Sparisjóður Svarfdæla fellur frá verðbólgumarkmiðum sínum

Sparisjóður Svarfdæla hefur fallið frá verðbólgumarkmiðum sínum og þar með farið að ráðum þeirra þingmanna sem lagt hafa hart að Seðlabanka Íslands að falla frá verðbólgumarkmiðum sínum. 

Þetta kemur fram í fréttabréfi sparisjóðsins sem kom út í dag, en þar segir að hann vilji sýna gott fordæmi.  Verðbólgumarkmið sparisjóðsins fyrir Svarfaðardal og helsta nágrenni hefur verið 2% en nú hefur verið horfið frá því.  "Verðbólgan má þess vegna fara upp í 100%, okkur gæti ekki verið meira sama" segir í fréttabréfinu.

Femin.is valinn besti bændavefurinn

Femin.is var valinn vinsælasti bændavefurinn á uppskeruhátíð bændasamtakanna um helgina.  Er þetta í þriðja skiptið sem bændur velja vefsíðu ársins, en að þessu sinni voru tilnefndir þrír vefir auk Femin.is, Jonasfrahriflu.is, Sambandid.is og Samvinnubanki.is. 

Femin.is er haldið úti af Klemenz Haraldz að Klofi í Sælingsdal og er hann afar ánægður með viðtökurnar sem vefurinn hefur fengið.  "Bændur í öllum sveitum landsins hafa haft samband við mig og lýst yfir mikilli ánægju með vefinn, sérstaklega eftir að ég ég fór að bjóða upp egglosunarpróf og grindarbotnsþjálfa."  Klemenz vildi vekja athygli á sérstöku afsláttartilboði á Durex eldflaug með aukabatteríi, sem tryggja á 40 mínútna gleði.

Geimvera ráðin þjálfari íslenska handknattleikslandsliðsins

Stjórn Handknattleikssambands Íslands hefur ráðið geimveruna Trinitor eftir að hafa átt í viðræðum við alla jarðarbúa.  Trinitor er 6.674.433.239 í röð þeirra sem hafa átt í viðræðum við sambandið.  Um tíma leit út fyrir að kambódískt gamalmenni í Phnom Phnem myndi skrifa undir samning við sambandið en það hrökk upp af um síðdegisbilið í gær.

Trinitor, sem fannst í leynihvelfingu í Hrunamannhreppi þegar leitað var að hinum heilaga kaleik, hefur ekki viljað tjá sig um ráðninguna að öðru leyti en því að gengið hafi verið frá ráðningarsamningi með hugsanaflutningi. 

Heilbrigðisþjónusta verður lögð niður í áföngum

Ákveðið hefur verið að leggja heilbrigðisþjónustu niður í áföngum.  Í fréttatilkynningu Heilbrigðis- og tryggingamálaráðuneytis kemur fram að loka eigi sjúkrahúsum og heilsugæslustöðvum á næsta ári og að neyðaraðstoð verði aflögð árið 2010.  Með þessu næst gríðarleg hagræðing í ríkisbúskapnum og mun afgangur af ríkisrekstrinum ná áður óþekktum hæðum á komandi árum. 

Ráðuneytið hefur gefið út leiðbeinandi bækling til sjúklinga þar sem m.a. geðsjúkum er bent á að leita til Landhelgisgæslunnar og hvað varðar fæðingarhjálp er mælt með heitu pottunum. 

Blóðsykur kominn í verslanir

Blóðsykur er nú kominn í verslanir í Reykjavík og er væntanlegur á landsbyggðina næstu daga.  Það er danska fyrirtækið Dansukker sem framleiðir sykurinn, sem samsettur er úr hvítum sykri og svínablóði.  Er hann fyrst og fremst hugsaður fyrir þá sem eru með lágan blóðsykur.  Fólki með háan blóðsykur er bent á að neyta venjulegs sykurs.

FL Group, Gnúpur og Société Générale í víðtækt samstarf

 

 

 

Tilkynnt var til Kauphallarinnar fyrir stundu að íslensku fjárfestingarfélögin FL Group og Gnúpur væru að fara í víðtækt samstarf með franska bankanum Société Générale sem helst lýtur að stöðutökum í hlutabréfum og vísitölum, ásamt því að franski bankinn mun miðla af reynslu sinni í verðbréfamiðlun og áhættustýringu. 

