Eiður Smári gerður útlægur í Mexíkó

Samkvæmt bráðabirgðalögum, sem samþykkt voru á mexíkóska þinginu í morgun, hefur Eiður Smári Guðjohnsen verið gerður útlægur frá Mexíkó næstu 50 árin í það minnsta.  Framvarpið var samþykkt með öllum greiddum atkvæðum.  Jafnframt var mexíkóska ríkislögreglustjóra falið að mynda sérsveit sem hefur þann einn tilgang að taka á móti Eiði Smári ef hann skyldi tylla fæti í Mexíkó. 

Eru þessar aðgerðir í beinu framhaldi af fréttum og mynd af Eiði Smári þar sem hann segir brandara um mexíkana, en af mynd af dæma líkir hann eftir nasistakveðju.  Brandarinn mun þó ekkert hafa með nasista að gera, en gyðingar í Mexíkó hafa lýst yfir sérstakri andúð á látbragði Eiðs Smára.  "Annaðhvort er hann að móðga okkur sem mexikana eða sem gyðinga, nema hvort tveggja sé.  Við styðjum því ráðagerðir stjórnvalda" segir í yfirlýsingu frá samtökum gyðinga í Mexikó, Los Zionistos de la Mexico.

Mótmæli við heimili Hönnu Valdísar

Um þrjú hundruð manns söfnuðust saman við hús söngkonunnar Hönnu Valdísar um kvöldmatarleytið í kvöld.  Var henni afhent skjal með undirskriftum um fimm þúsund Íslendinga þar sem tónlist hennar er mótmælt, hún hvött til að hætta söngiðkun og skila styrkjum sem hún hefur þáð á söngferli sínum.  Mótmælin fóru að mestu friðsamlega fram en þó var eitthvað um róstur þegar söngkonan veitti skjalinu viðtöku og sagði fáein orð við hópinn.

Hanna Valdís sagði að húsið væri fullt af börnum og að henni væri brugðið yfir mótmælunum.  "Ég hætti að syngja fyrir þrjátíu árum síðan og þáði þá þrjátíu þúsund krónur frá Karnabæ, í gömlum krónum, sem ég þurfti að taka út í vörum.  Ég get ekki afsungið lögin sem ég söng á þessum tíma.  Ég hefði viljað hitta ykkur í húsnæði SG-hljómplatna frekar en að hitta ykkur hér" sagði Hanna Valdís.

Rannsóknarnefnd alþingis gefur út símaskrána

Samningar hafa tekist á milli Já og rannsóknarnefndar alþingis um að nefndin gefi út símskrána fyrir árið 2011.  Hefur nefndin þegar hafið störf og var í upphafi búist við að skráin kæmi út í desember, en nefndin hefur frestað útgáfunni um tvo mánuði og er fyrirhugað að símaskráin komi út í febrúarbyrjun 2011.  Símaskráin, sem verður í 7 bindum og fengið vinnuheitið "Essassú?",  mun innihalda sérstaka stjörnumerkingu hjá viðkomandi einstaklingi eða fyrirtæki sem hefur sýnt vanrækslu í starfi, þegið kúlulán og/eða "tekið einhvern í suðurendann", eins og segir í fréttatilkynningu frá Já. 

Þuríður Hannesdóttir, verkefnastjóri Já segir nefndina vel í stakk búna til að takast á við þetta verkefni.  "Það er kominn tími til að fólk geti séð í almennu riti eins og símaskránni, hver sé drullusokkur og hver ekki" sagði Þuríður.

Moody's: Hægðir stöðugar

Matsfyrirtækið Moody's sendi frá sér fréttatilkynningu í morgun þar sem kemur fram að hægðum Íslendinga hafi verið breytt úr neikvæðum, blautum og blóðugum, í stöðugar.  Er það mat Moody's að með endurskoðun AGS á efnahagsáætlun Íslands muni færast meiri ró yfir meltingarveg Íslendinga og þar með muni klósettferðum Íslendinga fækka.

Smyglið treysti fjölskylduböndin

Feðgarnir Guðmundur R. Guðlaugsson og Guðlaugur Agnar Guðmundsson, sem meðal annarra stóðu að innflutningi á rúmum þremur kílóum af sterku kókaíni, segja þetta samvinnuverkefni feðganna hafa treyst fjölskyldu- og vinabönd feðganna.  "Við höfðum verið í litlu sambandi undanfarin ár og höfðum fjárlægst hvorn annan meira en góðu hófi gegnir.  Það var kominn tími til að við feðgarnir gerðum eitthvað saman" sagði faðirinn, Guðmundur. 

Feðgarnir hittust í fjölskylduboði um síðustu jól og urðu fagnaðarfundir.  "Fyrir mig að hitta pabba um jólin var eins og hitta gamlan og kæran vin.  Við ákváðum að eyða meiri tíma saman og það fyrsta sem okkur datt í hug var að fara hringveginn í sumar, en báðir nenntum við ekki að bíða til sumars til að gera eitthvað saman.  Þá datt okkur í hug að flytja kókaín til landsins, en slíkt krefst mikillar skipulagningar og yfirlegu, og vorum við pabbi búnir að vera saman upp á nánast hvern einasta dag frá áramótum þangað til við vorum böstaðir" sagði Guðlaugur.  Hann segir þennan tíma hafa verið ómetanlegan með föður sínum. 

