Gauja litla treyst best til að leiða þjóðina úr kreppunni

Í könnun sem Vélaverkstæði Hannesar vann fyrir Bændablaðið var nafn Gauja litla oftast nefnt þegar spurt var hver ætti að leiða þjóðina út úr þeim erfiðleikum sem hún stendur frammi fyrir.  Gaui nýtur stuðnings um 30% þjóðarinnar en Davíð Oddsson kemur fast á hæla hans með 32%.  Í næstu sætum á eftir koma Ólafur Laufdal 24%, og lánanefnd Glitnis 27%.  Aðeins var hægt að velja nafn Davíðs Oddssonar.

Í úrtakinu voru 16, allt starfsmenn vélaverkstæðisins.

Sæddi Audda og Sveppa

Torfi Sigurðsson dýralæknir, sem er hálfur maður og hálfur nautgripur, hefur sætt Audda og Sveppa með sæði úr Hereford holdanautum.  Átti sæðingin sér stað um helgina og var í óþökk drengjanna.

Ástæða sæðingarinnar sagði Torfi vera umtal í fjölmiðlum undanfarna daga og framkoma drengjanna í garð kúa.  "Það sem þessir drengstaular létu út úr sér um systur mínar kýrnar fór í mínar fínustu, og ekki bætti úr skák að sjá þá með plastpokana um hendurnar eins og þetta væri einhver brandari" sagði Torfi illur í bragði. 

Torfi sagðist hafa lent í erfiðleikum með að sæða drengina þar sem þeir hafi sýnt töluverðan mótþróa og eins hafi hann ekki haft heppileg verkfæri við hendina.  Fór svo að sæðingin tókst en gera þurfti að drengjunum á eftir.  Hvort sæðingin muni bera ávöxt mun koma í ljós á næstu tveimur vikum.

Veðsetti grásleppuskúrana við Ægissíðu

Komið hefur fram á netsíðunni WikiLeaks að Jón Ásgeir hafi lagt inn tryggingar gegn lánum sínum í Landsbankanum fyrir lúxusíbúðinni á Manhattan og gamla Alþýðuhúsinu sem hýsir hótelið 101, í formi veðs í grásleppuskúrunum við Ægissíðu að fjárhæð um 6 milljarða króna. 

Á netsíðunni er að finna glærukynningu með 660 glærum um gjörninginn en enginn ágreiningur mun vera á milli skilanefndar Landsbankans og Jóns Ásgeirs um fyrirgreiðsluna eða tryggingar honum tengdum.  Í kynningunni kemur fram að viðskiptavild skúranna við Ægissíðu sé um 5 milljarðar króna og að verðmæti hugsanlegrar grásleppuveiði næstu 4000 árin gæti orðið um 1 milljarður króna. 

Uppgötvaðist í Bónus

Sighvatur Þorsteinsson rafvirki uppgötvaðist í Bónus fyrir um 12 árum af formanni Rafiðnaðarsambands Íslands.  Sighvatur var að versla einsamall þegar Ómar Klugenberg þáverandi formaður Rafiðnaðarsambands Íslands tók eftir Sighvati.  Þetta kemur fram í endurminningum Ómars sem gefnar verða út í haust.  Ómar mun hafa tekið eftir Sighvati í mjólkurkælinum þar sem hann var að setja kotasælu í búðarkerruna og mun þá hafa orðið sannfærður um að Sighvatur ætti að leggja fyrir sig rafvirkjun.  

Eftir að hafa beitt fortölum við Sighvat lærði hann til rafvirkjunar og hefur unnið við það síðan.  Ekki hefur gengið sem skyldi hjá Sighvati þar sem hann hefur verið án atvinnu í rúmt ár.  "Þetta starf á ekkert sérstaklega vel við mig.  Ég fæ rafmagn í tíma og ótíma, er kominn með óreglulegan hjartslátt, konan fór frá mér og ég er að missa íbúðina" sagði Sighvatur og vildi ekki tjá sig frekar um endurminningar Ómars.

Jesús heimsækir Karphúsið

Jesús Kristur, sonur Guðs, heimsótti Karphúsið á tíunda tímanum í morgun.  Mun Jesús hafa fengið sér kaffisopa og heilsað upp á viðsemjendur, sem nú reyna að klára stöðugleikasamning sem koma myndi í veg fyrir vinnustöðvun í landinu. 

