Tíst

Hin fréttastofan er komin á Twitter @HinFrettastofan. Ekkert varið í hana.

ISIS lýsa yfir ábyrgð á tillögu dómsmálaráðherra

 

 

 

 

 

 

Hryðjuverkasamtökin sem kenna sig við íslamska ríkið hafa lýst yfir ábyrgð á tillögu Ingibjargar Andersen dómsmálaráðherra um dómara í landsrétti, sem samþykkt var á Alþingi.  Í tilkynningu á fréttaveitu samtakanna kemur fram að yfirgangur vesturlanda í miðausturlöndum og freklegt inngrip þeirra í stríðið í Sýrlandi hafi leitt til þess að samtökin einbeiti sér nú að innviðum vestrænna samfélaga, sérstaklega niðurbroti dómskerfa.  

Hvolpasveitin í utanríkisráðuneytið

 

 

 

 

 

 

Hvolpasveitin hefur verið ráðin til aðstoðar Gunnari Braga Sveinssyni utanríkisráðherra.  Munu hún áfram sinna verkefnum sínum á sviði fjölmiðla og stunda starf sitt í ráðuneytinu eftir föngum.  Gauti Geirsson, nýr aðstoðarmaður ráðherra, verður foringi hvolpasveitarinnar, en hann hefur leikið Foringja Róbert í sjónvarpsþáttum sveitarinnar.  Sveitin hefur nú þegar tekið til starfa og eitt af fyrstu verkefnum hennar var að koma í veg fyrir að vegabréf utanríkisráðherra lenti í þvottavél.

Sprengdu hurðasprengju

 

 

 

 

Komið hefur í ljós að Norður-Kóreumenn sprengdu ekki vetnissprengju í gær heldur hurðasprengju samkvæmt heimildum fréttastofu.  Einnig eru vísbendingar um að Norður-Kóreumenn ráði yfir töluverðu magni af rokeldspýtum,teygjubyssum og þumalskrúfum, ef marka má heimildarmann fréttastofunnar, sem er ekkert alltof oft.

NASA birtir nýjar myndir af Plútó

 

 

 

 

Bandaríska geimferðastofnunin NASA birti í dag nýjar myndir af Plútó.  Ein myndin sýnir hann glaðlegan, önnur með augun aftur en glaðhlakkalegan og sú þriðja sýnir hann á hlaupum með tunguna úti.  NASA hefur í hyggju að birta jafnvel fleiri myndir af Plútó þegar fram í sækir. 

Hefur réttarstöðu bjána

 

 

 

 

 

 

 

Torfi Hannesson, fyrrverandi fulltrúi í viðburðadeild Glitnis banka á árinu 2008, er með réttarstöðu bjána í Stímmálinu svokallaða.  Mun Torfi hafa komið að málinu með bjánalegum hætti með því að hella upp á kaffið á kaffistofu bankans dagana sem lánið var rætt sín á milli af yfirmönnum bankans.  Þótti kaffið úr hófi sterkt og gæti hafa haft áhrif á útlánastefnu bankans.  Torfi vildi ekki tjá sig um málið í samtali við fréttastofu en var tilbúinn að svara spurningum skriflega.

Blm:  Torfi, var kaffið svona sterkt hjá þér

Torfi: Það var frekar sterkt en vel drekkandi og ekki til þess fallið að auka áhættu bankans

Blm:  Hvað heitir konan þín og í hverju sefur hún?

Torfi:  Sigrún og í náttfötum, af hverju?

Blm: Bara

Ólafur færður í nýtingarflokk

 

 

 

 

 

 

 

 

Ólafur Hannesson pípulagningamaður hefur verið færður úr biðflokki í nýtingarflokk af atvinnuveganefnd alþingis.  Ólafur, sem er með ofvirka þvagblöðru og skilar öllum vökva sem hann innbyrðir á fáeinum mínútum, segist vera ósáttur að ekki hafi verið haft samráð við sig um breytinguna.  "Ég hef verið í biðflokki í nokkur ár og verið sáttur við það en nú á að virkja mig og það án samráðs.  Ég hef helst til áhyggjur af morgunmigunni og ef mig langar að fá mér aðeins í tána, og hef ég tjáð Jóni Gunnarssyni það persónulega að ég nenni ekki að vera með rafal hangandi utan á mér við slík tilefni" sagði Ólafur að lokum.

Óli Skans í yfirheyrslu

 

 

 

 

 

 

Óli Skans dansari og altmuligmaður var kallaður í yfirheyrslu hjá Sérstökum saksóknara í dag í kjölfar yfirlýsingar Ingibjargar Kristjánsdóttur, eiginkonu Ólafs Ólafssonar sakbornings í Al-Thani málinu.  Í dómsskjölum er minnst á Óla og fer tvennum sögum af því um hvaða Óla er verið að tala um.  Að sögn Ingibjargar er þessi Óli ekki hennar maður.  Óli Skans sagðist ekki vita á hverju hann ætti von.  "Ég get alveg eins hafa átt þátt í Al-Thani málinu enda kom hann í tvo danstíma hjá mér snemma árs 2008, þegar þetta var allt byrjað að fara til fjandans en allir svaka hressir.  Hann borgaði fyrir tímana með hlutabréfum í Kaupþingi, sem lánaði honum fyrir bréfunum." 

Sameiginleg yfirlýsing Eimskipa og Samskipa

Hinni fréttastofunni hefur borist sameiginleg yfirlýsing Samskipa og Eimskipa vegna rannsóknar Samkeppniseftirlitsins á meintum samkeppnisbrotum flutningafyrirtækjanna:

Við höfnum alfarið að hafa staðið að þeim samkeppnisbrotum sem koma fram í kæru Samkeppniseftirlitsins og viljum árétta að við höfum aldrei átt neitt samstarf um nokkurn skapaðan hlut.  

Virðingarfyllst,

Eimskip/Samskip

PS:  Eigið góðan dag 

Makalaust hjá Þjóðverjum og Alsírmönnum

Makalaust var á leik Þjóðverja og Alsírmanna í kvöld.  Makar leikmanna voru ekki á leiknum og ekki hafa fréttastofunni borist skýringar á því.  Vitað er að makar þýsku leikmannanna hafa verið í bananastuði í Brasilíu og jafnvel misst af leikjum liðsins.  Þetta mun þó vera í fyrsta skipti sem allar makarnir gleymdu sér.