"Við erum komnir í varðhald og fáum eflaust einhvern dóm, en það sem stendur upp úr er að ég er búinn að fá strákinn minn aftur, og það er það sem skiptir máli" sagði Guðmundur að lokum.

Meinti gosdrykk frá efnaverksmiðjunni Kötlu

Forseti Íslands, herra Ólafur Ragnar Grímsson, hefur gefið út yfirlýsingu þar sem fram kemur að fréttaflutningur undanfarna daga um að Katla sé að fara að gjósa sé allur á misskilningi byggður.  Hann hafi verið að meina að efnaverksmiðjan Katla ætli að hefja framleiðslu á nýjum gosdrykk og að ríkisstjórnir og flugmálayfirvöld í heiminum þurfi að undirbúa sig fyrir ferskt og frísklegt bragð drykkjarins. 

"Drykkurinn er einstaklega bragðgóður og ég er viss um að hann muni slá í gegn í heiminum.  Það kemur aðeins fram einn virkilega góður gosdrykkur á öld, kókið kom á markaðinn 1918, og heimurinn verður að undirbúa sig fyrir yfirvofandi framleiðslu nýja drykkjarins frá Kötlu.  Framleiðsla á Sól Kóla var bara æfing fyrir þennan nýja drykk" segir í yfirlýsingu forsetans.  

Halda á Fimmvörðuháls í sundskýlum

Fjórir félagar í karlaklúbbnum Rugludallarnir héldu fótgangandi á Fimmvörðuháls í gærkvöldi í sundskýlum, trampskóm og með alpahúfur. 

Var mikil stemmning í hópnum þegar fréttastofa náði tali af þeim.  "Ætlunin er að halda til við eldstöðvarnar í nótt og njóta útsýnisins með tvær vodkaflöskur og harðfisk sem við látum ganga hratt á milli manna.  Við tosumst svo heim á leið í morgunsárið" sagði Óðinn Hannesson einn Rugludallanna.  "Við erum vel undirbúnir eftir að hafa stundað sjósund í tvær vikur og svo erum við mjög heitfengir.  Auðvitað erum við með hlýjar gallabuxur, hlýraboli og gúmmívettlinga ef kuldaboli bítur.  Það verður að hafa í huga að veður skipast hratt í lofti á þessum slóðum" sagði Óðinn, og vildi að lokum vara fólk við að halda ekki á Fimmvörðuháls nema að vel athuguðu máli.

Móri mun leiða Icesave samninganefndina

Ríkisstjórn Íslands hefur fengið rapparann Móra, Magnús Ómarsson, til að leiða samninganefnd Íslands í komandi viðræðum við Breta og Hollendinga í stað Lee Buchheit.  

Auk Móra mun kærasta hans og Doberman hundur aðstoða hann við að stýra samninganefndinni en það var forláta rafbyssa, sem Móri fékk í sumargjöf frá kærustu sinni í fyrra, sem varð til þess að leitað var til Móra, en Lee Buchheit mun ekki eiga slíka byssu.  "Ég ætla að starta þetta sjitt með þessum bitsjes í Bretlandi og Hollandi og ef ég næ ekki þessu b-i-g disrespekti úr þeim verða þeir elektrikútaðir" sagði Móri á aðdáendasíðu sinni á Facebook.

Fékk bréf frá rannsóknarnefnd alþingis

Jónas Hannesson 16 ára Grafarvogsbúi hefur fengið bréf frá rannsóknarnefnd Alþingis tengdu bankahruninu og hefur 10 daga andmælarétt eins og aðrir viðtakendur slíkra bréfa. Ekki er vitað hvernig Jónas kom að bankahruninu en líkur benda til þess að 19 tommu flatskjár í herbergi hans hafi vakið áhuga rannsóknarnefndarinnar á þætti Jónasar. 

Jónas segist hissa á að hafa fengið bréf og ekki vita til þess að hann hafi stuðlað að bankahruninu, en hann hafi að vísu fjárfest í flatskjánum fyrir fermingarpeninga sem hann fékk vorið 2008.  "Afi þrusaði smá deigi í umslag fyrir púpuna sína og ég skúnkaðist í Elkó og keypti kvikindið.  Hvað er málið, ég drap engan" sagði Jónas í stuttu viðtali við fréttastofu, en hann mun einnig hafa verið yfirheyrður þrisvar næturlangt hjá sérstökum saksóknara án þess þó að fella tár.

Raftur sækist eftir 2. sætinu

Kynbótahrúturinn Raftur býður sig fram í 2. sæti á lista Framsóknarflokksins í komandi sveitastjórnarkosningum í Borgarbyggð. 

Raftur hefur verið búsettur að bænum Hesti í Borgarfirði en hefur verið með annan fótinn í Sauðfjársæðingarstöð Vesturlands og Sauðfjársæðingarstöð Suðurlands frá árinu 2005.  Þar hefur hann aflað sér frægðar fyrir einstaka frjósemi og dugnað, en á undanförnum fjórum árum hafa um 10.000 skammtar af fersku sæði hans verið notaðir til undaneldis.

Er þetta í fyrsta sinn sem Raftur fer í í prófkjör en hann segist lengi hafa haft áhuga á sveitastjórnarmálum og vera reiðubúinn að slást í hóp öflugra sveitastjórnarfulltrúa í Borgarbyggð.