Æseifur kominn í bæinn

Jólasveinninn Æseifur er kominn í bæinn, en hann er eini jólasveinninn sem ekki kemur á fyrirfram ákveðnum tíma eins og hinir jólasveinarnir.  Hann mun spássera um landið vel fram á næsta ár ef að líkum lætur.  Er fólk beðið um að hafa varann á, hann mun vera þjófóttur á reiðufé, talnaglöggur með afbrigðum og kænn í viðskiptum.  Er fólk sérstaklega beðið um að vera á varðbergi gagnvart sparnaðarleiðum jólasveinsins.  Hefur Jóhannes úr Kötlum bætt tveimur erindum við Jólasveinavísur sínar svo fólk átti sig betur á atferli jólasveinsins.

Æseifur lygalaupurinn sá,

laumaðist veskin í.

Tók vafninga og verðmæti,

var ekki lengi að því.

 

Blekkti og bjó til samninga,

býsna við það fær.

Safnaði öllu í sjóðina,

það var snilldin tær.

 

Stóðst geðrannsókn

Jón Bjarnason, sjávarútvegs- og landbúnaðarráðherra stóðst ítarlega geðrannsókn sem framkvæmd var í morgun á Landsspítala Háskólasjúkrahúsi.  Fór rannsóknin fram í kyrrþey og vilja talsmenn sjúkrahússins ekki tjá sig um hana en samkvæmt heimildamanni fréttastofunnar mátti ekki miklu muna að Jón hefði fallið á rannsókninni, en ekki var einhugur meðal geðlæknanna sem framkvæmdu geðrannsóknina.  Þurfti handauppréttingar í lokin til kveða upp úr um geðheilsu Jóns og fóru atkvæði svo að fimm læknar úrskurðuðu hann heilbrigðan en fjórir ekki.  Jón Steinar Gunnlaugsson skilaði séráliti.

"Hann var víst á tæpasta vaði karlkvölin" er haft eftir heimildamanninum.  "Það sem bjargaði honum var að geðheilbrigði félaga hans í ríkisstjórninni er ekki á háu stigi, þannig að hann telst heilbrigður í samanburði við félaga sína í stjórninni, en ekki miðað við meðaltal geðheilbrigðis á Íslandi".

Tvö hundruð mál til rannsóknar hjá sérstökum

 

 

 

Um tvö hundruð mál eru til rannsóknar hjá sérstökum saksónara og munu tíu mál verða leidd til lykta fyrir áramót. Samkvæmt sérstökum saksóknara er um að ræða drykkjarmál sem embættið hefur haft til rannsóknar. 

"Það er útbreiddur misskilningur að við höfum verið að rannska sakamál, en við erum löngu hættir því.  Það er miklu skemmtilegra að skoða þessi drykkjarmál, þau eru svo margslungin" sagði Ólafur Þór Hauksson.  "Við erum að klára tíu mál um þessar mundir, tvö bjórglös, fimm kokkteilglös og þrjú fantaflott koníaksglös.  Að öðru leyti vil ég ekki tjá mig um rannsóknir einstakra mála".

Afskrifaði skuldir sínar

 

 

 

Jónas Hannesson stjórnskipunarfræðingur hefur afskrifað skuldir sínar við banka og lánastofnanir.  Skuldir Jónasar voru á bilinu 40-50 milljónir króna við Arion banka, Lífeyrissjóð hjúkrunarfræðinga og Selvogsbanka.  "Mér er stórlega létt" sagði Jónas í viðtali við fréttastofu.  "Að losna við skuldir sínar er mjög hressandi, og þetta er eins og losna úr spennitreyju".  Jónas hvetur aðra að fara að dæmi hans.  "Þetta er ekkert mál.  Ég sendi bréf á þessar lánastofnanir og sagði þeim að skuldirnar væru afskrifaðar.  Ég fékk reyndar aðeins svar frá Arion banka sem þakkaði mér fyrir að láta sig vita".

