Umferðastofa og Ferðaklúbburinn 4x4 að sameinast?

Á heimasíðu Ferðaklúbbsins 4x4 kemur fram að klúbburinn og Umferðarstofa muni sameinast innan fárra vikna, þegar áreiðanleikakönnun hefur verið innt af hendi.  Að sögn heimildamanna hefur þessi sameining lengi staðið fyrir dyrum enda margt í rekstri beggja sem hægt er að sameina.  T.a.m. aka flestir starfsmenn Umferðarstofu um á jeppabifreiðum og flestir meðlimir ferðaklúbbsins nota bílbelti, svo dæmi sé tekið.

Helsti ásteitingarsteinn viðræðnanna mun vera utanvegaakstur en heimildamenn innan beggja raða segja enga launing á því að Ferðaklúbburinn ætli sér mun meiri utanvegaaksturs en áður og verður erfitt fyrir Umferðastofu að mælast gegn því þegar hún verður runnin saman við klúbbinn.  "Við ætlum okkur að fá í sameiningarsáttmálann að félagar fái að keyra mun meira utanvega gegn því að keyra alltaf á löglegum hraða", sagði heimildamaður innan Ferðaklúbbsins.

Á Umferðastofu er mikill áhugi fyrir sameiningunni enda mikill jeppaáhugi hjá starfsmönnum stofunnar.  Er skemmst að minnast sögulegrar þriggja vikna jeppaferðar sem stofan stóð fyrir s.l. sumar, bæði utan vega sem innan.

Stjórnmálafræðingur: Samfylking mun slíta samstarfinu eftir þrjú ár

Rune Treholt, norskur stjórnmálafræðingur sem dvelur á Íslandi um þessar mundir er sannfærður um að Samfylkingin muni slíta stjórnarsamstarfinu innan þriggja ára og tekur þar með undir Reykjavíkurbréf Morgunblaðsins sem birtist s.l. sunnudag.  Rune segir ritstjóra blaðsins hafa hitt naglann á höfuðið, "Eftir þrjú ár mun Samfylkingin verða komin með mun betri vígstöðu gagnvart Sjálfstæðisflokki, hlaupast undan merkjum og láta kné fylgja kviði með því að mynda vinstristjórn með Framsóknarflokki og Vinstri-Grænum", sagði Rune. 

Rune hefur fylgst vel með íslenskum stjórnmálum síðan hann kom í sumarlanga heimsókn á vegum Frjálshyggjufélagsins.  "Ég kynntist tveimur félögum hins íslenska Frjálshyggjufélags á ráðstefnu um eflingu stéttarfélaga og þeir buðu mér í heimsókn.  Hún reyndist mér mikill örlagavaldur því þar kynntist ég hinu íslenska neftóbaki sem ég hef ekki látið frá mér síðan".   

Rune vill undirstrika að það muni aldrei ríkja gegnheilt og innmúrað traust á milli flokkanna og því augljóst að kastast muni í kekki þegar Samfylkingin verði búin að ná til sín fleiri vopnum.  "Það vita allir sem nálægt stjórnmálum koma að Samfylkingin er flagð undir fögru skinni og slóttug mjög.  Hún mun án efa nota þessa stjórnarmyndum sem stökkpall til frekari bolabragða gagnvart Sjálfstæðisflokki", sagði Rune og snýtti sér duglega. 

Eyjólfur Sverrisson orðaður við Vestur-Samóaeyjar

Á fotboltavefnum Football Samoa er Eyjólfur Sverrisson, landsliðsþjálfari Íslands í knattspyrnu, orðaður við stöðu landsliðsþjálfara knattspyrnuliðs Vestur-Samóaeyja í Suður-Kyrrahafi.  Haft er eftir Friedrich Engels, formanni knattspyrnusambands eyjanna að liðið sé sem stendur þjálfaralaust eftir miklar hrakfarir í undankeppni Eyjaálfu fyrir síðusta heimsmeistaramót.  Eftir undankeppnina hefur reynst erfitt að skrapa í lið, eins og Friedrich orðar það, en að það standi til bóta þegar nýr þjálfari komi til starfa. 

