Kína lýsir yfir áhyggjum af heimsókn Stokkseyrings á Blönduós

Ráðamenn í Peking hafa lýst yfir áhyggjum af heimsókn Stokkseyringsins Péturs Ingvaldssonar til vinar síns á Blönduósi, Sigurjóns Yngvarssonar. 

Í fréttatilkynningu frá utanríkisráðuneyti Kína segir að heimsókn Péturs sé gróf afskipti af kínverskum innanríkismálum og að Pétur sé leynt og ljóst að reyna að kljúfa Kína í herðar niður.  "Stokkseyringar eru pólitískir útlagar sem fela sig á bak við suðurlandsundirlendið og þokkalegan veitingastað.  Heimsókn Péturs til Blönduós er atlaga að fullveldi kínverska heimsveldisins og verður málið tekið fyrir í öryggisráði Sameinuðu þjóðanna, nema að Pétur gefur sig fram við kínverska sendiráðið í Reykjavík án tafar.  Verður þá tekið á máli hans af mildi."

Pétur sagðist undrandi á viðbrögðum Kínverja en sagðist ekki ætla að hætta við heimsóknina.  "Ég veit ekki í hvaða heimi þessir menn eru en það kemur ekkert í veg fyrir að við Sjonni fáum okkur brennivínstár og segjum gamansögur" sagði Pétur.

Yfirdýralæknir aðhefst ekkert vegna stöðu krónunnar

Í morgun barst tilkynning frá Yfirdýralækni um að embættið hyggðist ekki grípa til neinna aðgerða vegna gengisfalls krónunnar.  Í tilkynningunni segir að embættið muni ekki leggja til að meiri eða minni dýralækningar muni eiga sér stað þrátt fyrir að krónan hafi verið í frjálsu falli undanfarnar vikur. 

Ennfremur segir í tilkynningunni að þótt fjármálaráðherra sé dýralæknir hafi embættið ekki beitt sér í fjármálum ríkisins nema að litlu leyti, embættið hafi tekið skortstöðu í Softís fyrir 12 árum en hafi, síðan þá, ekki beitt sér á fjármálamörkuðum.

Páfagaukurinn er kominn

Vorboðinn ljúfi, páfagaukurinn, er kominn til Íslands.  Fuglaáhugamaður á Hornafirði sagðist hafa séð páfagauk í fermingarveislu um helgina.  Páfagaukar fara suður á bóginn á haustin en dvelja á Íslandi yfir sumarið, og leita sér þá gjarnan að búrum þar sem þeir fá mat og vatn.  

Fleiri dýr eru væntanleg með vorinu, hamsturinn er væntanlegur um páskana og hemúllinn kemur um næstu mánaðarmót.

Johnny Logan mælir með upptöku írska pundsins

 Írski söngvarinn Johnny Logan ráðleggur Íslendingum að taka upp írska pundið.  Hann segir gjaldmiðilinn hafa verið farsælan þegar hann var og hét.  

"Eftir að evran tók við af írska pundinu hækkaði bjórinn og það kunni ég illa við.  Írski seðlabankinn á nóg af írskum pundum fyrir ykkur og þið getið örugglega fengið þau ódýrt.  Það er auki er flatarmál landanna svipað og því myndi henta Íslendingum vel að taka upp írska pundið" sagði Johnny við komuna til landsins, en hann verður með uppákomu á Broadway í maí n.k. þar sem hann spinnur saman tónleika og hugleiðingar um efnahagsmál.

Reykjavíkurborg gleymdi að reikna með kennurum í Rimaskóla

 

 

Reykjavíkurborg gleymdi að reikna með að kennarar störfuðu í Rimaskóla á þessu ári.  Skólinn hefur verið starfræktur í 14 ár en samkvæmt fjárhagsáætlun borgarinnar var ekki gert ráð fyrir að kennarar væru við störf í skólanum, aðeins nemendur. Nemendur skólans hafa ekki fengið kennslu frá áramótum og ganga sjálfala um ganga skólans.

Framkvæmdarstjóri fjármáladeildar Reykjavíkurborgar, Guðmann Heiðmann dýralæknir, viðurkennir að þetta séu mistök.  "Ég er sannarlega fyrir frjálslegt skólastarf en fjandakornið, svona mikið frelsi er auðvitað út úr kú."  sagði Guðmann, og bætti við að kennarar yrðu ráðnir á næstunni og að þeir verði með virðisaukaskatti.

