Hefur átt í áralöngu ástarsambandi við Tiger

Hrafnkatla Jónasdóttir, húsfreyja að Skutum í Öræfasveit segist hafa átt vingott við Tiger Woods á undanförnum 34 mánuðum.  Að sögn Hrafnkötlu hófst samband þeirra á hestamannamóti öldunga á Vindheimamelum fyrir tæpum þremur árum. 

"Eftir að hann Böðvar minn geispaði golunni fyrir fjórum árum hef ég verið á markaðnum ef svo má segja, en hef aldrei haft áhuga á einhverjum ellismellum.  Eftir lokagrein hestamannamótsins á Vindheimamelum, Stefánstölt, vissi ég ekki af mér fyrr en þessi fjallmyndarlegi piltur gekk beint í fasið á mér.  Það skipti engum togum, við byrjuðum eldheitt ástarsamband sem staðið hefur yfir í tæp þrjú ár".  Hrafnkatla segist ekki hafa vitað að hann væri giftur og ætti tvö lítil börn.  "Við höfum frekar látið verkin tala, það er minn háttur" sagði Hrafnkatla.

Fögnuðu 7 ára afmæli einkavæðingar Landsbankans

Haldið var upp á 7 ára afmæli einkavæðingar Landsbankans í ráðhúsi Reykjavíkur í gærkvöldi með viðhöfn.  Davíð Oddsson fyrrverandi seðlabankastjóri, Geir Haarde fyrrverandi forsætisráðherra, Beatrix Hollandsdrottning og Gordon Brown voru meðal gesta, ásamt fyrrverandi eigendum og stjórnendum bankans.  Í ræðu Björgólfs Guðmundssonar fyrrverandi eiganda bankans kom fram einstaklega vel hefði tekist til við einkavæðingu bankans en einskær óheppni, fall Lehmanbræðra og Andrewssystra væri um að kenna að bankinn væri nú kominn í ríkiseigu en "það var gaman meðan á þessu stóð" sagði Björgólfur við góðan róm gesta.

Birgir Ármannsson formaður Samtaka eldri Sjálfstæðismanna

Birgir Ármannsson hefur verið kjörinn formaður Samtaka eldri Sjálfstæðismanna.  Tekur Birgir við formannssætinu af Halldóri Blöndal sem gegndi starfinu í tvær vikur. 

Birgir hyggst gera róttækar breytingar á störfum samtakanna og "poppa þau allverulega upp", eins og Birgir komst að orði í setningarræðu sinni.  Nú þegar hefur spilakvöldum verið fjölgað úr einu í tvö í viku hverri og hagstæðir samningar hafa náðst við Kirkjugarða Reykjavíkur um magnkaup á legstæðum.

Maóistar mynda meirihluta í Grindavík

Maóistar hafa myndað meirhluta í bæjarstjórn Grindavíkur og munu væntanlega taka við stjórnartaumum á næsta bæjarráðsfundi sem fyrirhugaður er í lok vikunnar. 

Maóistar í Grindavík hafa starfað frá árinu 2002 þegar skæruliðasamtökin Skínandi stígur voru stofnuð, og hafa samtökin tekið alls 28 manns í gíslingu frá stofnun þeirra.  Samtökin aðyllast skoðanir Maó Tse-tung, og hafa í huga menningarbyltingu í Grindavík í anda Maó formanns.

Frjálshyggjufélagið í greiðslustöðvun

Héraðsdómur Reykjavíkur hefur veitt Frjálshyggjufélaginu greiðslustöðvun frá og með 1. desember til loka janúar á næsta ári.  Er félaginu þar með ekki skylt að greiða af skuldum sínum og ætlast er til að félagið endurskipuleggi fjárhag sinn á tímabilinu.

