Sex núll tekin af krónunni um áramótin

Í tilkynningu frá Seðlabanka verður myntbreyting um næstu áramót.  Sex núll verða tekin af krónunni og verður því ein milljón króna ígildi einnar nýrrar krónu, en í tilkynningu Seðlabankans segir að eftir áramótin muni íslenskan krónan vera nefnd nýkróna.  Miðað við gengi gjaldmiðla í dag verður því danska krónan á 2 milliaura nýkrónu, evra á 1,6 sentiaura og pundið á 2 sentiaura.  Segir í tilkynningu bankans að aðgerðirnar nú séu svar við yfirvofandi óðaverðbólgu en vonir standa til að þær muni renna styrkum stoðum undir íslensku nýkrónuna. 

 

Seldi sjálfum sér Alþingishúsið

Trausti Lyngdal götustrákur seldi sjálfum sér Alþingishúsið um helgina.  Mun Trausti fjármagna kaupin með reiðufé og útgáfu hlutabréfa í sjálfum sér.  Gamla Kaupþing og Póstgíróstofan voru ráðgefandi um söluna en viðskiptabanki Trausta, Selvogsbanki, fjármagnaði kaupin.

Trausti hafði áður selt Arnarhól tvisvar og íslenska skjaldarmerkið fjórum sinnum til besta vinar síns, Barða Sigurjónssonar fyrrum framkvæmdastjóra sápukúlusviðs Gamla Landsbanka, ávallt með miklum hagnaði.  Samkvæmt heimildum fréttastofu mun Trausti eiga í viðræðum við föður sinn um sölu á móður sinni.  

Bangsadagur á Alþingi

Bangsadagur er á Alþingi í dag.  Er þetta nýbreytni hjá hinu háa Alþingi sem mælst hefur vel fyrir hjá þingmönnum.  Mátti sjá flesta þingmenn koma með bangsa til þingfundar í morgun, og gekk mikið á í þingsal þegar þingmenn báru saman eftirlætisbangsana sína. 

Er bangsadagurinn liður í átaki sem Allsherjarnefnd Alþingis stendur fyrir undir yfirskriftinni KKK eða "Knúsumst karlar og konur".  Það miðar að því að þingmenn efli tilfinningagreind sína með því að opna sig meira á tilfinningasviðinu og fá útrás fyrir snertiþörfina. 

Okurlán hagstæðari en yfirdráttarlán

Eftir vaxtahækkun Seðlabankans eru okurlán orðin hagstæðari en yfirdráttarlán í banka.  Gunnbjörn Ásmundarson okurlánari segir mikla eftirspurn þessa dagana eftir okurlánum.  "Við höfum yfirleitt lánað fólki sem er skuldugra en skrattinn en nú er venjulegt fólk að koma til okkar og biðja um lán".  Gunnbjörn vildi ekki gefa upp kjörin á lánunum, en nefndi að yfirleitt væru þau á 11-1300 punktum yfir REIBOR.  

Spurður út í innheimtuaðgerðir segir Gunnbjörn þær ekki harðari en gengur og gerist í bönkunum.  "Bankarnir innsigla húsin en okkar aðferðir eru persónulegri.  Við höfum beint samband við skuldarann og hótum honum.  Ef illa gengur að semja, er þá ekki betra að missa hnéskel frekar en húsið sitt?"  spyr Gunnbjörn. 

Hægt er að sækja um okurlán á netfanginu [e-mail].

IceClean salernispappír framleiddur úr íslenskum peningaseðlum

Breska framleiðslufyrirtækið Lotus hefur hafið framleiðslu á salernispappír, IceClean, þar sem hráefnið er íslenskir peningaseðlar.  Að sögn Alistair Luvya framleiðslustjóra Lotus hefur framleiðslan mikla hagræðingu í för með sér enda eru íslenskir peningaseðlar ódýrasti pappír sem völ er á.  "Þetta er ekki sérlega mjúkur pappír en ég veit að breskir neytendur láta sig hafa það í ljósi atburða undanfarinna vikna" sagði Alistair.  

IceClean fer á markað í Bretlandi á næstu dögum og er fyrsta framleiðsla uppseld.

