Ótrúlegur árangur ristilskolunar

Ótrúlegur árangur hefur náðst í ristilskolunum á heilsuhælum í Póllandi, segir Jónína Benediktsdóttir.  "Árangurinn hefur verið stórkostlegur og ekki annað hægt að segja en að þetta fólk hafi fengið nýtt líf" sagði Jónína í viðtali við fréttastofu.  Sigríður Hannesdóttir er kampakátur viðskiptavinur Jónínu og segir meðferð Jónínu hafa fyllt hana bjartsýni á framtíðina.  Sigríður dvaldi í Póllandi í þrjár vikur og undirgengst nokkrar ristilskolanir, vambminnkun og saltsýruþamb.

Franska landsliðið æfði í gær

Franska landsliðið mætti til æfinga í gær eftir átakamikla helgi þar sem leikmenn neituðu að mæta til æfinga vegna brottvikningar Nicolas Anelka.  Æfingin í gær fór að mestu leyti fram með slagsmálum.  

Norður-Kórea sýnir beint frá HM 1966

Knattspyrnuunnendur í Noður-Kóreu geta kæst því norður kóreanska ríkissjónvarpið mun sýna alla leiki beint á heimsmeistaramótinu í knattspyrnu 1966 í næsta mánuði, en keppnin fer fram á Englandi.  Kemur þetta fram í fréttatilkynningu frá norður-kóreanska innanríkisráðuneytinu.  Verða sýndir tveir til þrír leikir á dag í þremur litum, grænum, rauðum og bláum. 

Afhentu Jóni Gnarr þáttaröðina Allt í drasli

Þristarnir, hirðskáld Samfylkingarinnar, og samanstendur af Gísla Árnasyni, Eiríki Guðmundssyni og Helga Eysteinssyni, afhenti Jóni Gnarr þáttaröðina Allt í drasli, sem sýnd var á Skjá einum fyrir fáeinum árum, í hádeginu. 

Munu Gísli, Eiríkur og Helgi hafa skorað á Jón að skoða þættina vel áður en haldið verður lengra með viðræður Samfylkingar og Besta flokksins.

Náinn Manni

Ármann Höskuldsson hefur á undanförnum mánuðum orðið mjög náinn Jónasi Hannessyni, en þeir hafa þekkst í tíu ár.  "Við vorum í sama bekk í menntaskóla og fyrst voru þetta einungis augngotur, en nú hefur þetta þróast í eitthvað stærra og meira" sagði Jónas Hannesson.  "Hann Manni minn er orðinn mér mjög náinn".

 

BUGL fugluð í sumar

Ákveðið hefur verið að falla frá fyrirhuguðum lokunum á BUGL, Barna- og unglingageðdeild Landsspítalans í sumar, og ráða starrahóp til að manna, eða réttara sagt fugla hana í sumar. 

Samkomulag hefur náðst við starrahóp sem haldið hefur sig að mestu í neðra Breiðholti, en forsprakki hópsins, Björgvin Þrastarson, segist ánægður að samningar hafi náðst.  "Við fáum að skíta að vild í húsinu, verpa í þakskegginu næsta vor og svo fáum nóg af kóríanderkrydduðum ánamöðkum og rúsínum í laun fyrir vinnuna, sem er nú ekki flókin" sagði Björgvin í samtali við fréttastofu.

Slagsmál í Pólýfónkór

Slagsmál brutust út í morgun á æfingu Pólýfónkórsins í Reykjavík í húsnæði kórsins við Dunhaga.  Grunur leikur á að slagsmálin séu tengd viðskiptum kórfélaga með rotvarnarefni.  Munu bassarnir í kórnum hafa orðið uppsiga við tenóra og barítóna með þeim afleiðingum að tveir bassar og þrír tenórar þurftu að njóta aðhlynningar á bráðavakt Landsspítalans í Fossvogi.

Pólýfónkórinn hefur lengi verið viðriðinn rotvarnarefni enda eru meðlimir kórsins sérlega unglegir að sjá og frísklegir í framkomu. 

Elísabet Englandsdrottning ósátt við BBC

Elísabet Englandsdrottning er mjög ósátt við BBC eftir að þáttastjórnandi á útvarpsstöð BBC í Birmingham sagði í morgun að drottningin væri látin.  Var efnt til fundar með drottningu hjá BBC um hádegisbilið og mun hún hafa komið sjónarmiðum sínum á framfæri af fullum þunga.  Búist er við hóp uppsögnum á BBC í dag og á morgun vegna málsins.

Öskubuska á leið inn í ríkisstjórnina

Samkvæmt heimildum fréttastofu er Öskubuska á leið inn í ríkisstjórnina sem umhverfisráðherra, en núverandi ráðherra Svandís Svavarsdóttir mun víkja þar sem henni hefur ekki tekist að stöðva gosið í Eyjafjallajökli. 

Öskubuska, sem er hvít-rússnesk að uppruna og varð fræg í samnefndu ævintýri um miðja síðustu öld, er 146 ára gömul og hefur ekki gegnt ábyrgðarstarfi í stjórnmálum áður.  Hún vildi ekkert láta hafa eftir sér um starf umhverfisráðherra en sagði að ef hún myndi einhverju ráða væri löngu búið að stöðva gosið í Eyjafjallajökli með eldvarnarteppum enda hefði umhverfismat á gosinu verið neikvætt og aldrei fengist tilskilin leyfi fyrir því.

Hannes Smárason nýr fréttastjóri Stöðvar 2

Hannes Smárason hefur verið ráðinn fréttastjóri Stöðvar 2 frá og með deginum í dag.  Hannes, sem staðsettur er í London, mun hafa starfsstöð í London, en hann hefur enga reynslu af blaðamannsstörfum.

Í samtali við fréttastofu sagði Hannes sitt fyrsta verk vera að draga til baka allar neikvæðar fréttir stöðvarinnar, sem birst hafa á undanförnum árum, um FL Group, Northern Travel Group, Baug, Stoðir, Fons, Feng, Glaum, Gleði, Bónus, Hagkaup, Miklagarð, 10-11, 12-13, Knattspyrnufélagið Fram, Kaupfélagið Fram, framvirka samninga, Oddaflug, og nýtt félag Hannesar, Brotlendingu.  Hannes íhugar að draga til baka fréttir annarra fréttastöðva á næstu dögum.