Jónas Hannesson, formaður félagsins, segir greiðslustöðvunina sýna samhug með útrásarvíkingunum.  "Staða okkar er ágæt og við skuldum nánast ekki neitt, en við vildum sýna útrásarvíkingunum samstöðu í verki og skelltum okkur í greiðslustöðvun.  Frjálshyggjunni hefur óverðskuldað verið kennt um allt sem miður hefur farið og við viljum sýna með þessu að þú þarft ekki að skulda mikið, eða vera með allt í messi til að fara í greiðslustöðvun.  Þetta er ekkert mál, bara eins og fara í bað" sagði Jónas.

Væntingarvísitala Gylfa hækkar enn

 

 

 

 

Væntingarvísitala Gylfa hækkaði um 30% síðdegis í gær og hefur þar með hækkað um 1500% síðan bankahrunið varð á síðasta ári.  Gylfi Hannesson, útgefandi vísitölunnar, segir gríðarleg tækifæri hafa falist í hruninu og að kæti hans hafi síst minnkað með tímanum.  "Ég hef fulla trú á að við séum í góðum málum.  Hvað er eitt hrun á milli vina?  Það er allt djollí hjá mér að minnsta kosti á meðan ég á fyrir kippu og Salem" sagði Gylfi. 

Moody's lækkar brunabótamat alþingishússins

Matsfyrirtækið Moody's hefur lækkað brunabótamat alþingishússins í ruslflokk og segir að helst eigi að nota húsið í áramótabrennu.  Í skýrslu matsfyrirtækisins segir að bullið og ruglið sem eigi sér stað innan veggja alþingis þessa dagana og vikurnar ríði ekki við einteyming og að húsið sé ekki múrsteinanna virði.

"Miðað við málflutning alþingismanna er húsið ónýtt því það er búið að tala það í duftið.  Gríðarlega skemmdir eru á burðarvirki hússins vegna skemmandi málflutnings og ósæmilegrar hegðunar þingmanna.  Nota megi húsið til áramótabrennu, ef ekki er hægt að koma því í verk að brenna það strax" segir í greinargerðinni.

Transfita algengust hjá miðlum

Í nýrri rannsókn alþjóða heilbrigðisstofnunarinnar á um 100.000 einstaklingum í flestum þjóðlöndum heims hefur komið í ljós að transfitusýrur mælast hæst í blóði þeirra sem starfa á andlega sviðinu og þá helst miðlum.  Var rannsóknin gerð á þriggja ára tímabili 2006-2009.  Transfita mælist sértaklega há hjá transmiðlum eða um 32 transfitublóðflögur á hverjar 100, en minnst hjá tollvörðum, aðeins 4. 

Neysla á transfitusýrum, eða hertri fitu, getur stuðlað að sykursýki 2 og offitu 3.  Er það helsta skýringin á bústnu vaxtarlagi miðla og ásækni þeirra í sælgæti.

Byssuskylda í Bandaríkjunum

Samþykkt hafa verið lög í báðum deildum bandaríkjaþings að allir þegnar landsins frá 12 ára aldri verði að eiga að minnsta kosti eina skammbyssu og hleypa af henni reglulega, að minnska kosti einu sinni á dag.  Voru lögin samþykkt með miklum meirihluta atkvæða. 

Byssueign er almenn í Bandaríkjunum og hefur það þótt sjálfsagður réttur hvers og eins að fá að verja sig með eigin skotvopni en nú er þess krafist að þegnar landsins verji sig með slíku vopni og leggi jafnvel til atlögu ef ekki hefur verið á þá ráðist. 

Dótadagur hjá viðskiptavinum Glitnis

Í dag er dótadagur hjá viðskiptavinum Glitnis sem eru undir 12 ára aldri.  Er þessum viðskiptavinum velkomið að koma með uppáhaldsdótið sitt í útibú bankans um land allt.  Georg skemmtir krökkunum og allir fá kúlulán á meðan birgðir endast.  Eina skilyrðið fyrir lántökunni er að láninu verði eytt í tóma vitleysu.