Búðardalur kastar krónunni - tekur upp japanska jenið

Bæjarstjórn Búðardals hefur lagt niður íslensku krónuna og tekið upp japanska gjaldmiðilinn jen.  Ekki er lengur hægt að nota krónuna innan sveitarfélagsins og hafa fyrirtæki og einstaklingar þegar fært sig yfir í nýja gjaldmiðilinn.  Landsbankinn var ráðgefandi sveitarfélaginu í gjaldmiðlaskiptunum og seðlaprentun.

Þórunn Sakamoto bæjarhagfræðingur hafði veg og vanda að þessari breytingu og segir hún ástæðuna fyrst og fremst vera lágir vextir jensins.  "Allir sem taka lán í jenum hafa notið mjög lágra vaxta og hefur greiðslubyrði húsnæðislána í Búðardal þegar lækkað um fjórðung.  Með þessu erum við að auka kaupmátt Búðardælinga og nærsveitarmanna", sagði Þórunn.  Japanskættaður eiginmaður Þórunnar, Riyuchi Sakamoto dýralæknir, átti hugmyndina þegar hann var að hjúkra 5 vetra fylfullri meri.  "Hann Rikki minn fékk þessa hugmynd þegar hún Stjarna í Bláafelli kastaði rauð stjöróttu folaldi.  Þegar ég heyrði hugmyndina leist mér svo vel á hana að ég lagði hana fyrir næsta fund bæjarráðs var hún saþykkt.", sagði Þórunn.

Líklegt þykir að fleiri sveitarfélög muni fylgja í kjölfarið.  Vitað er að Neskaupsstaður er að velta fyrir sér rússnesku rúbblunni og Fagurhólsmýri mun vera í þann mund að taka upp ungversku forintuna.

Ríkharður Teitsson hjá Greiningardeild Kaupþings sagði alltaf áhættusamt að skipta um gjaldmiðil, sérstaklega fyrir gjaldmiðilinn sjálfan. 

Fitch Ratings lækkar lánshæfismat Hjálmars Traustasonar loftskeytamanns

Fitch Ratings hefur lækkað lánshæfismat Hjálmars Traustasonar loftskeytamanns og hefur hann nú fengið einkunnina C-.  Hjálmar segist vonsvikinn yfir þessari niðurstöðu Fitch.  Hjálmar segist hafa átt von á lækkun en ekki svona mikilli, en hann var áður með einkunnina B.  "Ég var að vonast eftir C+ en það verður ekki á allt kosið.  Ég er með tvö bílalán í vanskilum og svo skulda ég nokkrar stöðumælasektir frá síðasta ári", sagði Hjálmar.

Afkoma Hjálmars á síðasta ársfjóðungi olli greiningardeildum bankanna vonbrigðum.  EBITDA og EV/EBITDA hlutfall Hjálmars lækkaði um 4 desibel á milli ára og sé tekið tillit til gengistaps á $100 seðli sem Hjálmar hefur átt í þrjú ár, sé staðan mun verri.  Hjálmar segist þó vera bjartsýnn á framtíðina og væntir þess að afkoma ársins verði í takt við væntingar.  "Ég er alveg hættur að skemmta mér og er farinn að leggja fyrir.  Ég sé ekki ástæðu til þess að gefa út afkomuviðvörun að svo stöddu", sagði Hjálmar kokhraustur.

Eggert Haukdal gestur í Aðþrengdum eiginkonum

Eggerti Haukdal hefur verið boðið að vera gestaleikari í einum til tveimur þáttum af þáttaröðinni Aðþrengdum eiginkonum næsta vetur.  Eggert mun leika gjaldkera sveitarfélags sem fer heldur frjálslega með fjármuni og vingast við helstu persónur þáttanna þegar hann reynir að innheimta fasteignagjöld af íbúum Bláregnsslóðar. 

Eggert segir að þetta boð hafi komið sér á óvart enda þekkir hann hvorki haus né sporð á þessum þáttum.  "Ég hef aldrei horft á þessa þætti en mér skilst að þeir séu skemmtilegir og að konurnar í honum séu augnayndi".  Eggerti líst vel á hlutverkið, "ég þekki þessar aðstæður og þarf ekki leika, ég get verið ég sjálfur".  

