Nicholson í Baugshreiðrinu

Jack Nicholson hefur þekkst boð Björns Bjarnasonar um að leika í Baugshreiðrinu, kvikmynd sem byggð er á bók Björns, Rosabaugur yfir Íslandi.  Björn hefur skrifað handrit eftir bókinni og er myndin fjármögnuð af Alþingi og Evrópuvaktinni, en Björn mun fá kr. 100.000 fyrir hvert orð í myndinni frá Alþingi.  Jack Nicholson mun leika Jóhannes Jónsson, en enn á eftir að ráða í hlutverk Jóns Ásgeirs og er orðrómur um að Chuck Norris taki að sér hlutverkið.  

Lady Jane með flest atkvæði

Samkvæmt útgönguspá Biskupsstofu hefur nektardansmærin Lady Jane fengið flest atkvæði í biskupskjöri, eða um 91% atkvæða, en talning fer fram í dag.  Næstur henni kemur Júdas Ískaríot með 45% atkvæða og í þriðja sæti er hrúturinn Hreinn með 0,5%.

 Tilkynnt verður um niðurstöðu talningarinnar á NASA í kvöld.

Gerður G. Bjarklind kölluð fyrir Landsdóm

Gerður G. Bjarklind, fyrrverandi þula og þáttastjórnandi, verður kölluð í vitnisburð hjá Landsdómi á morgun.  Var þetta ákveðið af dómstjórum þar sem flest vitnin, sem kölluð hafa verið fyrir dóminn, hafa haldið fram að Óskalögin, þáttur Gerðar á RÚV, hafi verið helsti orsakavaldur hins svokalla bankahruns 2008, en í þættinum voru leikin óskalög hlustenda sem drógu verulega úr tiltrú á íslenska bankakerfið. 

Gerður á að koma fyrir réttinn upp úr klukkan 9 og á eftir henni koma Halli og Laddi.

Hafa sofið saman í 50 ár

Í dag eru 50 ár síðan Ketill Hannesson og Rúna Olga Steinarsdóttir sváfu saman eftir sveitaball í Valaskjálf heima hjá foreldrum sínum að Neðri-Vör í Fljótsdalshreppi.  Það væri ekki í frásögur færandi nema að Ketill og Rúna Olga hafa haldið í vanann æ síðan eftir þetta örlagaríka kvöld og sofið saman á ýmsum stðum og og við ýmis tækifæri.  "Já, við Rúna höfum hist mánaðarlega, stundum oftar stundum sjaldnar, og sofið saman, annaðhvort heima hjá öðru hvoru okkar eða við finnum okkur staði sem ég ætla ekki að lýsa nánar" sagði Ketill í samtali við fréttastofu. 

 Hann segir þau Rúna vera uppfinningasöm og reyna alltaf að prófa nýja hluti.  "Við reynum að bæta okkur í hvert skipti og er þetta mikil áskorun fyrir okkur.  Einnig fyrir maka okkar, en þeir eru ekki par hrifnir af þessu" sagði Ketill.

Landsdómur færður í Þjóðleikhúsið

Ákveðið hefur verið að færa Landsdóm úr Þjóðmenningarhúsinu í Þjóðleikhúsið og munu vitnaleiðslur verða á stóra sviðinu.  Var þetta ákveðið af dómstjórum Landsdóms eftir að stemningin í dómsalnum hefur reynst mun léttari en áætlað var.  "Það hefur skapast létt og skemmtilega stemning í dómsalnum og vitnisburðurinn hefur verið þrælskemmtilegur, minnir oft á góðan farsa eftir Dario Fo.  Við erum flissandi eins og skólastelpur allan tímann.  Þetta á heima á leiksviði" sagði Markús Sigurbjörnsson forseti hæstaréttar. 

Samkvæmt upplýsingum frá Þjóðleikhúsinu verður selt í sæti fyrir hverjar tvær klukkustundir á hefðbundnu miðaverði og hægt er að greiða með gjafakortum.