Gengu í Framsóknarflokkinn

 

 

 

 

Síamstvíburasysturnar Erna og Þerna Hannesdætur gengu í Framsóknarflokkinn nú síðdegis.  Að sögn systranna er innganga þeirra í flokkin málamiðlun vegna ólíkra skoðana í stjórnmálum.  "Við erum á öndverðum meiði í pólítik, Þerna er róttækur Trotsky-isti og ég er meira fyrir frjálshyggjuna og ósýnilegu höndina hans Adam Smith.  Framsóknarflokkurinn var sá eini sem bauð upp á báðar þessar hugsjónir" sagði Erna kampakát í viðtali við fréttastofuna. 

Bretar ætla að samþykkja Icesave

 

 

Samkvæmt könnun sem Félag brauðgerðarmanna gerði á Bretlandseyjum er afgerandi stuðningur við Icesave frumvarpið.  Allir sem svöruðu sögðust styðja frumvarpið en úrtakið var allir bretar, 61,8 milljónir manna.  Í fréttatilkynningu frá félaginu kemur fram að meira að segja kornabörn hafi kinkað kolli þegar spurningunni var varpað til þeirra. 

Íhuga "að taka Ragga Önundar á pakkann"

Fyrrum bankastjórar viðskiptabankanna þriggja íhuga að snúa vörn í sókn í málarekstri gegn þeim með því "að taka Ragga Önundar", og kenna eigendum bankanna um allt sem miður fór í aðdraganda bankahrunsins 2008. 

"Við Hreiddi og Lalli Weld vorum að spjalla saman um daginn, og sáum hvað Ragnar Önundarson hefur verið brilliant í fjölmiðlum að undanförnu.  Hann hefur skorið sig úr snörunni í samráði kortafyrirtækjanna, með því að snúa þessu öllu upp á eigendurna.  Við ákváðum því að taka Ragga Önundar á pakkann.  Þetta verður erfitt fyrir Hreidda því hann og Siggi eru svo klós, en hvað mig varðar er allt Björgólfsfegðum að kenna sem gerðist í Landsbankanum.  Sjáðu, ég kom ekki nálægt svínaríinu sem þar fór fram." sagði Sigurjón Árnason í viðtali við fréttastofu. 

Ragnar óhress með RÚV

 

 

 

Ragnar Önundarson sagði í samtali við fréttastofuna að hann væri mjög óhress með frétt RÚV s.l. laugardag þar sem viðtal var tekið við hann í kjölfar afsagnar hans hjá Lífeyrissjóði verzlunarmanna og hjá Framtakssjóði Íslands.  Sagðist hann ekkert hafa efnislega út á fréttina að setja en að hann hafi beðið fréttamanninn um að eyða fréttinni.  "Ég bað hana að eyða fréttinni í öllum mögulegum hólfum, inn, út, aftan og framan, en hún gerði það ekki, truntan sú.  Hún ætti að íhuga að segja starfi sínu lausu.  Það sama má segja um kvikmyndatökumanninn.  Hann var órakaður og illa til hafður" sagði Ragnar.

Líður öllum extra vel

Starfsmenn slitastjórnar og skilanefndar Glitnis vilja koma á framfæri að þeim líður öllum extra vel með kjörin sín, eins og kemur fram í fréttatilkynningu þeirra.  "Við erum vel sátt og líður extra vel með kjörin okkar í dag þótt lengi sé hægt að bæta á sig blómum" segir m.a. í tilkynningunni.

Sjálfsafgreiðsla í Byko og Húsasmiðjunni á morgun

Ekkert þjónustufólk verður á vakt í Byko og Húsasmiðjunni á morgun þar sem búið er að handtaka alla starfsmenn verslananna fyrir meint ólöglegt samráð.  Samt sem áður verður opið í verslunum Byko og Húsasmiðjunnar á morgun og viðskiptavinir beðnir um að skila eftir fjármuni fyrir vörur á afgreiðsluborðum.  Kveikt verður á posum.