Alþjóðlegur baráttudagur bankastjóra

Í dag er alþjóðlegur baráttudagur bankastjóra undir yfirskriftinni "Bankastjórar eru líka fólk".  Munu banka- og sparisjóðsstjórar safnast saman við Austurvöll í dag kl 16 og minna á bág kjör bankastjóra á Íslandi og út um allan heim. 

Höskuldur Ólafsson bankastjóri Arion banka skipulagði mótmælin og býst hann við fjölmenni til stuðnings bankastjórum.  "Okkar tími er kominn, aftur.  Við viljum auka skilning umheimsins á störfum okkar og ábyrgð.  Nú er mál að linni" sagði Höskuldur og frumsýndi nýja mótmælaskiltið sitt.

Leikskólastjórum fækkað

 

 

 

Borgaryfirvöld hafa kynnt tillögur sínar um hagræðingu í skólakerfinu.  Áætlað er að leikskólastjórum verði fækkað um 60 og var tveimur fækkað í dagrenningu í morgun.  Áætlað er að fækka um fleiri á næstu dögum.

Mottumars fyrir kellingar

Heine Brandt, þjálfari þýska handknattleikslandsliðsins, var ómyrkur í máli við fréttastofuna þegar hann var spurður hvort hann vissi af því að nú væru margir íslenskir karlmenn að safna í yfirvaraskegg undir yfirskriftinni mottumars.  "Hvað varðar mig um einhverja mánaðarsöfnun á Íslandi þegar ég er búinn að safna og snyrta yfirvaraskegg mitt í 25 ár.  Þessi mottumars ykkar er fyrir kellingar" sagði Brandt, og skellti á blaðamann áður en hann gat spáð fyrir um komandi leiki við Ísland, í undankeppni evrópumótsins í handknattleik.

Eiður fékk að spila

Eiður Smári Guðjohnsen fékk að taka í spil um helgina á spilakvöldi átthagafélags austur skaftfellinga í Húnvetningabúð um helgina.  Eiður var heiðursgestur á spilakvöldinu en fékk ekki að spila framan af kvöldi, enda öll borð þéttsetin, og Eiður ekki verið í góðu líkamlegu félagsvistarformi.  Undir lokin fékk Eiður að spila nokkur spil en setti ekki mark sitt á þau.

Skar fót til að grennast

Heilsuátakinu á Skagaströnd virðast engin takmörk sett.  Siffa Gunnarsdóttir, bréfberi og athafnakona, lét skera af sér vinstri fótinn um helgina til að grennast og hefur þá lést um 12 kg á tveimur vikum.  Siffa ætlar ekki að láta þar við sitja þar sem hún hefur pantað sams konar aðgerð á hægri fæti. 

"Við erum ekkert að tvínóna við þetta hér á Skagaströnd.  Kílóin skulu fjúka og eftir að hafa heyrt borgarstjórann í Reykjavík varpa fram þessari frábæru hugmynd að skera hreinlega fæturna af sér í stað þess að hlaupa og djöflast, lét ég slag standa og árangurinn er eftir því, og án mikillar fyrirhafnar.  Gervifætur eru orðnir svo fullkomnir í dag og eru líka mun léttari en fætur úr holdi og blóði" sagði Siffa.

Hún bætti við að hún hefði pantað gervifætur frá Marel stoðtækjaþjónustu og væri núna með tvo hægri fætur í pöntun þar sem ársbið væri eftir vinstri fæti. 

Securitas vaktar lögreglustöðina Hverfisgötu

Securitas hefur undanfarna daga vaktað lögreglustöðina við Hverfisgötu vegna hótana frá ýmsum góðkunningjum lögreglunnar.  Hafa hótanir verið að berast bæði með símtölum og bréfum í pósthólf lögreglunnar, og starfsmönnum verið hótað eggjakasti og selbitum.  "Við tökum þessar hótanir alvarlega og hugsum fyrst og fremst um velferð starfmanna okkar" sagði Jónas Freymundsson starfsmanna- og gæðastjóri Ríkislögreglustjóra.

Morgunblaðið afsakar allar greinar á síðasta ári

 

Morgunblaðið hefur beðið lesendur sína afsökunar á öllum greinum blaðsins sem skrifaðar voru af starfsmönnum blaðsins síðasta ári, eftir því sem afsökunarbeiðnin er best skilin.  Afsökunarbeiðni blaðsins er eftirfarandi orðrétt: "Ritstj. og blaðam. bl. bið. afs. á öll. gr. bl. se. birt. vor. á s.l. ár..   Tja. fpr. skzkjo.". 

Seðlabanki lækkar ávexti

Á vaxtaákvarðanafundi Seðlabanka Íslands í morgun var ákveðið að lækka ávexti um 0,25% og mun verð á ávöxtum lækka í helstu kjörbúðum landsins sem því nemur.  "Það er ákveðinn slaki í hagkerfinu og mataræðið ekki upp á það besta.  Með þessu erum við að auðvelda fólki að kaupa íþróttanammi" sagði Már Guðmundsson seðlabankastjóri.

Hundur Hannesar kyrrsettur

 

 

 

 

Hundur Hannesar Smárasonar, Labrador tíkin Vafningur, hefur verið kyrrsett af sérstökum saksóknara.  Tíkin hefur verið skilgreind sem óefnisleg eign Hannesar og hafa fulltrúar saksóknara beðið hana um að vera kjura, og nú undir kvöld var hún grafkjur.  Vafningur verður 3 ára í maí og hefur ekki stöðu grunaðs hunds.

Fyrsta ferð til Þórshafnar

Herjólfur mun sigla til Þórshafnar á morgun og verður fyrsta ferð úr Eyjum kl 7:30 og til baka kl 23:40.  Verður þetta eina ferð dagsins samkvæmt tilkynningu frá Eimskipum, en mikil röskun hefur verið á ferðum Herjólfs að undanförnu.  Búið er að dýpka höfnina á Þórshöfn með dýpkunarskipinu Deep Shit, en ætlunin er að Herjólfur sigli norður og niður næstu daga.