Onedin skipafélagið kaupir Eimskip

Onedin skipafélagið í Liverpool á Bretlandi hefur keypt Eimskip fyrir 1 pens.  James Onedin, forsprakki Onedin skipafélagsins verður forstjóri nýs sameinaðs félags, sem eftirleiðis verður nefnt Onedin.  Jafnframt mun Onedin yfirtaka 300 skrilljónir skulda, víkjandi lán og aðra lánavafninga. 

Onedin var stofnað 1726 og í flota þess eru fjögur seglskip og eitt þrælaskip.

Keypti nýjan bíl

Íslenskur píanóstillingamaður, Álfbjörn Ingólfsson, festi kaup á nýrri bifreið síðdegis í gær.  Er um að ræða Ford bifreið að fjárhæð 3,5 milljónir króna.  Álfbjörn keypti bifreiðina með 100% láni í indónesískum rúpíum og byrjar að greiða af láninu á útmánuðum 2012.

Álfbjörn segist lengi hafa haft augastað á þessari Fordbifreið og hann er hæstánægður að nú hafi draumurinn ræst.  "Ég missti íbúðina um daginn og konan er flutt út en þessi rennireið kemur til með að kippa öllu í liðinn" sagði Álfbjörn kampakátur.

Seðlabankinn fær peningagjöf frá frúnni í Hamborg

Seðlabanki Íslands veitti um helgina viðtöku peningagjöf frá frúnni í Hamborg að fjárhæð 1 milljarði evra.  Frúin í Hamborg mun gefa Íslendingum strax um 400 milljónir evra en ætlar ekki að lána 600 milljónir evra fyrr en hún sér hvað Seðlabankinn ætlar að gera við peningana sem frúin í Hamborg gaf honum.

Í fréttatilkynningu frá Seðlabankanum kemur fram að rausnarleg gjöf frá frúnni í Hamborg komi á besta tíma fyrir landið og að þessum fjármunum verði vel varið.  Einnig kom fram í tilkynningu bankans að fjármálakerfið væri traust og hafi staðist álagspróf bankans og Fjármálaeftirlitsins.

Seðlabankinn varaði við kólnandi veðri í vetur

Í greinargerðum Seðlabankans, Hagvísum, Peningamálum og Fjármálastöðugleika, fyrr á árinu varaði Seðlabanki Íslands við kólnandi veðri í vetur.  Í skýrslunni segir að þótt hlýtt veður yrði í sumar mætti gera ráð fyrir kólnandi veðri er liði á haustið og veturinn.  

Í Fjármálastöðugleika dagsettum 8. maí þessa árs kemur fram:

"..niðurstaða greiningar Seðlabanka Íslands [sé] sú að fjármálakerfið væri í meginatriðum traust.  Sú niðurstaða er óbreytt.  Hins vegar má búast við kólnandi veðri með haustinu og að líklegt sé að snjór muni falla svo einhverju nemi yfir vetrartímann".  

Kúba mun sjá um loftvarnareftirlitið

Í fréttatilkynningu Varnarmálaskrifstofu utanríkisráðuneytis hafa samningar náðst við flugher Kúbu um að hann taki við loftvarnareftirliti við strendur Íslands frá og með 1. desember n.k.   Er búist við að þrjár Mustang vélar kúbverska flughersins komi til landsins í lok nóvember og verða þær með bækistöðvar á Bakkaflugvelli í Landeyjum Rangárvallasýslu.  Ekki kemur fram hversu langur samningurinn er við kúbverska flugherinn en samkvæmt heimildum fréttastofu verður óheimilt að fljúga vélunum eftir áramótin næstu, sökum aldurs.

Sagði sig á þing fyrir Framsóknarflokkinn

Þorfinnur Ingjaldsson klæðskiptingur hefur sagt sig á þing fyrir Framsóknarflokkinn.  Þorfinnur var áður óflokksbundinn en hefur verið gagnrýndur á vinnustað sínum fyrir klæðaburð og óvenjulegar skoðanir um jafnrétti kynjanna.

"Ég ákvað að axla ábyrgð á ummælum mínum um að konur ættu helst að bíða eftir manni sínum á rúmstokknum eða við eldavélina með heita jólaköku og kakó" sagði Þorfinnur og um leið og hann skráði sig sem þingmann hjá skrifstofustjóra Alþingis.  Þorfinnur verður 1. þingmaður Miðhálendis.