Ríkisstjórninni boðið í sjónvarpsþáttinn How To Look Good Naked

Carson Kressley, stjórnandi breska sjónvarpsþáttarins How To Look Good Naked, hefur sent ríkisstjórninni boð um að koma í þáttinn.  Í boði þáttastjórnandans kemur fram að það sé langt síðan hann hafi séð jafn marga háttsetta embættismenn berrassaða í einu og að hann hafi ákveðnar hugmyndir um hvernig hægt sé að lappa upp á þá.  

Í lok þáttarins er gert ráð fyrir hópmynd af ríkisstjórninni án fata, "enda er málum íslensku ríkisstjórnarinnar þannig háttað í dag að það sé sama hvaða fötum ráðherrarnir klæðast, þeir séu samt allsberir", eins og segir orðrétt í boði sjónvarpsþáttarins.

Davíð varaði við sjálfum sér

Í viðtali við kventímaritið Veru fyrir tveimur árum varaði Davíð Oddsson við sjálfum sér.  Davíð segir í viðtalinu ekki vera viss um hvað hann ætti að vera að gera í Seðlabankanum, hann hefði ekki fengið neina starfslýsingu í hendur og ekki verið gerður við hann ráðningarsamningur. 

í viðtalinu segist Davíð vera boðaður "andskoti oft" á fundi sem vægast sagt séu hrútleiðinlegir.  "Þeir fjalla flestir um stýriskyldu, verðbólgu, bindivexti og guð má vita hvað.  Ég botna ekkert í þessu og líður eins og álfur út úr hól.  Ég get varla ábyrgst gerða minna undir þessum kringumstæðum" sagði Davíð.  

Söfnunarátak fyrir Sigurð og Hreiðar Már

Þjófasmellan er söfnunarátak fyrir fráfarandi stjórnarformann og forstjóra Kaupþings, feðgana Sigurð Einarsson og Hreiðar Már Sigurðsson, en þeir hafa nú hætt störfum hjá Kaupþingi.  Öll helstu líknarfélög landsins koma að söfnuninni ásamt stærstu fjölmiðlum landsins og mun sjóvarpsdagskrá sjónvarpsmiðlanna á föstudaginn verða helguð söfnuninni.  

Þjófasmellan er seld í öllum útibúum Kaupþings, í húsakynnum líknarfélaganna og einnig mun stór hópur sjálfboðaliða ganga í hús um helgina.  Smellan kostar 35 þúsund krónur.  Mun allur afrakstur söfnunarinnar renna óskiptur á reikning feðgana á eyjunni Tortola í Karíbahafi.

Árni Mathiesen vill aðstoð Alþjóða dýralæknasjóðsins

Árni Mathiesen dýralæknir og fjármálaráðherra hefur lagt til á ríkisstjórnarfundi að leitað verði aðstoðar Alþjóða dýralæknasjóðsins, IVF, í stað Alþjóða gjaldeyrissjóðsins. 

Árni hefur lengi haldið fram að Alþjóða gjaldeyrissjóðurinn muni gera ósanngjarnar kröfur á íslenska þjóðarbúið og telur að Alþjóða dýralæknasjóðurinn sé sveigjanlegri í samningum. "Þeir eiga helling af pening og hafa lítinn skilning á efnahagsmálum" segir Árni.  "Það er því ólíklegt að þeir leggi miklar kröfur á okkur ef þeir lána okkur nokkra milljarða dollara". 

Stríð við Breta skollið á - Ísland hertekur Lundúnir

Íslenski flotinn, sem kom til Lundúna fyrr í dag, hefur hertekið borgina.  Í fréttatilkynningu frá íslenska dómsmálaráðuneytinu segir að fyrirmæli sjóliðanna hafi verið skýr, fyrst að hertaka Lundúnir og herja svo í kjölfarið á Birmingham og Manchester. 

Íslenski flotinn, sem samanstendur af 25 sjóliðum, tveimur varðskipum og einum dráttarbáti, er illa vopnum búinn og sjóliðarnir munu ekki vera þjálfaðir í hernaði.  Björn Bjarnason segir það ekki skipta öllu máli.  "Hugurinn ber okkur hálfa leið og viljinn er allt sem þarf" sagð Björn í samtali við fréttastofu.  "Ég hef beðið lengi eftir þessu og nú skulum sýna tjöllunum hvar Davíð keypti ölið".