiptabankanna tengdir Al Kaída

Komið hefur í ljós, samkvæmt heimildum fréttastofu, að allir bankastjórar íslensku viðskiptabankanna eru beint eða óbeint tengdir Al Kaída hryðjuverkasamtökunum, og að flestir þeirra séu góðkunningjar Osamba Bin Laden.  Munu þeir meðal annars hafa verið viðstaddir brúðkaup Ingiríðar Bin Laden, einnar af 317 dætrum Osama, sem haldið var í búðum samtakanna í Hindu Kush fjallgarðinum á landamærum Pakistan og Afganistan. 

Al Kaída fékk bankastjórana til  fylgilags við sig með 30 silfurpeningum og döðlum.

Seðlabankinn veðjar á Víkingalottó

Enn berast fréttir úr seðlabankanum.  Bankinn hyggst kaupa 100.000 raðir í Víkingalottó fyrir alls 5 milljónir króna, en dregið verður í kvöld.  Í fréttatilkynningu segir að bankinn freisti nú gæfunnar í Víkingalottó með restina af fjármunum sínum, og ef að sá stóri skilar sér ekki í kvöld megi loka bankanum og innsigla. 

"Bankinn hefur gert allt sem í sínu valdi stendur til þess að bjarga íslenska fjármálakerfinu, fyrst með því að segja þessum óreiðumönnum bankanna að allt gæti farið á versta veg, og svo þegar laun seðlabankastjóra voru hækkuð um 200.000 í júní 2007.  Einnig hefur bankinn ítrekað óskað eftir því að myndaðar yrðu þjóðstjórnir á Íslandi og í Bangladesh.  Tölurnar á lottóseðlum bankans voru valdar af handahófi" segir orðrétt í tilkynningu bankans.

Fjármuna að vænta frá Nígeríu

Seðlabanka Íslands mun hafa borist bréf frá skrifstofustjóra fjármálaráðuneytis Nígeríu, Rufus Aiygmeni, sem boðið hefur seðlabanka Íslands háar fjárhæðir fyrir að aðstoða hann við færslu fjármuna út úr Nígeríu á bankareikning í Sviss. 

 Þótt ekki sé þjóðstjórn í Nígeríu segir Davíð Oddsson seðlabankastjóri að þarna sé tækifæri til þess að auka gjaldeyrisforða Íslendinga án mikillar fyrirhafnar en fjárhæðin sem seðlabanka Íslands er lofað er hátt í 80 milljón bandaríkjadala.  Davíð sagði að fyrst þyrfti að ganga frá lausum endum sem meðal annars fælust í greiðslu 100.000 bandaríkjadala á reikning Rufusar til þess að auðvelda honum flutning fjárins.  "Rufus lofaði okkur greiðslu ef við greiddum þessar fjármuni núna þannig að við bíðum átekta" sagði Davíð við fréttamann.

Seðlabanki Zimbabwe býður aðstoð

Eftir því sem fréttastofan kemst næst hefur seðlabanki Zimbabwe boðið íslenska seðlabankanum aðstoð í efnhagsþrengingum landsins, þ.e. Íslands.  Hefur seðlabanki Zimbabwe boðið íslenska seðlabankanum zimbabwíska dollara á kostakjörum, eða eins og stendur í boði þeirra "very special price for you my friend". 

Hefur boði þeirra ekki verið svarað en að sögn Davíðs Oddssonar seðlabankastjóra verða allar leiðir kannaðar.  Davíð sagði að vel gæti farið svo að aðstoð yrði þegin frá seðlabanka Zimbabve, enda sé þar verið að koma á þjóðstjórn.

Davíð vill þjóðnýta Hlöllabáta

 

 

Fréttastofan hefur heimildir fyrir því að Davíð Oddsson vilji þjóðnýta Hlöllabáta.  Davíð mun hafa látið þessi orð falla tvisvar í dag, fyrst á fundi með ríkisstjórninni í hádeginu og aftur inn á karlasnyrtingunni í Valhöll.  Í ljósi efnahagsástæðna telur Davíð nauðsynlegt að tryggja aðgengi almennings að Hlöllabátum en engar heimildir eru fyrir því að Hlöllabátar eigi í lausafjárerfiðleikum. 

Leikskóli Hjallastefnunnar birtir efnahagsspá

Leikskóli Hjallastefnunnar hefur birt efnahagsspá fyrir Ísland á komandi misserum.  Greiningardeild leikskólans gefur út spána í samvinnu við fjárstýringu og verðbréfamiðlun leikskólans.  

Leikskólinn spáir áframhaldandi flökti á íslensku krónunni og að verðbólga muni haldast há á Íslandi.  Gengi krónunnar mun svo hækka á 6. aldarfjórðungi 21. aldarinnar.  Þrátt fyrir þessa spá var létt yfir krökkunum enda höfðu flestir krakkanna tekið skortstöðu í Glitni.  Var að því tilefni efnt til veislu.

 Arnþrúður Lárusdóttir leikskólastjóri segir stofnun greiningardeildar, fjárstýringar og verðbréfamiðlunar hafi verið hugmynd krakkanna sjálfra.  "Þeir mega ekki leika sér með leikföng og til þess að hafa ofan af fyrir þeim höfum við leyft þeim að taka stöður á fjármálamörkuðum.  Þau fengu fjármögnun í Glitni og hafa ráðstafað þeim fjármunum vel.  Þetta eru algerir snillar" sagði Arnþrúður.