SPRON að gufa upp

Sparisjóður Reykjavíkur og nágrennis er að gufa upp.  Nú þegar hafa nokkur útibú horfið af yfirborði jarðar og stórsér á öðrum.  Almannavarnir eru í viðbragðsstöðu og lögreglan er að safna saman nöfnum starfsmanna útibúanna svo hægt verði að lýsa eftir þeim um leið og útibúin hverfa.  Búið er að kvarnast verulega úr höfuðstöðvum SPRON og er áætlað að þær gufi upp um helgina.  Í tilkynningu frá Almannavörnum verður neyðaráætlun gangsett um leið og fimm útibú hafa gufað upp.

Svínabændur hafa sérstakar áhyggjur af ástandinu.  Nýjasta tákn SPRON, sem sýnir fimm grísi sjúga spena á gyltu af mikilli áfergju, hefur vakið mikla athygli og hefur svínakjötsneysla aukist um 40% síðan svínin birtust á vef SPRON. 

Orkuveita Reykjavíkur hefur framleiðslu á rafmagnsstólum

Orkuveita Reykjavíkur hefur hafið framleiðslu á rafmagnsstólum.  Um er að ræða stóla sem eiga að fara á markað í Ísrael, Texas, og Kína.  Kaupverð á stólunum hefur ekki verið gefið upp en þetta er fyrsta útrásarverkefni Orkuveitunnar.  Í kynningarriti Orkuveitunnar um stólana kemur fram að hægt sé að hleypa 5000 volta spennu á stólana.

Hreinn Hnallþóruson verkefnastjóri staðfesti að tilraunir með stólinn hefðu gengið vel, en hann vildi sérstaklega mæla með því að höfuð fórnarlambanna séu vætt áður en straumi er hleypt á.  Hann vildi einnig koma á framfæri þakklæti til aðstandenda sjálfboðaliðanna sem þátt tóku í tilraununum.

Fangelsismálastofnun Ísraels mun hafa keypt fyrstu framleiðsluna, alls 300 stóla.

Streptokokkar á Food & Fun

Komið hefur í ljós að tveir af þeim útlendu matreiðslumönnum sem leiddu hesta sína á matarhátíðinni Food & Fun voru streptokokkar.  Munu þeir hafa laumað sér í alþjóðlegu kokkakeppnina sem fór fram í Listasafni Reykjavíkur en ekki riðið feitum hesti.  Réttir þeirra, Nautakjöt að hætti Creutzfeldt-Jakob og Kamfílóbakter kjúklingatartar, fengu ekki náð fyrir augum dómara og ráku lestina í kepnninni.

Kokkarnir tveir, sem kenna sig við héraðið Strepto í norðurhluta Moldavíu, munu hafa komið til landsins í frystigámi og siglt undir fölsku flaggi í keppninni.  Sögðust þeir vera í launalausu leyfi sem sendiráðskokkar í íslenska sendiráðinu í Mósambík.  Hefur þeim verið vísað úr landi.

Birkir Jón fær hvatningarverðlaun rússnesku mafíunnar

Hvatningarverðlaun rússnesku mafíunnar hafa í fyrsta skiptið verið veitt Íslendingi, þingmanninum Birki Jóni Jónssyni, sem getið hefur sér gott orð sem pókerspilari. 

"Við viljum hvetja fólk til fjárhættuspila af öllu tagi og tökum hatt okkar ofan fyrir íslenska þingmanninum Birki Jóni, sem spilar fjárhættuspil jafnhliða setu sinni á þingi.  Við getum ekki beðið eftir að hann verði fjármálaráðherra." segir Jaroslav Czhernenko, framkvæmdarstjóri Fjölmiðla- og samskiptasviðs rússnesku mafíunnar á Norðurlöndum.  Verðlaunin voru afhent í Umeå, á árlegri verðlaunahátíð mafíunnar til fólks í opinberri stjórnsýslu.

Seðlabankastjóri Zimbabwe með fyrirlestur í Norræna húsinu

Bankastjóri seðlabanka Zimbabwe er væntanlegur til landsins í boði Seðlabanka Íslands.  Mun hann halda fyrirlestur í Norræna húsinu á sunnudaginn um hagkvæmni óðaverðbólgu og kynna um leið nýja og fullkomna seðlaprentvél frá Roland.

Í fréttatilkynningu frá Seðlabankanum kemur fram að það sé ekki einungis hagfræðingum og fjármálafólki mikill fengur að fá Simitsu "Cash" Igweboui bankastjóra seðlanka Zimbabwe, heldur Íslendingum öllum.  Simitsu, sem er svili Robert Mugabe, er menntaður dýralæknir og hefur komið víða við á starfsferlinum.  Áður en hann varð seðlabankastjóri var hann bílasali og var það á þeim vettvangi sem hann fékk viðurnefnið "Cash" eða reiðufé.  Mun sú nafngift, og reynsla hans sem bílasali, hafa gert hann hæfastan í starfið ef marka má embættisbréf Robert Mugabe.