Ólafur Ragnar lýsir yfir sigri í þremur löndum

Hr. Ólafur Ragnar Grímsson forseti Íslands lýsti í dag yfir sigri í forsetakosningunum í Rússlandi, Íran og Jemen.  Kemur niðurstaðan á óvart en ekki var vitað að Ólafur Ragnar hafi verið í framboði í þessum löndum.  Ólafur sagði í viðtali við fréttastofuna að hann væri hissa á einn eða annan hátt.  "Hitt ber að nefna að ég hef ávallt verið í góðum tengslum við rússneska alþýðu og jemenska aðalinn.  Klerkarnir í Íran eru afar vandaðir allir saman.  Það er mjög merkilegt hvað þeir hafa með visku sinni og dugnaði barið eldmóðinn í íranska alþýðu og ég mun ekki láta mitt eftir liggja í þeim efnum. Ég hlakka til að vinna með þeim" sagði Ólafur. 

Nýr meirihluti myndaður í Kópavogi

Nýr meirihluti hefur verið myndaður í bæjarstjórn Kópavogs með þátttöku Samfylkingar, Vinstri grænna, Frjálslyndra og vinstri manna, Hins flokksins, Þriðja besta flokksins, Félags eldri borgara, Félags einstæðra feðra og Kórs Digraneskirkju.  Stefnuskrá meirihlutans hefur ekki verið birt en eftir því sem fréttastofan kemst næst munu beittari tannstönglar í mötuneytum bæjarstarfsmanna, mýkri salernispappír í skólum, frí söngkennsla, útrýming örvhentra og hjólbörunámskeið bera þar hæst.

Á móti alheiminum

Ögmundur Jónasson sagði í viðtali við fréttastofu að hann sé á móti alheiminum, skipulagi sólkerfisins og vill slíta sambandi við aðrar stjörnur.  Er Ögmundi sérstaklega umhugað um "marsáráttu" jarðarbúa og hugsanlegt samband við aðrar stjörnur í þessu sólkerfi sem öðrum.  Vill Ögmundur jafnframt stöðva allar fjárveitingar til rannsókna á stjörnufræði.  "Að vera í sambandi við aðrar stjörnur er ávísun á dagpeningagræðgi geimfara þegar þeir elta glerperlur og eldvatn annarra stjarna og ljóst er að ef líf finnst á Júpiter munu Júpiterbúar reyna að stjórna okkur með ofríki og fullveldi jarðarbúa í hættu.  Þar yrði eldvatn á boðstólum ef vatn er þar yfir höfuð" sagði Ögmundur. 

Götur og gangstígar ruddar í sumar

Reykjavíkurborg íhugar að ryðja götur og gangstíga næsta sumar og hætta ruðningi misserin. 

"Já, við ætlum að bíða með ruðninginn þangað til í sumar.  Það borgar sig bara ekki að ryðja göturnar þessa dagana því það snjóar jafnharðan.  Við eigum heldur ekki að vera á ferðinni í þessari færð heldur vera heima og slaka á.  Sumarið er tíminn því þá líður okkur öllum betur andlega.  Þetta eru breyttir tímar" sagði Jón Gnarr í viðtali við fréttastofu.

Anna Mjöll viðskiptamaður ársins

Viðskiptablað Bændablaðsins, Fjárhirðirinn, hefur valið Önnu Mjöll Ólafsdóttur viðskiptamann ársins 2011.  Í niðurstöðu Fjárhirðisins kemur fram að Anna Mjöll hafi með hjónabandi sínu við Cal Worthington, og sótt svo um skilnað nú í desember þar sem hún biður um fjárhagslegan stuðning hans, gert besta viðskiptasamning ársins þar sem Íslendingur kom við sögu.  "Þetta er án efa besti díllinn á árinu þótt víðar væri leitað.  Brölt Skúla Mogensen og hlutabréfaútboð Haga eru tíkallabissness í samanburði við þennan magnaða viðskiptasamning Ólafar" eins og segir orðrétt í niðurstöðunni.