Friedrich nefnir að knattspyrnusambandið hafi um hríð reynt að laða að sér þjálfara liðs sem hefur átt afleitu gengi að fagna á undanförnum misserum og fengið á sig mörg mörk.  Eyjólfur uppfylli þetta skilyrði með sóma og því komi hann sterklega til greina.  Eftir glæsilegan sigur íslenska liðsins á Norður-Írum á útivelli í fyrsta leik undankeppni Evrópumótsins hefur mjög svo syrt í álinn og ekki unnist leikur.  Landslið Vestur-Samóaeyja hefur einungis unnið 3 leiki á síðastliðnum 10 árum og markatalan er verri en orð fá lýst.  Friedrich vonar að úrslit Íslendinga í komandi landsleikjum við Liechtenstein og Svíþjóð verði liðinu óhagstæð.  "Við höfum einungis áhuga á þjálfara sem hefur tapað mörgum leikjum og er að niðurlotum kominn.  Það er í takt við mannskapinn okkar og frammistöðu undanfarin ár", sagði Friedrich.

Samkeppnismál: Flúðasveppir kæra Ömmubakstur

Í aprílhefti Pésa, tímarits Hrunamannahrepps, er athyglisvert viðtal við Ragnar Kr. Kristjánsson, fyrrverandi eiganda Flúðasveppa, þar sem hann heldur því fram að félagið, með Georg Ottósson núverandi eiganda í fararbroddi, sé að undirbúa lögsókn á hendur Ömmubakstri fyrir skaðlega undirverðlagningu á flatkökum.

 "Það er hreint með ólíkindum hversu samkeppnisaðstæður okkar, sem höfum komið að svepparækt á Íslandi, eru erfiðar og hvernig stjórnvöld hafa markvisst grafið undan þessum rekstri með ólögmætum og ósanngjörnum aðgerðum til þess að efla neyslu annarra matvara á kostnað sveppa"  sagði Ragnar fullum hálsi.  "Það segir sig sjálft að gegndarlaus kaup ríkisstofnana á flatkökum þessa fyrirtækis hafa kippt undan okkur stoðum þessa rekstrar, og aðgerðarleysi Samkeppniseftirlitsins og Neytendasamtakanna er til skammar þegar Ömmubakstur auglýsir á öllum miðlum að það séu alls þrjár flatkökur í pakka, svo ég tali nú ekki um bragðlausu pizzurnar þeirra, sem margar eru án sveppa", sagði Ragnar myrkur í máli.

Grettir Ásmundarson hjá Samkeppniseftirliti segist deila skoðun Ragnars með mörgum innan Samkeppniseftirlitsins og sjálfur borðar hann ekki flatkökur og aðeins ömmupizzur með sveppum.  Að öðru leyti vildi hann ekki tjá sig um málið.

Talsmenn Ömmubaksturs vísa þessum ummælum Ragnars á bug.  Yrsa "amma" Jónasardótir, eigandi Ömmubaksturs, segir að í sögu fyrirtækisins hafi hún aldrei orðið vitni að öðrum eins arfavitlausum þvættingi síðan Mjólkursamsalan auglýsti AB mjólk sem góðri fyrir þarmaflóruna.  "Við munum berjast á hæl á hnakka við þessa einokunarverslun sem telur flatkökur og bragðlausar pizzur hafi eitthvað gera með sveppi sem seldir hafa verið í einokunarverslun hér á landi síðan þetta fyrirtæki var sett á laggirnar", sagði Yrsa að lokum.

Framleiðendur Sex And The City á eftir Ellý Ármanns

Í frétt í Sunnlenska um helgina er þess getið að framleiðendur sjónvarpsþáttanna Sex And The City séu að undirbúa lögsókn á hendur Ellý Ármannsdóttur fyrir ritstuld.  Munu greinar á bloggsíðu hennar minna ótæpilega á meintar greinar Carrie Bradshaw í New York Post í þáttunum Sex And The City. 

Íslandsvinurinn Evan Handler, sem leikur Harry Goldenblatt í þáttunum vinsælu, og hefur sótt íslenskunám undanfarin 3 ár í Námsflokkum Reykjavíkur, segir greinar Ellý augljósan ritstuld, þar sem reynt sé að stæla greinar þessarar margfrægu sögupersónu Carrie Bradshaw.  "Mér þykir morgunljóst að Ms. Ellie sé að skrifa greinar sem Carrie Bradshaw hefði ella skrifað í blaðið sem hún ella hefði unnið fyrir".