Tekinn til makaskipta

Hjörleifur Gestsson hefur verið tekinn til makaskipta af Héraðsdómi Reykjaness.  Hjörleifur hefur verið í langvarandi vanskilum við ýmsa lánadrottna og var það Lífeyrissjóður bankamanna sem fór fram á makaskiptin. 

Hjörleifur, sem giftur hefur verið konu sinni Álfheiði Dýradóttur í 15 ár, hefur verið gert að skipta henni út fyrir Sigurlaugu Jónasdóttur nuddkonu.   Hann segir dóminn hafa komið sér mikið á óvart enda átti hann von á að vera tekinn til gjaldþrotaskipta.  Honum líst vel á Sigurlaugu og hlakkar til að hitta hana.  "Þetta var orðið dragfúið hjá okkur hjónum og það vantaði alveg módjóið"  segir Hjörleifur. 

Dómurinn kom Sigurlaugu og eiginmanni hennar, Hans Sívertsen, í opna skjöldu og hafa þau áfrýjað dómnum.  Hans varð sérstaklega heitt í hamsi við fréttirnar í fyrradag og hlekkjaði hann sig við fordyr Héraðsdóms Reykjaness.  Ekki hefur náðst að leysa hann úr þeirri prísund þar sem lyklarnir eru týndir og hlekkirnir eru úr sérstaklega sterku læknastáli sem engin vinnuvél hefur náð að vinna á.

Forstjóri IMF í fríi á Íslandi

Dominique Strauss-Kahn, forstjóri Alþjóða gjaldeyrissjóðsins er staddur hér á landi í fríi.  Hefur hann stundað sjósund af kappi við Gjögur á Ströndum og gengið á fjöll.  Dominique hefur ekki viljað veita viðtöl en sagði í samtali við afgreiðslukonu í söluturni á Hólmavík ekki hafa miklar áhyggjur af fyrirgreiðslu Íslands hjá sjóðnum.  "Ég skoða málið þegar ég mæti aftur til vinnu, ef ég man eftir því" sagði Dominique.

Ísland sótti um lán hjá IBF í stað IMF

 

 

Uppgötvast hefur að Ísland hefur, eftir allt, ekki sótt um lán hjá IMF, Alþjóða gjaldeyrissjóðnum heldur hjá IBF, Alþjóða hnefaleikasambandinu.  Embættismenn í Seðlabankanum urðu þessa varir þegar fulltrúi Sviss sagði að IMF væri enn að bíða eftir umsókn Íslendinga um fyrirgreiðslu. 

Talsmaður IBF sagði í viðtali við fréttastofu að verið væri að skoða umsókn Íslendinga, sem væri óvenjuleg og hefði komið sambandinu gríðarlega á óvart.  Kristinn Gunnarsson þingmaður og Ómar Ragnarsson fögnuðu umsókninni og sögðu Seðlabankann hafa, í fyrsta skiptið í háa Herrans tíð, hafa sýnt framsýni og kænsku.

Til öryggis hefur Seðlabankinn nú ákveðið að sækja um fyrirgreiðslu hjá öllum alþjóða samböndum sem byrja á I og enda á F, ef vera skyldi að hægt yrði að fá fyrirgreiðslu hjá fleirum en IMF. 

Nýburar skráðir á vanskilaskrá

Börn sem hafa fæðst eftir að bankakreppan skall á, hafa verið skráð á vanskilaskrá við fæðingu af Lánstrausti.  Hefur starfsmaður Lánstrausts verið með aðstöðu á fæðingardeild Landsspítalans og verið viðstaddur sumar fæðingarnar.  Hann grandskoðar jafnframt fæðingartölur af landsbyggðinni og færir alla nýbura til bókar.  Eru börnin skráð í vanskilaskrá sem drengur/stúlka ásamt fæðingardegi og -tíma.  Með sjálfvirkri tölvutengingu við Hagstofu Íslands breytist skráningin um leið og börnin eru nefnd.

Að sögn Álfheiðar Unnarsdóttur, blaðafulltrúa Lánstrausts, eru nýburar skráðir á vanskilaskrá svo jafnræðis sé gætt.  "Jafnræðisreglan þarf að gilda í þessu sem öðru.  Skuldir Íslendinga eru miklar og það þurfa allir að axla byrðar.  Nýburar, rétt eins og við hin, skulda eins og skrattinn þótt ég voni að þeir gangi á Guðsvegum" sagði Álfheiður.