Hálslón: Heiðagæsin hörfar en rostungar setjast að

Logi Pots dýralæknir á Austfjörðum segir hækkun Hálslóns valda búsifjum hjá heiðagæsinni og er líklegt að hún muni hörfa upp á fjöll.  Logi segir líkur á að hún nái að verpa þar en það mun fara eftir veðri næstu vikur.

Loga til mikillar furðu hafa rostungar sest að við Hálslón.  "Þetta er ekki beint kjöraðstaða fyrir þessi kvikindi, sem eru stór og mikil og er frek til fæðu" segir Logi.  Hann sagðist hvorki gera sér grein fyrir á hverju rostungarnir ætla að nærast né hvaðan þeir komu.  Reyndar vissi hann af einni ær sem ekki hefði látið vita af sér og beindist grunur að rostungunum.  Líklegt er talið að þeir hafi komið með Smyrli en hann vildi ekki útloka vöruflutningaskip.  Ólíklegt er talið að þeir hafi komið með flugi.

 

Sjálfstæðiskonur fá styrk til kynskiptiaðgerðar

Fjöldi sjálfstæðiskvenna hefur pantað kynskiptiaðgerð á Landsspítala-Háskólasjúkrahúsi og er áætlað að flestar þeirra fari í aðgerð næsta haust.  Mikil óánægja með kynjahlutföll í ráðherrastólum Sjálfstæðisflokksins mun vera eina ástæða þessara aðgerða.  Er það von sjálfstæðiskvenna að með þessu verður leiðin að ráðherrastól greiðari.

Tómas Ringsted yfirlæknir á LH segir bylgju kynskiptiumsókna hafa gengið yfir sjúkrahúsið undanfarna daga og líst honum ekki á blikuna.  "Sé litið til stærðar Sjálfstæðisflokksins og þess fjölda kvenna sem flokksbundinn er, líst mér ekki á blikuna.  Við gætum verið að horfa gríðarlega fjölgun karla á kostnað kvenna og það er þróun sem engum ætti að hugnast.  Samfélagsgerðin gæti breyst í grundvallaratriðum", sagði Tómas.

Forystusveit flokksins hefur ekki tjáð sig um málið en Svavar Tönsland, gjaldkeri flokksins, staðfesti að flokkurinn styrkti þær konur sem vildu skipta um kyn.  "Í raun má segja að stuðningur okkar sé tvíþættur, annars vegar er um fjárhagsaðstoð að ræða og hins vegar sálræna aðstoð.  Sjálfur gekk ég undir slíka aðgerð fyrir nokkrum árum síðan og var í kjölfarið gerður að gjaldkera flokksins", sagði Svavar.  Hann vildi þó ekki meina að aðgerðin leiddi endilega til frekari metorða í flokknum en taldi slíkt ekki ólíklegt.

Bútan: Greiningardeild Kaupþings hlýtur Nostradamus verðlaunin

Greiningardeild Kaupþings er getspakasta fjármálafyrirtækið, að mati Nostradamus stofnunarinnar í Bútan.  Nostradamus stofnunin hefur veitt verðlaunin á hverju ári og þótti Greiningardeild Kaupþings skara fram úr hvað varðaði spádóma um ófyrirséða lækkun, og svo hækkun bútanska gjaldmiðilsins ngultrum, vísitölu neysluverðs í Bútan, atvinnuþátttöku Bútanverja, dagvöruvísitölu smásöluverðs í Bútan og einnig smásöluvísitölu dagvöruverðs.  Einnig mun Greiningardeildin hafa spáð rétt fyrir um kyn ríkisarfa bútönsku krúnunnar, en hann mun vera stúlkubarn.

Að sögn Yin Yin talsmanns bútönsku krúnunnar er Greiningardeild Kaupþings vel að þessum verðlaunum komin.  "Það hafa verið miklar efnahagssveiflur í Bútan undanfarin misseri og Kaupþing hefur spáð fyrir um þær allar.  Þessir spádómar hafa verið svo nákvæmir að halda mætti að Kaupþing hefði sjálft haft áhrif á bútanska fjármálamarkaðinn með stöðutökum.  Hvað sem því líður erum við vongóðir um að Kaupþing hafi ekki haft áhrif á kyn ríkisarfa krúnunnar með stöðutökum", sagði Yin í léttum dúr.

 

Meistaradeildin: Jóhanna Sigurðardóttir heiðursgestur Berlusconi

Jóhann Sigurðardóttir flaug í morgun áleiðis til Aþenu þar sem hún mun vera heiðursgestur á úrslitaleik meistaradeildar Evrópu, leik Liverpool og AC Milan.  Það er Sylvio Berlusconi, eigandi Milanliðsins, sem býður Jóhönnu til Aþenu. 