Ragnar Aðalsteinsson hefur verið ráðinn verjandi Ellýjar en óljóst er á þessari stundu hvenær málið verður tekið fyrir, en Ólafur Börkur Þorvaldsson hæstaréttardómari hefur nú þegar lýst því yfir að hann sé óhæfur komi málið fyrir Hæstarétt.

Óli Björn kosinn Besservisser bloggsins

Kiwanisklúbbur Stokkseyrar hefur kosið Óla Björn Kárason Besservisser bloggsins nú sem endranær. 

Klúbburinn telur Óla Björn með afbrigðum glöggan á þær pólitísku hræringar sem hafa dunið á borgurum landsins undanfarin misseri og með ólíkindum hversu getspakur hann hefur verið á þróun stjórnmála á Íslandi þessa daga eftir kosningar.  Óli virðist lesa hug andstæðinga Sjálfstæðisflokks eins og opna bók og virðist engu skipta hvað þetta ágæta fólk dregur til stafs, alltaf veit Óli betur. 

Jarþrúður Skarphéðinsdóttir, forsvarsmaður klúbbsins segir Óla vel að þessu kominn enda hafa flestir félagar klúbbsins gert bloggsíðu Óla að opnunarsíðu sinni á netinu.  Ef einhver í klúbbnum segir "ég veit hvað þú meinar.." segja aðrir klúbbfélagar gjarnan.... "Já, en Óli veit betur!!".  Athygli hefur þó vakið að Óli virðist halda að Björn Bjarnason verði ráðherra í nýrri ríkisstjórn og hefur einn klúbbfélagi mjög ákveðnar skoðanir á því.  "Ég tel að þarna hafi besservisserinn gert í brók.  Það er útilokað að Björn verði ráðherra í þessari ríkisstjórn", segir Drengur Skarphéðinsson, ellilífeyrisþegi á Stokkseyri.  "Á dauða mínum átti ég von og að Júlíus Hafstein myndi klúðra Kristnihátíð, en að Björn verði ráðherra er eins líklegt og að Hamragilið verði endurvakið sem skíðasvæði ÍR", sagði Drengur, að lokun.

Nýr ráðherralisti að verða til - hross í landbúnaðarráðuneytið?

Þær fregnir voru að berast úr ráðherrabústaðnum að ráðherralisti nýrrar ríkisstjórnar Sjálfstæðisflokks og Samfylkingar lægi fyrir því sem næst.  Háværar raddir hafa verið uppi um að hrossið Hending frá Ísafirði fái fyrst dýra ráðherraembætti.  Ef af verður mun Hending verða fyrsta dýrið sem fær ráðherraembætti í ríkisstjórn þjóðríkis innan OECD, en töluvert er um að dýr gegni ráðherraembættum í ríkjum utan OECD.

Eftir því sem næst verður komist verður ráðherralistinn eftirfarandi:

Forsætisráðherra verður Geir H. Haarde, en það mun vera fyrsti kalkyns lögfræðimenntaði forsætisráðherra frá lýðveldisstofnun.

Utanríkisráðherra verður Valgerður Sverrisdóttir, þar sem hún mun ekki láta lykla af skrifstofum ráðuneytisins af hendi og það eru ekki til aukalyklar.  Aðeins eru eldvarnarhurðir í ráðuneytinu og er búð að lóða skrárnar í hurðirnar. 

Fjármálaráðherrar verða Helgi Hjörvar og Hrannar Arnarson

Iðnaðar- og viðskiptaráðherra verður Gunnar Örlygsson

Samgönguráðherra verður Matthías Bjarnason

Landbúnaðarráðherra verður hrossið Hending frá Ísafirði

Heilbrigðis- og tryggingamálaráðherra verður Höskuldur Jónsson

Menntamálaráðherra verður Karl Th. Birgisson

Dóms- og kirkjumálaráðherra verður Júlíus Hafstein 

Félagsmálaráðherra verður Pétur Blöndal

Umhverfisráðherra verður Kyoto bókunin

 

Veiðihornið: Nýjar tölur frá Veiðimálastofnun

Samkvæmt nýjum tölum Veiðimálstofnunar hefur drykkja í veiðitúrum heldur aukist á milli ára.  Alls mun bjórdrykkja hafa aukist um 3% í veiðitúrum það sem af er ársins en neysla brenndra drykkja dregist verulega saman.  Léttvínsdrykkja hefur aftur á móti aukist úr hófi og mun meira en helstu vísitölur.