Að sögn Jesús heyrði hann af því þegar framkvæmdastjóri Samtaka Atvinnulífsins lýsti yfir í fjölmðlum að kraftaverk þyrfti til að viðsemjendur næðu saman.  "Ég tók Vilhjálm á orðinu og ákvað að heimsækja deiluaðila og það er aldrei að vita nema ég hristi eitthvað fram úr erminni minni, sem er stór og mikil" sagði Jesús, sem virtist líta hraustlega út þrátt fyrir háan aldur.

Berlusconi styður Gunnar

 

 

 

Silvio Berlusconi hefur sent Gunnari Birgissyni stuðningsyfirlýsingu í baráttu hans fyrir pólitísku lífi sínu sem bæjarstjóri Kópavogs.  Í yfirlýsingunni segir að ómaklega sé vegið að Gunnari og að viðskipti stjórnmálaforingja við fjölskyldumeðlimi ætti að hampa sem hollri fjölskyldustefnu sem allir ættu að taka sér til fyrirmyndar. 

Einnig leggur Silvio til að Gunnar fái vini sína á alþingi til að samþykkja lög um að ekki megi rannsaka persónuleg mál Gunnars og að hann fái skilyrðislausa friðhelgi.  "Elsku Gunnar, þú ættir að fara ítölsku leiðina og beita áhrifum þínum, senda andstæðingum þínum dauða fiska svo þeir fái skilaboðin; að þeir muni sofa hjá fiskunum ef þeir geri ekki rétt.  Kíktu við í partý við tækifæri" segir í lok stuðningsyfirlýsingarinnar.

Árið 2007 kemur aftur á næsta ári

 

Ríkisstjórn Íslands, öll helstu launþegasamtök og stærstu hagsmunasamtök á landinu hafa undirritað samkomulag um að árið 2007 komi eftir næstu áramót.  Er þetta liður í að bæta hag heimila og fyrirtækja.  Í fréttatilkynningu segir að þótt árið 2007 hafi liðið í aldanna skaut sem eitt mesta græðgis- og eyðslufylleríisár fyrr og síðar þá var ástand heimila og fyrirtækja gott á þessum tíma.  "Við erum reynslunni ríkari og fáum nú annað tækifæri til að fara ekki með allt fjandans til með girt niður um okkur í leiðinni.  Það er til þess vinnandi að árið 2007 komi aftur svo allt verði gott aftur" segir í lokaorðum tilkynningarinnar.

Sumarleikur kirkjugarðanna í fullum gangi

Sumarleikur Kirkjugarða Reykjavíkur er nú í fullum gangi.  Starfsmenn kirkjugarðanna hafa falið þrjár líkkistur, eina í hverjum krikjugarði í Reykjavík, Grafarvogskirkjugarði, Fossvogskirkjugarði og kirkjugarðinum við Suðurgötu.  Þeir hinir heppnu sem fyrstir finna kisturnar fyrir miðnætti á Hvítasunnudag fá að eiga þær og auk þess fá þeir sérstaka De Luxe útgáfu af Chesterfield líkkistu sem búin er þægindum á við innbyggt útvarp, hita- og rakastýrða miðstöð, og samlokugrill.

Óunnin unglingavinna í Kópavogi

Bæjarráð Kópavogs hefur samþykkt tillögu þess efnis að unglingavinnan í sumar á vegum Kópavogsbæjar verði óunnin.  Er þetta í fyrsta skiptið sem unglingar, sem sækja vinnu hjá bæjarfélaginu, og fá fyrir hana laun, þurfa ekki að vinna hana. 

Tómas Tumason, flokkstjóri hjá Kópavogsbæ er himinlifandi yfir ákvörðun bæjarráðs.  "Þetta verður til mikillar bótar enda hefur unglingavinnan aldrei snúist um að vinna, heldur að vera með."

Decode hefur framleiðslu á Tab

 

 

 

 

Decode hefur hafið framleiðslu á gosdrykknum Tab.  Einar Káti forstöðumaður Upplýsinga- og matvörusviðs Decode segir þetta rökrétt framhald á rekstri fyrirtækisins.  "Það hefur verið gríðarlegt tap á rekstri félagsins og við sáum hag okkar best borgið með því að markaðsvæða tapið og reyna að hafa eitthvað upp úr því" sagði Einar.

Búist er við að fyrstu vörusendingarnar berist sjoppum og stórmörkuðum á næstu dögum.  "Fyrsta sendingin er uppseld og aðeins örfáar dósir óseldar í annarri pöntun" sagði Einar Káti.