"Við Sylvio höfum lengi verið góðir vinir eftir að við kynntumst á ráðstefnu um spillingu og misnotkun fjölmiðla í Corleone á Sikiley.  Sylvio er afskaplega geðugur maður og hef ég fylgst með honum í ítölsku stjórnmála- og fjölmiðlalífi, full aðdáunar"´, sagði Jóhanna.  Þegar hún var spurð hvað henni fyndist um samanburð ítalskra blaðamanna á Berlusconi og fasistanum Mussolini, sagði hún það vera helberan þvætting.  "Ég er full eftirvæntingar fyrir kvöldið og vona að Úlfarnir hafi betur" rétt áður en hún hvarf inn í flugvélina.

Kristján Möller: Byrjað á Vaðlaheiðargöngum, ekki komið umhverfismat og allt það dótarí

Verktakar á Norðurlandi hafa hafist handa á jarðgöngum undir Vaðlaheiði og verður verkinu lokið á mettíma, segir nýr samgönguráðuherra Kristján Möller í viðtali á heimasíðu Rangeyingafélagsins.  Hann segir að mikið liggi á að klára göngin fyrir veturinn, þrátt fyrir að ekki hafi verið unnið umhverfismat og allt það dótarí. 

Þegar Kristján var spurður nánar út í hvað hann á við þegar hann segir "dótarí" sagði hann "Þótt ég sé ekki fráhverfur umhverfismati þá er svo mikið dótarí í kringum þetta að mér blöskrar.  Menn mega varla hreyfa sig án þess að unnið sé umhverfismat og þegar samgöngur eru bættar með þessum móti á ekki að þurfa allt þetta dótarí", sagði Kristján. 

Þegar spyrillinn spurði Kristján hvort þessi göng yrðu gjaldskyld gerði Kristján sig líklegan til þess að ná kverkataki á spyrlinum og þurfti hann frá að hverfa svo fætur toguðu.  Ekki fékkst því svar við síðustu spurningu spyrilsins.

Menntaskólinn Hraðbraut: Gáfulegast að ljúka stúdentsprófi 12 ára

Þótt Menntaskólinn Hraðbraut hafi auglýst að gáfulegra sé að ljúka stúdentsprófi 18 ára en 20 ára heldur aðstoðarskólameistari Hraðbrautar, Jónas Hannes Jónasson, því fram að gáfulegast sé að ljúka stúdentsprófi 12 ára.

Jónas segir að með auglýsingunum sé hreinlega verið að benda fólki á þau tvö ár sem sparast í námi til stúdentsprófs.  "Það segir sig sjálft að tvö ár á þessum aldri geta skipt sköpum þegar kemur að námsþroska og leit að lífsstarfi.  Við erum reyndar á þeirri skoðun að þótt gáfulegra sé að ljúka stúdentsprófi 18 ára en 20 ára sé gáfulegast að ljúka stúdentsprófi 12 ára, því þannig sparast 8 sjálfdauð ár í óþarft nám.  Hraðinn er orðinn svo mikill í þjóðfélaginu og menntakerfið verður að vera í takt við þróunina." segir Jónas.  Hann hræðist ekki ungan aldur námsmanna, sem þyrftu að hefja nám til stúdentsprófs 8 ára gamlir.  "Aldur er afstæður og krakkarnir sem við erum með til reynslu núna eru hörkunámsmenn", sagði Jónas um leið og hann vígði nýja rennibraut skólans við mikinn fögnuð nemenda sinna.

Guðlaugur Þór boðar auknar rjúpnaveiðar

Guðlaugur Þór Þórðarson nýr heilbrigðis- og tryggingamálaráðherra sagði fyrir stundu að sitt fyrsta baráttumál í embætti verður stórfelld aukning á rjúpnaveiði á Íslandi.  Guðlaugur, sem barðist af mikilli hörku gegn rjúpnaveiðibanninu um árið, segir að skjóta þurfi mun fleiri rjúpur en áður til "..að stöðva rányrkju þessa vargs á þjóðargersemi okkar, berjalyngið.." eins og hann orðaði það. 

Guðlaugur segir að skotveiði eigi vel heima innan síns ráðuneytis, enda geti skotvopn haft afgerandi áhrif á heilbrigði einstaklinga.