Að sögn stofnunarinnar er ástæða til þess að hafa áhyggjur af þessari þróun, enda hafi vodka og viskí jafnan hentað betur til drykkju enda þótt líkur á uppköstum séu heldur meiri við drykkju brenndra drykkja eru mun minni líkur á að veiðmenn mígi á sig.  Að öllu jöfnu henti því brenndir drykkir mun betur til veiði.  Vísitala veiðileyfaverðs heldur áfram að hækka og er það álit hagfræðinga stofnunarinnar að krappari kjör veiðimanna hafi leitt þá í þessar ógöngur.  Stofnunin hyggst beita ser í framtíðinni fyrir neyslu brenndra áfengra drykkja og sem dæmi geta veiðimenn nú fengið 30% afslátt af Vodka Smirnoff og Bacardi romm með framvísun veiðikortsins í vínbúðum landsins.

Guðgeir Leifsson og Helgi Bentsson til West Ham?

Forráðamenn West Ham hafa ekki setið auðum höndum eftir að keppnistímabilinu lauk um síðustu helgi.  Að sögn Eggerts Magnússonar eru þegar hafnar þreifingar á nýjum leikmönnum og segir Eggert að íslenskir leikmenn séu að sjálfsögðu undir smásjánni, enda heimatökin hæg. 

Félagið mun þegar hafa haft samband við umboðsmann Guðgeirs Leifssonar, sem er samningsbundinn Charleroi í Belgíu og tekur ógnarlöng innköst.  Einnig er hann liðtækur í Hornafjarðar-manna.

 Helgi Bentsson hefur marga fjöruna sopið og leikið með öllum félagsliðum landsins að undanskildu Íþróttafélaginu Narfa í Hrísey, sem um árabil hefur reynt að fá Helga til liðs við sig.  Helgi er nýbúinn að gera 3 ára samning við Árroðann og að sögn stjórnarformanns Árroðans, Braga Bergmann, mun félagið gera allt sem í sínu valdi stendur til þess að halda í Helga. 

Fjársöfnun til handa Bjarna Ármannssyni og fjölskyldu

Rauði kross Íslands og Rafvélaverkstæðið Glitnir í Borgarnesi standa fyrir fjársöfnun til handa Bjarna Ármannssyni og fjölskyldu.  Hluti fjárins mun renna til Guðrúnar Helgadóttur, tengdamóður Bjarna, en hún vera dýr í rekstri og skulda víst Alþingi ennþá 200þúsund kallinn sem hún fékk lánaðan um árið til þess að gera sig flotta.

 Að sögn Rúnars van Hesselink, rekstrar-, gæða- og verkefnastjóra rafvélaverkstæðisins, stendur fjölskylda Bjarna afar veikum fótum eftir gríðarlega erfið starfslok hjá bankanum, sem áður var kenndur við kaupleiguokur.  Mun bankinn hafa fengið ríflegan starfslokasamning hjá Bjarna og mun Bjarni þurfa að greiða bankanum sem nemur um 900mkr á árinu.  Fjölskylda Bjarna hefur fengið inni í Jórufelli 7, og mun aðbúnaðurinn þar ekki vera góður, enda ekki búið að þrífa íbúðina frá því síðasti íbúi flutti út, Úlfar Nathanelsson fjárflæframaður, en hann mun hafa farið heldur glæfralega með eldavélina og ísskápinn.  Þótt Úlfar sé annálaður matmaður mun maturinn ekki hafa verið mikill Úlfarsmaður, enda allt á öðrum endanum í eldhúsinu.  Einnig eru saumsprettur í sófasettinu.

 Reikningurinn í Sparisjóði Mýrasýslu er skráður á kennitölu vinar Bjarna, sem er reyndur kennitöluflakkari án þess þó að hafa lent á vanskilaskrá - upplýsingar er að finna á heimasíðu sparisjóðsins og rauða krossins.