Fróði Frostason framkvæmdarstjóri samskipta og þekkingar hjá ráðgjafarfyrirtækinu In Solidum Post Mortem Non Grata, sem milligöngu hafði um samstarf fjármálafyrirtækjanna, segir gríðarlega möguleika á samlegðaráhrifum í kaupum á lélegum hlutabréfum á markaði.  "Öll þessi félög, og sérstaklega franski bankinn, hafa tapað gríðarlegum fjármunum að undanförnu og með aukinni samlegð og magnkaupum á hrútlélegum pappírum er vel hugsandi að hægt sé að auka tapið verulega án þess að auka rekstrarkostnað" sagði Fróði.

 

Gosi verður næsti borgarstjóri

Samstaða hefur náðst meðal borgarfulltrúa Sjálfstæðisflokksins um að Gosi setjist í borgarstjórastólinn þegar Ólafur F. Davíðsson lætur af embætti. 

Lengi vel leit út fyrir að næsti borgarstjóri kæmi úr röðum borgarfulltrúanna en ljóst þótti að Vilhjálmur ætti ekki afturkvæmt í embættið.  Eftir átakamiklar umræður fram eftir nóttu var ákveðið að leita til spýtustráksins Gosa af þeirri ástæðu að það sést strax á honum þegar hann fer með rangt mál.

Önnur nöfn utan borgarfulltrúanna sem heyrðust nefnd á fundinum voru hundurinn Tanni, Baron von Münchhausen og umboðsmaður barna.

Vilhjálmur fékk samþykki borgarlögmanns í Þrándheimi

Komið hefur í ljós að Vilhjálmur Vilhjálmsson, oddviti Sjálfstæðismanna í borgarstjórn Reykjavíkur, fékk samþykki borgarlögmanns í Þrándheimi í Noregi til að staðfesta samruna REI og Geysis Green Energy. 

Að sögn borgarlögmanns í Þrándheimi, Harald Brattbak, innti Vilhjálmur hann eftir samþykki fyrir samrunanum á norrænu höfuðborgarráðstefnunni í Stokkhólmi á dögunum.  Harald segist ekki muna mikið eftir þessu enda hafi hann verið vel við skál þetta kvöld.  "Ég var nú ekki boðinn og var staddur þarna fyrir slysni.  Mig minnir að ég hafi gefið honum afdráttarlaust samþykki mitt enda hélt ég að annaðhvort væri ég að taka þátt í skemmtilegum samkvæmisleik eða græskulausu gríni" sagði Harald.

Reykjavíkurborg friðar kofa á Falklandseyjum

Reykjavíkurborg hefur friðað kofa sem byggður var á 14. öld og staðsettur er við helstu verslunargötu Falklandseyja.  Í tilkynningu frá borgarstjórn segir að mikilvægt sé að Falklandseyjar haldi 14. aldar götusýn sinni, en sveitarstjórn Falklandseyja hafði fyrirskipað að kofaskriflið verði rifið. 

Að sögn talsmanns sveitarstjórnarinnar þar hefur ekkert breyst í þeim efnum þrátt fyrir friðlýsingu Reykjavíkurborgar.  "Er himinninn blár?" spurði talsmaðurinn þegar hann var inntur eftir því hvort kofinn yrði rifinn eftir friðlýsingu Reykjavíkurborgar.

Ísraelar smíða búr utan um Gaza

Ísraelsmenn hafa ákveðið að smíða búr utan um Gaza svæðið þar sem múrinn sem byggður hefur verið virðist ekki ætla að gera sitt gagn.  Herskáir Hamas liðar hafa sprengt gat á múrinn svo Paletínumenn á Gaza svæðinu hafa getað skroppið yfir til Egyptalands í leit að nauðsynjum.  Ísraelsmenn eru óánægðir með gang mála og hyggjast smíða rammgert búr til þess að halda íbúum svæðisins í skefjum.  Mun búrið svipa mjög til hefðbundinnar minkagildru.

Tel Ben Mossad upplýsingafulltrúi rikisstjórnar Ísraels segir það algerlega óviðunandi að Palestínumenn á Gaza geti náð sér í nauðsynjar.  "Það er móðgun við hina Guðs útvöldu þjóð að Palestínumenn geti náð sér í mat, drykk og aðrar nauðsynjar þegar búið er að smíða 7 metra háan vegg til þess að koma í veg fyrir það.  Til hvers er þá veggurinn?" spyr Tel Ben.